Խորհրդարանի և ավագանու ընտրություններից հետո քաղաքական գործընթացները թևակոխում են համեմատաբար, հանգիստ, բայց պատասխանատու մի նոր փուլ: Ժողովրդի քվեն ստացած ուժերի աշխատանքը լակմուսի  թուղթ  կլինի հանրության համար: Սակայն ընտրական իրավիճակն ամբողջությամբ ավարտված չէ: Հայտնի է, որ Վանաձորում   ընդդիմությունն ի սկզբանե բոյկոտում է ավագանու նիստերը, որոնց սահմանադրականությունը  «Ելք» դաշինքի անդամ, ԼՀ-ի ներկայացուցիչ Քրիստ Մարուքյանը  վիճարկելու է  Սահմանադրական դատարանում:

Արդեն մի քանի ամիս է, որ  Քրիստ Մարուքյանը բարձրաձայնում է այդ մասին: Բայց ընդդիմադիր և ԱԺ չանցած ՀՎԿ-ն ու ԲՀԿ-ն դեռ լռում են: Հայտնի չէ՝ նրանք կմիանա՞ն  ԼՀ-ի պահանջին, թե՞ ոչ: Հիշեցնենք, որ 2016 թ. Վանաձորի քաղաքապետի ընտրություններում  վերոնշյալ կուսակցությունները համագործակցության  հուշագիր էին ստորագրել: Քանի որ  քաղաքապետի ընտրություններն առաջին փուլով չավարտվեցին, 2-րդ փուլում թվում էր՝ հաղթելու է ընդդիմադիր թեկնածու Քրիստ Մարուքյանը, բայց  ավագանու անդամների  քվեարկության արդյունքները ՀՀԿ-ական թեկնածու Մամիկոն  Ասլանյանի օգտին էին: 

Մինչ օրս բացահայտված չեն այն դավաճաններն ու ՀՎԿ-ի փոխնախագահ Հեղինե Բիշարյանի խոսքով՝ պոռնիկները, ովքեր խախտեցին համագործակցությունը: Կկարողանա՞ն ընդդիմադիրները Վանաձորի իրավիճակը վերջնականապես հանգուցալուծել հօգուտ իրենց, կտեսնենք, բայց սա հերթական առիթը կլինի ընդդիմադիրների սկզբունքայնությունը ստուգելու:   

Ընտրական մյուս իրավիճակն Արտաշատում է: ՀՀ նախկին վարչապետ Հովիկ Աբրահամյանի որդին վայր է  դրել քաղաքապետի լիազորությունները և «Ծառուկյան» դաշինքով դարձել  պատգամավոր:  Ըստ տեղեկությունների՝ Հանրապետական կուսակցությունը և Արարատի մարզպետ Արամայիս Գրիգորյանը քաղաքապետի պաշտոնում ցանկանում են առաջադրել Հովհաննես Ղազարյանին՝ Գազի Հովոյին, Իսկ Գագիկ Ծառուկյանն ու հատկապես Հովիկ Աբրահամյանը չեն ցանկանում կորցնել այդ «պոստը» և ուզում են առաջադրել փոխքաղաքապետ Գագիկ Պողոսյանին:  Չնայած խոսակցություններ էլ կան, որ  իշխանությունը քաղաքն ուզում է ազատագրել Աբրահամյանների ազդեցությունից: Միգուցե պատահական չէ, որ «Ծառուկյան» դաշինքի ղեկավար Գագիկ Ծառուկյանը, շրջանառվող լուրերի համաձայն, չի ցանկանում Հովիկ Աբրահամյանի հետ գործ ունենալ:

Այսօրինակ ասեկոսեներ շրջանառելն էլ, թերևս, ինքնանպատակ չէ: Հազիվ թե հիմնազուրկ լինեն խոսակցությունները, թե Հովիկ Աբրահամյանը շուտով նոր պաշտոն է ստանալու: ՈՒ որպեսզի պաշտոնյայի հետ մտերմությունը չստվերի «Ծառուկյան» դաշինքի որդեգրած ընդդիմադիրի կեցվածքը, խնամիները քաղաքական ապահարզանի պատրանք են ստեղծում:

Հավակնություններ դեռ չեն ներկայացրել «Ելք»-ն ու ՀՅԴ-ն: Վերջինս հազիվ թե կոալիցիոն գործընկերոջ դեմ դուրս գա, չնայած  դաշնակցությունը հիմա  ռեսուրս էլ շատ չունի:  Դեռևս լռում է նաև «Ելք»-ը: Բայց եթե  դաշինքն իրեն համարում է նոր որակի ընդդիմություն, հաջողություններ է գրանցում ԱԺ-ի և Երևանի ավագանու ընտրություններում, ապա այս հարցում էլ պետք է ելք գտնի կամ գոնե՝ ելք առաջարկի: Հատկապես, որ քաղաքը հարազատ է Արարատում բնակվող  «Ելք»-ի անդամ Արամ Զավենի Սարգսյանին:

Վանաձորում և Արտաշատում տեղի ունենալիք գործընթացները նաև ցույց կտան, թե  ինչքանով են ընդդիմադիրները պատրաստ  իրենց ամբիցիաները մի կողմ թողնելու և միավորվելու, հատկապես ԱԺ-ի ու ավագանու ընտրություններից հետո, երբ  խոսվում էր իշխանության կողմից ամեն գնով սեփական իշխանությունը պահելու մասին: