Նոյեմբերի 24ին, Արամ Խաչատրյան համերգասրահում անցկացվելիք համերգ-հանդիսությունը նվիրված է աշխարհի ամենաերկարակյաց լարային քառյակի՝ Կոմիտասի անվան լեգենդար քառյակի հիմնադրման 100-ամյակին։ 

 

Համերգի ընթացքում հանդիսականները վերստին հնարավորություն կունենան ունկնդրելու քառյակի բարձրարվեստ կատարումները։

 

Կոմիտասի անվան ազգային քառյակին նվիրված երաժշտական ողջույններով հանդես կգան Հայաստանի պետական կամերային նվագախումբը, Արեգ Առուստամյան ջազ-տրիոն, Բարսեղ Թումանյանը, Հրաչուհի Բասենցը, դաշնակահար-դիրիժոր Վահագն Պապյանը, դաշնակահարուհի Կարին-Հելլման Գևորգյանը։

 

Կոմիտասի անվան քառյակն ստեղծվել է 1924թ. նոյեմբերին Մոսկվայի կոնսերվատորիայի ուսանողներ Ավետ Գաբրիելյանի, Լևոն  Օհանջանյանի, Միքայել Տերյանի և Սարգիս Ասլամազյանի նախաձեռնությամբ: 1925թ. հունվարի առաջին օրերին սկսել է իր կանոնավոր փորձերն ու պարապմունքները՝ պրոֆեսոր Ե. Մ. Գուզիկովի ղեկավարությամբ: Վերջինս կազմել է նորաստեղծ անսամբլի  կատարողական ծրագիրը՝ նախատեսված հունվարից մինչ ուսումնական տարեվերջ:   

 

Առաջին ստեղծագործությունը, որի վրա աշխատել են երիտասարդ երաժիշտները, Բեթհովենի N 1 կվարտետն էր․ դրա կատարման  նախապատրաստումը տևել է շուրջ  երկու ամիս: Առաջին ելույթը տեղի է ունեցել 1925 թ. մարտի 1-ին: 1932թ. մայիսին Հայկական ԽՍՀ կառավարությունը քառյակին շնորհել է Կոմիտասի անունը՝ դեռևս մեծ երգահանի կենդանության օրոք: