Սեպտեմբերի 6-ին Երևանում տեղի ունեցավ «Գրքերի աշխարհ» բազմաֆունկցիոնալ կենտրոնի հանդիսավոր բացման արարողությունը: «Գրքերի աշխարհ»-ը  հավակնում է դառնալ երևանցիների ամենասիրելի  մշակութային միջավայրերից մեկը՝ պարբերական միջոցառումներով, շնորհանդեսներով, գրական-մշակութային քննարկումներով:

 

Բազմաֆունկցիոնալ համալիրը այցելուներին տրամադրելու է ինչպես տպագիր,  այնպես էլ աուդիո և էլեկտրոնային գրականությունից օգտվելու հասանելիություն և անհրաժեշտ տեխնիկական սարքավորումներ: Գիտակցելով Երևանի մշակութային կյանքի  համար նմանօրինակ կենտրոնի անհրաժեշտությունը, առաջնային  նպատակ է  կենտրոնի ծառայությունները անշահախնդիր կերպով հասանելի դարձնել  հնարավորինս  մեծ թվով  մարդկանց։

 

Կենտրոնը ստեղծվել է «Սոհո Սենթըր» ընկերության կողմից՝ որպես սոցիալական պատասխանատվության բացառիկ դրսևորում:

 

- «Գրքերի աշխարհ»-ը բազմաֆունկցիոնալ համալիր է՝ հագեցած ոչ միայն տպագիր, այլև էլեկտրոնային միջոցներով։ Այստեղ ընթերցողները հնարավորություն կունենան անվճար օգտվել գրքերից, Kindle-ներից և համակարգիչներից։ Այն նաև յուրատեսակ աշխատանքային միջավայր է, որտեղ կարելի է գալ և աշխատել։ Ամեն հնարավոր բան արված է, որ հարմարավետ լինի ընթերցողի համար, որպեսզի մարդիկ գան, համախմբվեն, քննարկումներ իրանացնեն, մասնակցեն գրքերի շնորհանդեսների, հանդիպեն սիրելի գրողներին,-նշում է Հայաստանի մշակութային հիմնադրամի տնօրեն Մանուկ Նիգոյանը, ում հետ համագործակցությամբ էլ «Սոհո Սենթըր»-ը իրականացրել է նախագիծը։