«Վրաստանն ինքնամեկուսանում է»
ԱՄՆ ՊԵՏԴԵՊԻ ՆԱԽԿԻՆ ՊԱՇՏՈՆՅԱ ԴԵՆԻԵԼ ՖՐԻԴԻ ՄԵԿՆԱԲԱՆՈՒԹՅՈՒՆԸ
Ամերիկացի դիվանագետ, ԱՄՆ Պետդեպարտամենտի նախկին բարձրաստիճան պաշտոնյա և Ատլանտյան խորհրդի (ամերիկյան վերլուծական կենտրոն) ավագ գիտաշխատող Դենիել Ֆրիդը «Ամերիկայի ձայնին» տված հարցազրույցում հայտարարել է, որ Վրաստանն ինքնամեկուսանում է, և տեղական իշխանությունը հիանալի գիտի, թե որն է երկրի խնդիրը դեպի Եվրամիություն ճանապարհին:
Դանիել Ֆրիդ. - Ես բազմիցս ասել եմ, որ Վրաստանն ունի Մոսկվայի նկատմամբ զգուշավոր քաղաքականություն վարելու բոլոր իրավունքները։ Երբեք չեմ ասել, որ Վրաստանը պետք է դառնա Ուկրաինային զենք մատակարարող։ Ես հասկանում եմ Վրաստանի խոցելիությունը, բայց խնդիրն այն է, թե արդյոք Վրաստանի կառավարությունը փորձում է անել այն, ինչ անում է, օրինակ՝ Մոլդովան՝ նվազեցնել իր խոցելիությունը, իր կախվածությունը Ռուսաստանից, մինչ նա ագրեսիվ պատերազմ է վարում: Վրաստանը կարծես ճիշտ հակառակն է անում՝ ամրապնդելով կապերը Ռուսաստանի հետ։ Իսկ Մոլդովան նման բան չի անում։
Ես չեմ հասկանում, թե ինչպես է իրեն պահում Վրաստանը։ Փաստացի իրեն ավելի խոցելի է դարձնում ռուսական ճնշման նկատմամբ, քանի որ ինքն իրեն մեկուսացնում է երկարամյա ընկերներից: Ամերիկան չի քննադատում Վրաստանին Ռուսաստանի հետ հարաբերություններում զգուշավոր լինելու կամ ԱՊՀ անդամ լինելու կամ չլինելու համար։ Խնդիրն այն է, որ վրացական իշխանությունը հասել է այն կետին, որտեղ այժմ գտնվում է՝ ավտորիտար բնույթի սեփական գործողությունների և հասարակության մեջ հակասություններ առաջացնող հարցերի օգտագործման արդյունքում և դա այն բանի համար, որպեսզի առաջ մղի իր ավտորիտար օրակարգը և կարևոր սոցիալական կամ քաղաքական հարցերի շուրջ կանգնի Մոսկվայի կողքին:
Վրաստանի կառավարության պարզաբանումները չեն օգնի։ Նա հիանալի գիտի, թե որն է իր խնդիրը դեպի ԵՄ ճանապարհին։ Իր իսկ գործողություններն են։ Այո, Մոլդովայի աշխարհագրական դիրքն ավելի բարենպաստ է, քան Վրաստանինը։ Սակայն Վրաստանի կառավարությունն, անշուշտ, ունի ընտրություն, մանևրելու տեղ, և նա համեմատաբար վատ ընտրություն է կատարում: Հույս ունեմ, որ կկայացնի լավագույն որոշումը:
