Ընտրովի մարմինների դռները բախող մեր շատ հայրենակիցներ այնքան խոստումներ են շռայլում նախընտրական մարաթոնում, որ դրանց թեկուզ չնչին մասն իրագործելու պարագայում բոլորովին այլ կլիներ երկրի ընթացքը, պետության վարկանիշը: Այդ թեկնածուներից ոմանք, սակայն, պարզվում է՝ տաքուկ աթոռ ձեռք գցելուց հետո ոչ միայն կորամեջք շռայլած խոստումներն են մոռանում, այլև՝ իրենց համար զօրուգիշեր աշխատած թիմակիցների վարձավճարները, որի մասին պայմանավորվել էին նախապես:

 

Արդեն մեկ տարուց ավելի իր անունը մոռացության ժանգով պատած «Ալյանս» կուսակցության բազմաթիվ անդամներ հեռացել են այդ միավորից, սակայն վիրավորված արժանապատվությունը, խաբված չմնալու սկզբունքայնությունը նրանց մղել է իրենց երբեմնի կուսառաջնորդին ևս մեկ անգամ հիշեցնել իր իսկ խանդավառ խոստումների մասին: Արդյունքը հերթական հիասթափությունն էր: Եվ ահա նրանք բաց նամակով վերստին դիմում են ՀՀ ԱԺ պատգամավոր Տիգրան ՈՒրիխանյանին՝ նաև հանրությանը տեղեկացնելով վերջինիս անվայել պահվածքի մասին:

 

Պատասխան հայտարարություն

 

Անդրադառնալով մեր կողմից 15.05.2018թ., արված հայտարարության «Ալյանս» կուսակցության արձագանքին, անհրաժեշտ ենք համարում մեր նախկին քաղաքական թիմակիցներին և ի լուր ամենքի, նորից հիշեցնել, որ մենք՝ վարչության մի խումբ անդամներս, Գյումրու ամբողջ կառույցի և մեր թիմակիցների հետ միասին, հեռացել ենք կուսակցությունից՝ ելնելով նրանում տիրող անարժանապատիվ, անարդար ու անազնիվ մթնոլորտից…

 

Եվ, որպես մեկնաբանություն, բացում ենք որոշ փակագծեր՝ նաև հարցադրումների տեսքով՝

 

1. «Ալյանս»-ում տիրող անարժանապատիվ, անարդար ու անազնիվ մթնոլորտը ստեղծվել է բացառապես կուսակցության նախագահ Տիգրան Ուրիխանյանի կողմից՝ միտումնավոր կերպով, և դրա հետ առչնություն չունեն մեր նախկին կուսակիցները:

 

2. Ինչո՞ւ է «Ալյանս» կուսակցության դե ֆակտո նախագահ Տիգրան Ուրիխանյանը խուսափում հանդիպել 2016 թվականի Գյումրու ՏԻՄ ընտրությունների ժամանակ և 2017 ԱԺ ընտրությունների իր նախընտրական շտաբներում աշխատած և խոստացված վարձատրությունները պահանջող անձանց հետ:

 

3. 2017 թվականի խորհրդարանական ընտրություններից հետո, երբ Տիգրան Ուրիխանյանը դարձավ ԱԺ պատգամավոր, կուսակցությունը մատնեց անգործության՝ հայտարարելով որ ինքն այլևս կապ չունի դրա հետ:

 

4. Ինչո՞ւ է կուսակցության գրասենյակի տարածքը վերածվել դե ֆակտո Տիգրան Ուրիխանյանին պատկանող ավտոմեքենաների վարձույթի սրահի՝ «Էկոնոմ սերվիս» անվանումով:

5. 2017 թվականից առ այսօր վարչության  քանի՞ նիստ է գումարվել, որտե՞ղ և ե՞րբ:

 

6. Քանի՞ քաղաքական հայտարարություն է տարածվել, և ո՞վ է դրանց որոշումը կայացրել:

 

Անձամբ Տիգրան Ուրիխանյանից պահանջում ենք գալ բաց հանդիպման՝ իրեն ուղղված  վրդովմունքները բարձրաձայնող, պահանջներ ներկայացնող և նրան վստահության քվե ապահոված մարդկանց հետ, ինչպես նաև չբարձրաձայնված այլ հարցերի շուրջ բացատրություն տալու: 

Վստահ ենք, որ նույնիսկ «Բարգավաճ Հայաստան» կուսակցությունում և «Ծառուկյան» խմբակցությունում շատերը չգիտեն նրա անպարտաճանաչության և անարդար գործելաոճի մասին: