Այս մասին երեկ տեղեկացրել էր ABC MEDIA-ն՝ մանրամասնելով․

 

Արևելքից սահմանակից լինելով Թուրքիային և հարավից՝ Իրանին՝ Հայաստանը վերջին կես տասնամյակի ընթացքում զբոսաշրջության ոլորտում զգալի աճ է գրանցել․ գրում է The Street-ը։

 

Նշվում է, որ զբոսաշրջիկները մեծապես գալիս են  Ռուսաստանից և Իրանից, սակայն վերջերս նաև աճել է զբոսաշրջիկների թիվը Միացյալ Նահանգներից և այլ արևմտյան երկրներից։ Ամենատարածված ուղղություններից են երկրի մայրաքաղաք Երևանը, որը նաև կոչվում է «վարդագույն քաղաք»՝ իր բազմաթիվ շենքերի կառուցման համար օգտագործվող վարդագույն տուֆ քարի պատճառով։ Բացի այդ՝ զբոսաշրջիկները նաև ցանկանում են տեսնել բնության հրաշքները՝ Սևանա լիճը, Քարերի սիմֆոնիան։

 

Միևնույն ժամանակ՝ ԱՄՆ պետքարտուղարությունը թարմացրել է Հայաստանի վերաբերյալ ճանապարհորդական նախազգուշացումները՝ խորհուրդ տալով չայցելել սահմանամերձ շրջաններ։

 

Հայաստանը, ընդհանուր առմամբ, «երկրորդ մակարդակում» է և համարվում է անվտանգ երկիր զբոսաշրջիկների համար։ ԱՄՆ պետքարտուղարությունը պահպանել է «ավելի մեծ զգուշության» մակարդակը, որտեղ նաև ներառված են Ֆրանսիան, Իտալիան և Թաիլանդը: ԱՄՆ կառավարությունը վերահաստատել է, որ որոշ տարածքներ գտնվում են «ավելի մեծ ռիսկի» տակ:

 

Մասնավորապես, Ադրբեջանին սահմանակից շրջանները մտահոգության առարկա են, քանի որ «տարածաշրջանում կարող են հետագա ռազմական ակտիվություններ լինել»։ Պաշտոնական գործերի համար Հայաստանում գտնվող ամերիկացի քաղաքացիներին թույլատրված չէ մեկնել՝

 

• Գեղարքունիքի մարզ՝ Վարդենիսից արևելք,

 

• Սյունիքի մարզ՝ Գորիսից արևելք,

 

• Սյունիքի մարզ՝ Կապանից հարավ։

 

Անձնական նպատակներով ճանապարհորդողներին պարզապես խորհուրդ է տրվում խուսափել դրանցից: «Երասխ գյուղով երթևեկելը թույլատրվում է, կանգառը՝ ո՛չ»,- նշվել է օրեր առաջ   հրապարակված ճանապարհորդական խորհրդատվության մեջ:

 

Ինչպես նշվել է, անցյալում ռազմական գործողություններ են տեղի ունեցել հայ-ադրբեջանական սահմանի մոտ, և տարածքում կա զինված հակամարտության հավանականություն։

 

«Զգու՛յշ եղեք Հայաստանի և Ադրբեջանի սահմանի մոտ գտնվող ճանապարհներին: Ճանապարհի որոշ հատվածներ կարող են առանց նախազգուշացման հատել միջազգային սահմանները: Հսկիչ կետերը կարող են վերահսկել ճանապարհները, կամ իշխանությունները կարող են առանց նախազգուշացման փակել դրանք ճանապարհորդների համար։ ԱՄՆ դեսպանատունը թույլ չի տալիս դեսպանատան աշխատակիցներին և նրանց ընտանիքներին ոչ էական պատճառներով մեկնել սահմանային շրջան, ինչպես նաև այս ճանապարհորդական նախազգուշացման մեջ թվարկված Հայաստանի այլ տարածքներ»:

 

Ադրբեջանը, որը վերջին տարիներին նույնպես կտրուկ աճ է գրանցել արևմտյան երկրներից զբոսաշրջիկներ ընդունելու հարցում, նմանապես դասվում է «երկրորդ մակարդակի»։ Պետդեպն իր քաղաքացիներին խորհուրդ է տվել  «ցուցաբերել ավելի մեծ զգուշություն» ամբողջ երկրի համար և «չճանապարհորդել» Հայաստանին սահմանակից տարածքներում:

 

Իսկ այսօր նույն կայքի հրապարակումից տեղեկանում ենք, որ Գերմանիան էլ իր քաղաքացիներին կոչ է արել անհապաղ լքել Իրանը՝ տեղեկացնելով չվերթների հնարավոր դադարեցման մասին

 

Գերմանիայի Արտաքին գործերի նախարարությունն իր քաղաքացիներին կոչ է արել անհապաղ լքել Իրանը՝ խորհուրդ տալով խուսափել ցանկացած ոչ էական ուղևորությունից և նշելով Թեհրանի կողմից միջուկային պատժամիջոցների սրման պատճառով պատասխան գործողությունների ռիսկերը։

 

Գերմանական լրատվամիջոցները նաև զգուշացրել են, որ Գերմանիայի և Իրանի միջև չվերթները շուտով կարող են դադարեցվել, ինչը լրացուցիչ անորոշություն է ստեղծում երկրում դեռևս բնակվողների համար:

 

Ֆրանսիան, Գերմանիան և Միացյալ Թագավորությունն անցյալ ամիս գործի են դրել 2015 թվականի միջուկային համաձայնագրի և ՄԱԿ-ի Անվտանգության խորհրդի 2231 բանաձևի շրջանակներում Իրանի դեմ պատժամիջոցների վերականգնման մեխանիզմը: Այն թույլ է տալիս ավտոմատ վերականգնել պատժամիջոցները, եթե Իրանը խախտի իր պարտավորությունները:

 

Իրանին 30-օրյա ժամկետ է տրվել իր միջուկային գործունեությունը կարգավորելու համար: Եթե դա տեղի չունենա, միջազգային պատժամիջոցներն ավտոմատ կերպով կվերականգնվեն։

 

Թեհրանը Եվրոպայի քայլը որակել է անօրինական՝ զգուշացնելով, որ վերականգնման մեխանիզմի ակտիվացումը կարող է հակադարձ միջոցների դրդել և սրել տարածաշրջանային անկայունությունը։

 

Վերլուծաբանները նշում են, որ Գերմանիայի վերջին ճանապարհորդական ուղեցույցը արտացոլում է Եվրոպայի աճող մտահոգությունն Իրանի հետագծի վերաբերյալ, քանի որ դիվանագիտական լարվածությունը և պատժամիջոցների վերսկսման սպառնալիքը երկրին ավելի են մեկուսացնում համաշխարհային ասպարեզում։

 

Ըստ գերմանական ԶԼՄ-ների՝ սա տարիների ընթացքում ամենախիստ ճանապարհորդական նախազգուշացումն է։