Մեկ շաբաթ հետո Միացյալ Նահանգներում Կոնգրեսի միջանկյալ ընտրություններն են, իսկ հասարակական կարծիքի հարցումները ցույց են տալիս, որ նախագահ Դոնալդ Թրամփի վարկանիշն իջնում է: Վերջին՝ հոկտեմբերի 28-ին անցկացված հարցումների տվյալներով՝ իրենց պետության առաջնորդին աջակցում է ամերիկացիների 40%-ը, մինչդեռ ընդամենը մեկ շաբաթ առաջ՝ հոկտեմբերի 21-ին, նրան նախընտրելի նախագահ էր համարում 44%-ը: Թրամփի գործութնեության մասին բացասաբար է արտահայտվել հարցվածների 54%-ը:

 

Հարցումը 1500 չափահաս ամերիկացիների շրջանում անցկացվել է հոկտեմբերի 22-28-ին, իսկ սխալվելու հավանականությունը 3% է: 

 

ԱՄՆ-ի քաղաքական հեռանկարի համար հսկայական նշանակություն ունեն միջանկյալ կոնգրեսական ընտրությունները, որոնք նշանակված են նոյեմբերի 6-ին: Դրանց արդյունքները կազդեն ոչ միայն օրենսդրական որոշումների ընդունման վրա: Եթե այս ընտրություններից հետո Կոնգրեսում մեծամասնություն դառնա Դեմոկրատական կուսակցությունը, հնարավոր կլինի Թրամփի նկատմամբ պաշտոնաթողության գործընթաց սկսել: 

 

Երկու տարի առաջ իշխանության գալով աշխարհի հզորագույն երկրում՝ հանրապետական Դոնալդ Թրամփն իր վարչակազմը աստիճանաբար համալրեց ռազմատենչ պաշտոնյաներով, սկսեց դուրս գալ միջազգային կարևորագույն համաձայնագրերից, իսկ ամերիկյան զինվորականների համարյա կեսը հնարավոր է համարում, որ աշխարհում մեծ պատերազմ սկսվի արդեն եկող տարի:

 

Եթե ամերիկյան հասարակության 54%-ը (± 3%) հավանություն չի տալիս Թրամփի գործունեությանը, ամենայն հավանականությամբ՝ ձայն չի տա նաև նրա կուսակցությանը: Այդ դեպքում գուցե աշխարհն իրոք փրկվի՞ «մեծ պատերազմից»: Թեև ընտրությունները մի գործընթաց են, որի ելքը նախօրոք կանխատեսել չի լինում, թեև որոշ երկրներում էլ այն կանխորոշվում է՝ իշխանություններին հարմար թվեր «նկարելով»: