«Ծառուկյան» դաշինքը շարունակում է պնդել, որ գազի և բենզինի ոլորտի մասին սենսացիոն բացահայտումներ կանեն, եթե  իրենց հնարավորություն տան ժամանակավոր կամ քննիչ հանձնաժողով ստեղծել: Պատրա՞ստ է դրան իշխանությունը, թե ոչ՝ պարզվեց ԱԺ-ում այսօրվա ճեպազրույցներում: ՀՀԿ խմբակցության ղեկավար Վահրամ Բաղդասարյանը կարծում է, որ նման առաջարկ անողները հազիվ թե դրանից շահեն: Այդուհանդերձ՝ իշխանությունը սպասում է դաշինքի պատգամավորների առաջարկին:

 

Իսկ «Ծառուկյան»-ցիների պնդումը պատահական չէ, քանի որ իշխանությունը, ի դեմս ՊԵԿ-ի, շարունակում է ստուգումներն  «Առինջ Մոլ» առևտրի կենտրոնում, որը պատկանում է Գագիկ Ծառուկյանին: 

 

«Ծառուկյան» դաշինքի կոշտ քննադատություններից հետո հնարավո՞ր է, որ ՀՀԿ-ն նորից նիստ հրավիրի և ստուգի դաշինքի ղեկավար Գագիկ Ծառուկյանի հարկերը: ՀՀԿ-ականի խոսքով՝ ինքը դեմ է որևէ մեկին առանձնացնելու և միայն նրա հարկերը ստուգելուն: Դաշտը հավասար պետք է լինի բոլորի համար.

 

- Ես ցանկություն չունեմ ուրիշի ունեցվածքը հաշվել, բայց մեր երկրում բոլորը պետք է լինեն հավասար:

 

Ճեպազրույցների ժամանակ հարց հնչեց «Ծառուկյան» խմբակցության ակտիվության և ՀՀԿ-ի պասիվության մասին, որը չպաշտպանեց վարչապետ Կարեն Կարապետյանին: 

 

- Մենք որևէ քաղաքական ուժի ներքին գործերին չենք խառնվում, և դա ընդունելի չեմ համարում: Բյուջե է քննարկվում, և ընդդիմադիրները պետք է իրենց կեցվածքը դրսևորեն: Այլ խնդիր է, թե ինչքանով են օբյեկտիվ և օբյեկտիվ չեն,- ասաց ՀՀԿ խմբակցության ղեկավարը: 

 

Ինչ վերաբերում է ՀՀԿ-ի կողմից վարչապետ Կարեն Կարապետյանին չպաշտպանելուն, Վահրամ Բաղդասարյանն ասաց, թե ինքը որևէ որևիցե բյուջեի քննարկում չի հիշում, որ վարչապետին պաշտպանող  ելույթներ եղած լինեն. 

 

- Նորից  ենք ասում՝ այս բյուջեն իրատեսական է, որևէ ճոխ բան նկարագրված չէ: Սա հիմք է ստեղծում և հեռանկար՝ ապագա զարգացման համար: Բյուջեն ներկայացրել է կառավարությունը, դա թիմային բյուջե է:

 

Ի դեպ, Վանաձորի քաղաքապետ Մամիկոն Ասլանյանն այսօր հայտարարել է, որ ՀՎԿ-ի հետ համագործակցության հուշագիր են ստորագրել: Դա նշանակում է, որ ՀՎԿ-ի անդամները կմասնակցեն Վանաձորի ավագանու նիստերին: «Ելք» դաշինքի ղեկավար Նիկոլ Փաշինյանը ՀՎԿ-ի այս քայլը որակել է որպես դիակի վերակենդանացման  փորձ, իսկ ՀՀԿ-ին՝ քնած դշխուհի, որին ՀՎԿ-ն իր համբույրներով ուզում է ուշքի բերել:  Վահրամ Բաղդասարյանը ուշագրավ պատասխան է տալիս.

 

- Բոյկոտները հավերժական չեն լինում: Համբերեք մինչև իրադարձությունների զարգացումը: Ինձ թվում է, որ նաև մյուս երկու քաղաքական ուժերը արդեն իսկ պետք է մասնակցեն ավագանու նիստերին:

 

ԲՀԿ-ն ու «Լուսավոր Հայաստանը», սակայն դեռ որևէ հայտարարություն չեն արել: