Դեռ ինչքա՞ն պետք է ադրբեջանցիները խախտեն հրադադարի ռեժիմն ու իր պետության սահմանները պաշտպանող հայեր սպանեն, կ ամ ուրիշ է՞լ ինչ պետք է անեն, որ  միջազգային տերությունները հասկանան՝ Արցախի խնդրիրը ձևական հռետորաբանությամբ լուծելի չէ՛:

 

ԵԱՀԿ Մինսկի խմբի ՌԴ համանախագահ Իգոր Պոպովը երեկ հայտարարել է, որ պետք է միջազգային դիտորդների թիվն ավելացնել յոթով: Պոպովի խոսքով՝  Հայաստանն ու Ադրբեջանը համաձայնել են այս հարցում: Դիտորդների թվի ավելացման պայմանավորվածությունը ձեռք էր բերվել  Վիեննայում՝ Հայաստանի և Ադրբեջանի ԱԳ նախարարների  համաձայնությամբ:

 

Փաստորեն դիտորդների թվի ավելացման մասին պահանջը նոր չէ, բայց արդեն մեկ տարի է՝ Բաքուն համաձայնություն չի տալիս անգամ այդ յոթի ավելացման համար: Հետաքրքիրն այն է, որ Պոպովի հայտարարությանն արձագանքելով՝ ՀՀ ԱԳՆ մամլո խոսնակն այդ յոթ  դիտորդի ավելացումը խորհրդանշական թիվ է համարել և իրատեսորեն նշել, որ դա էական ոչինչ չի կարող փոխել: Թիվը պետք է ավելի շատ լիներ, բայց Ադրբեջանը չի համաձայնում: Ավելին՝ անգամ որոշ մանրամասներ դեռ համաձայնեցվում են կողմերի հետ: Մանրամասները, ըստ ԱԳ մամլո խոսնակի, դիտորդների տեղակայումն ու անելիքների հստակեցնումն է: 

 

Ի՞նչ է սա տալու արցախյան հակամարտությանը: Ըստ մասնագետների՝ դա ձևական, ոչին չտվող քայլ է: Մինչ Պոպովի հայտարարությունը, արցախա-ադրբեջանական շփման գծում  դիտարկում էին անում 2-3 դիտորդ, որոնցից մեկի վրա անգամ Ադրբեջանը կրակել էր՝ իր առաքելությունն իրականացնելիս: Ավելին՝ նույնիսկ այսօր, երբ թեկուզ այս ձևական առաջարկի համար կա երկկողմ համաձայնություն, հողին ենք հանձնում երեկ Բաքվի կրակոցից զոհված մեր հերթական զինվորին: 

 

Այսքանից հետո  ի˜նչ տարբերություն՝ անզոր կամ դրածո 3, 7, թե՞ 17 դիտորդ կլինի:  

 

Անիմաստ ճամարտակումների փոխարեն  ԵԱՀԿ Մինսկի խումբը  գոնե հիմա պետք է Բաքվի թևերի տակից հանի  նաև ի՛ր տված «բարձերը», որոնք խավիարային դիվանագիտությամբ քաջալերում, սպառազինում են երեկ-մյուս օրվա խաշնարածներին, իսկ իրենք շարունակում են զբաղվել ուղղակի ժամավաճառությամբ ու աչքակապությամբ: Վաղուց արդենարդեն ժամանակն է՝ ճանաչել Արցախի անկախությանը և գործնականում ցույց տալ, որ եվրոպական ստանդարտները երկակի չեն կարող լինել: