Այսօրվա Ազգ-բանակ համաժողովում պաշտպանության նախարար Վիգեն Սարգսյանը ներկայացրել է առաջնագծում զինվորական ծառայության, ինչպես նաև բանակի սպայակազմի համալրման այլընտրանքային մոդելներ, որոնք պետք է հանրային հարթակում քննարկվեն:  Առաջին մոդելը  ենթադրում է ծառայության ժամկետի երկարաձգում՝  2-ի փոխարեն 3 տարի, բայց մարտական հերթապահության պայմաններում: 

Առանձնահատկությունն այն է, որ մոդելը ենթադրում է վճարովի ծառայություն: Իհարկե՝ որոշակի պայմաններով, որոնք պետությունն առաջադրում է զինվորին: Ընդ որում՝ միանգամայն ընդունելի պայմաններ:

Երկրորդ մոդելն առնչվում է բուհական տարկետման իրավունքին: Առաջարկվում է այդ իրավունքը դարձնել թե՛ կրթության, թե՛ նաև զինվորական ծառայության առավել արդյունավետ տարբերակ: Այսինքն, սովորելով բուհում՝ ուսանողները յուրաքանչյուր շաբաթ օր, Վազգեն Սարգսյանի անվան ռազմական համալսարանում այցելում են զինվորական պատրաստության դասընթաց:

 

Նախարարի առաջարկած մոդելներն իրոք հեղափոխական են: Ավելին՝ ինչ-որ  չափով  դրանք կփոխեն Հայաստանի անվտանգության այսպես ասած սոցիալական հենքը ու նաև գրավիչ կդարձնեն զինվորական ծառայությունը: Ի վերջո, պատերազմող երկրին ժամանակին համահունչ նորամուծություններն անհրաժեշտ են: Բացի այդ՝ բուհ  ընդունվող, ապա ասպիրանտուրայով բանակից  խուսափածներին հնարավորություն է տրվում  ձեռք բերելու զինվորական  կրթություն, որը,  ծառայեցնելով երկրի պաշտպանությանը՝ վարձատրվում է: Այս մոդելներով նա  ինչ-որ չափով գործազրկության խնդիրը կմեղմվի. Հատկապես՝ սահմանամերձ շրջաններում:

 

Բացի այդ՝ կարծես թե փորձում են մեղմել այն դժգոհությունը, որն առկա է բանակից խուսափածների հանդեպ, ինչպես նաև «միայն  չունևորներն են սահմանը պահում» արդարացի ընդվզումներ: դժգոհությունները: Երրորդ՝  նոր Սահմանադրությամբ պաշտպանության նախարարը  վարչապետից հետո դառնում է 2-րդ   կարևոր դեմքը երկրի անվտանգության պաշտպանության համար: Ասել է թե՝ ոլորտի  առաջընթացի ու զարգացման պատասխանատվության  ավելացում է նկատելի:

 

Թե հանրային շրջանակներն ինչպես կընդունեն այս առաջարկները, ինչ կավելացնեն, կպակասեցնեն՝ ընթացքում պարզ կլինի: Բայց   ապրիլյան պատերազմից  հետո պարզ դարձավ, որ մեր անվտանգության համակարգն արդիականացման կարիք ունի՝ հետագա մարտահրավերներին դիմակայելու համար: