Իշխանության դեմ ընդվզումների նախորդ փորձերի արդյունքներն այսօր ոմանց տագնապ, ոմանց զարմանք են ներշնչում՝ շրջանցել տալով կարևոր մի հանգամանք. նախկինում ցուցարարների կողմից երբեք այսքան հանդուրժողականության, թշնամանքից զերծ մնալու կոչեր չեն հնչել:

 

Նախկինում բուն ասելիքը ավելի շատ հրահրանքի տեսքով է հնչել, իհարկե՝ ի պատասխան իշխանությունների կոշտ արձագանքի: Այսօր փոխադարձ զսպվածությունը կարծես հուշում է, որ ժողովրդի ձայնն արհամարհելու նկրտումը տեղի է տվել: Հավաստիքը վերջին մեկ-երկու շաբաթվա իրողություններն են, որոնք առանց խեղաթյուրումների հասանելի դարձան համայն հայությանն ու աշխարհին՝ շնորհիվ լրատվամիջոցների արհեստավարժ գործունեության: Իսկապես, այս ընթացքը լուսաբանել, այլ ոչ թե մեկնաբանել էր պետք՝ մանավանդ միակողմանի փնովանք-գովեստներով: 

 

Մինչ համայն հայությունն ու հայաստանյան իրավիճակով հետաքրքրված երկրները սպասում են մայիսի 1-ին կայանալիք նիստին, խորհրդարանական քաղուժերը քննարկում են իրենց դերակատարությունը՝ վարչապետի քվեարկությանը: 

 

«Ելք»-ի դիրքորոշումն ի սկզբանե հստակ է: Զգացվում է, որ ՀՀԿ-ն ևս ջանում է որշում կայացնել՝ ստեղծված իրավիճակի ճիշտ հանգուցալուծմանը նպաստելու: Համենայնդեպս՝ կուսակցության վերնախավի վերջին օրերի կեցվածը դա է հուշում: Հավելումն՝  այսօր առավոտյան «Ազատություն» ռադիոկայանի հետ զրույցում ՀՀԿ գործադիր մարմնի անդամ, արդարադատության նախարարի պաշտոնակատար Դավիթ Հարությունյանի պարզաբանումը, որ Հանրապետական կուսակցությունը դեռ վերջնական որոշում չունի՝ արդյոք առաջադրելո՞ւ է վարչապետի թեկնածու, թե՞ ոչ:

 

- Ինքնանպատակը չի վարչապետ առաջադրել, ինքնանպատակն է երկիրը մղել առաջ՝ օգտագործելով ստեղծված իրավիճակը: Ցանկացած նման ճգնաժամային իրավիճակ նաև նոր հնարավորությունների ճանապարհ է բացում: Այնպես որ, լավագույն ձևով օգտագործելը այս իրավիճակը Հայաստանի համար՝ սա, կարծում եմ, ամենակարևոր խնդիրն է: Եվ դա է պատճառը, որ մենք այս պահին չենք առանձնացնում մի խնդիրը մյուսից: Այդ խնդիրները իրականում համարում ենք քաղաքական օրակարգի մաս:

 

Ավելին, նա նշել է՝ «Եթե խոսքը վերաբերում է խաղաղ ցույցերին, ուժային լուծումները ես ուղղակի իսպառ բացառում եմ» և ընդգծել, որ քաղաքական ճգնաժամից ելքը տեսնում է միայն քաղաքական եղանակով, քաղաքական շրջանակներում: 

 

Ստացվում է՝ միայն Կարեն Կարապետյա՞նն է ձգտում հաստատվել վարչապետի պաշտոնում: Իհարկե՝ ոչ: Եվ սխալվում են բոլոր նրանք, ովքեր կարծում են, թե այս աթոռի հավակնություններ միայն ՀՀԿ-ն ունի:

 

«Ծառուկյան» դաշինքն, ինչպես ասում են՝ «5 պակաս» առաջ համախոհություն հայտնեց շարժմանը, իսկ ՀՅԴ-ն «5 րոպե անց» լքեց այն նույն կոալիցիան, որում ընդգրկվելու համար դեռ մեկ տարի առաջ եռանդ չէր խնայում: Այսքանով հանդերձ՝ խորհրդարանական այս երկու ուժերն էլ դեռևս դիրքորոշում չեն արտահայտել՝ մայիսի 1-ին կայանալիք քվեարկության մասին: Նրանց պահվածքի առնչությամբ երկու տեսակետ կա, երկուսն էլ՝ միանգամայն տրամաբանական. կա՛մ իրենց ներկայացուցչին այդ աթոռին տեսնելու հավանականությունն է նրանց հապաղելու պատճառը, կա՛մ՝ իրենց ձայները հնարավորինս «թանկ» «նվիրաբերելու» հեռահար հաշվարկը: Թերևս՝ ավելի ծանր է հավանականության վերջին նժարը:

 

Այսպես թե այնպես, ինչպես ՀՀ նախագահ Ա. Սարգսյանն է նշել՝ պիտի ձգտել ստեղծված իրավիճակում տրամաբանական և ողջամիտ հանգուցալուծման հասնելուն: Իրավիճակը պետք է հանգուցալուծվի ոչ թե ի հեճուկս այս կամ այն խմբի, այլ՝ հանուն Հայաստանը չծվատելու: Իսկ որ այդպիսի նկրտումներ արդեն իսկ ցուցաբերում են դրսեկ որոշ ուժեր՝ ակնհայտ է: