Ձգտելով ճանաչել, գնահատել և հանրահռչակել մեր մշակույթն ու դրա արժանավոր ներկայացուցիչներին, հոկտեմբերի 31-ինԵրևանի Հենրիկ Մալյանի անվան կինոդերասանի թատրոնում տեղի կունենա «Արարատյան մարդը» ֆիլմաշարի պրեմիերան։

 

Ֆիլմաշարը ներկայացվում է «Կողբ» հիմնադրամի «Կոստան Զարյան 140» նախագծի շրջանակում՝ «ԲՈՒՆ» TV-ի հետ համագործակցությամբ։

 

«Արարատյան մարդը» բացառիկ հնարավորություն է՝ բացահայտելու Կոստան Զարյանի աշխարհը՝ նրա գրականությունը, արվեստի ընկալումն ու փիլիսոփայությունը։

 

Ֆիլմաշարի ստեղծման գործընթացը շարունակվել է մի քանի ամիս՝ ներառելով նյութերի հավաքագրում և նկարահանումներ՝ գրողին առավել ամբողջական կերպով ներկայացնելու նպատակով։

 

Ֆիլմի տեքստի հեղինակն է գրականագետ Երվանդ Տեր-Խաչատրյանը, ում արխիվից է տրամադրվել ֆիլմում ներառված արժեքավոր նյութերի մեծ մասը։ Տեր-Խաչատրյանը տարիներ շարունակ իր գործունեության կարևոր մասը նվիրել է Կոստան Զարյանի ուսումնասիրությանը և հանրահռչակմանը։

 

Սցենարի հեղինակը գրող, սցենարիստ Սարգիս Հովսեփյանն է։

 

Ֆիլմաշարը բաղկացած է 10 մասից, որոնցից յուրաքանչյուրում ներկայացվում է գրողի կյանքի և ստեղծագործական ուղու մի փուլ։ Հատուկ ֆիլմաշարի համար հարցազրույցներ են անցկացվել մաեստրո Տիգրան Մանսուրյանի հետ, որը անձամբ է շփվել մեծ գրողի հետ, ինչպես նաև գրողի թոռան՝ ճարտարապետ Արա Զարյանի հետ՝ բացահայտելու Կոստան Զարյանի կյանքի և մտածողության նոր դրվագներ։

 

Ֆիլմաշարում անդրադարձ է կատարվում գրողի կյանքի կարևոր փուլերին՝ սկսած կրթությունից և հեղափոխական շարժումներին մասնակցությունից մինչև եղբոր՝ Հովհաննես Աբելյանի շրջիկ թատրոնում ներգրավվածությունը, հանդիպումը Հռոմի պապի հետ, ինչպես նաև շփումները ժամանակի մեծագույն արվեստագետների հետ։

 

«Կողբ» հիմնադրամի նպատակներից է նպաստել ինքնաճանաչմանը, ազգային մշակույթի ամրապնդմանը և զարգացմանը՝ ներկայացնելով մշակութային արժեքները բոլորին հասանելի և դիտարժան ձևաչափերով։

 

«Կոստան Զարյան 140» նախագիծը մեկնարկել է տարեսկզբին՝ Ազգային պատկերասրահում կայացած լայնամասշտաբ միջոցառմամբ, որտեղ իրենց հիշողություններով կիսվեցին մաեստրո Տիգրան Մանսուրյանը, Երվանդ Տեր-Խաչատրյանը, պատմաբան Վարդան Մատթէոսեանը, ինչպես նաև Կոստան Զարյանի թոռները՝ Արա և Անաիս Զարյանները։ Երեկոյի ընթացքում հնչեցին Տիգրան Մանսուրյանի երեք խմբերգեր՝ գրված Կոստան Զարյանի «Ասացվածքների» հիման վրա

և ներկայացված «Հովեր» երգչախմբի կատարմամբ։

 

Նախագիծը միավորում է արվեստի տարբեր ձևեր՝ կերպարվեստ, երաժշտություն, գրականություն և այլ մշակութային դրսևորումներ։ Այն ներառում է նաև բանախոսություններ, ցուցադրություններ, հարցազրույցներ և այլ նախաձեռնություններ՝ ուղղված մեծանուն գրողի ժառանգության հանրահռչակմանը։

 

Կոստան Զարյանի կենսագրության հիման վրա ստեղծված նկարազարդումների շարք է ներկայացվել Երևանի մետրոպոլիտենի «Երիտասարդական» կայարանում և Կոստան Զարյանի անվան թիվ 117 հիմնական դպրոցում։

 

Այս պահին ընթացքի մեջ է նաև Կոստան Զարյանի դիմաքանդակի կերտման գործընթացը

(քանդակագործ՝ Մկրտիչ Մազմանյան)։

 

«Կոստան Զարյան 140» նախագիծը շարունակվում է նոր նախաձեռնություններով՝ նպատակ ունենալով նորովի ներկայացնել և հանրահռչակել մեծ գրողի կերպարը։