Հիշարժան էր հունվարը հատկապես Կոտայքի մարզի վեց համայնքներում՝ Սոլակում, Բջնիում, Արամուսում, Ողջաբերդում, Ջրաբերում և Հատիսում: Այդ համայնքներում կազմակերպված «Մեկօրյա մասնագետ» միջոցառումներն ամփոփում էին 14-17 տարեկան տեղաբնակ պատանիների՝ համայնքային կյանքում իրենց ներգրավվածության բարձրացման ուղղությամբ իրականացված աշխատանքները։

 

Ծրագիրը հենց այդպես էլ կոչվում է՝ «Երիտասարդների քաղաքացիական ակտիվության և համայնքային կյանքում ներգրավվածության  բարձրացում», որը հովանավորվում է ԱՄՆ դեսպանատան կողմից և իրականացվում «Երիտասարդ պատմագետների ասոցիացիա» ՀԿ աջակցությամբ։ Ծրագրի հիմնական նպատակը սեփական համայնքի նկատմամբ երիտասարդների հոգատարության և պատասխանատվության բարձրացումն է, այն գիտակցության ամրապնդումը, որ իրենք համայնքի մի մասն են և իրենց ակտիվությամբ ու պահանջատիրությամբ կարող են տեր կանգնել և շատ բաներ փոխել իրենց բնակավայրում։ 

 

Երեխաները մասնակցել էին քաղաքացիական հասարակությանը նվիրված սեմինարների, համայնքապետարանի աշխատակիցների օժանդակությամբ ուսումնասիրել էին համայնքի առջև ծառացած խնդիրները, փորձել էին հասկանալ դրանց լուծման հետ կապված դժվարությունները, ընտրել էին այդ խնդիրներից մեկը և մանրամասնորեն մշակել դրա լուծմանն ուղղված քայլերը։

 

Միջոցառումների ժամանակ նրանք հենց այդ քայլերն էլ ներկայացրին հյուրերին, իսկ համայնքի ղեկավարները  խոստացան, որ հնարավորության սահմաններում կփորձեն աջակցել այդ խնդիրների լուծմանը։