«Միխեիլ Սաակաշվիլին փաստացի գտնվում է ծայրահեղ ծանր վիճակում։ Ջերմաստիճանը 38 է, ճնշումը՝ 170, չի կարող ուտել, դեղ խմել, անընդհատ անկողնում է»,- ասում է Պետական անվտանգության ծառայության նախկին ղեկավար, «Միացյալ ազգային շարժում» [ստեղծվել է Միխեիլ Սաակաշվիլիի կողմից] կուսակցության պատգամավոր Թեմուր Ջանաշիան։ Ջանաշիան Վրաստանի երրորդ նախագահին այցելել է «Վիվամեդ» կլինիկայում, որտեղ Սաակաշվիլին բուժում է ստանում (տեղեկացնում է JAMnews-ը)։

 

- Ուսումնասիրությունները մատնանշում են բոլոր «կենսական նշանների» սուր պակաս, դա չի կարող լինել նորմալ մարդու մոտ, եթե նա առողջ է,- ասաց ամերիկացի բժիշկ և փորձագետ Շահեն Լահանը հոկտեմբերի 5-ին Սաակաշվիլիին հիվանդանոցում այցելելուց հետո:

 

Ինքը՝ «Վիվամեդ» կլինիկան պնդում է, որ թեև Սաակաշվիլին բարձր ջերմություն և ճնշում ունի, սակայն նրա վիճակը կայուն է։

 

Սաակաշվիլիին այցելել է նաև նրա փաստաբան Մասիմո Դանջելոն։ Նա նաև կարծում է, որ Վրաստանի նախկին նախագահի առողջական վիճակը զգալիորեն վատացել է։

 

- Նրա կենսական նշանները եզրին են, որից հետո մենք կհայտնվենք կոլապսի մեջ։ Ես նկատի ունեմ հնարավոր մահացու ելքը,- ասաց Դանջելոն:

 

- Մեզ հայտնի դարձավ, որ նախագահ Սաակաշվիլին ուշաթափվել է երեկվա միջադեպից հետո առաջացած բարձր ճնշման պատճառով, երբ դատախազության ներկայացուցիչները ներխուժել են նրա սենյակ և փորձել այնտեղ դատական նիստ անցկացնել։ Սաակաշվիլին առաջին անգամը չէ, որ կորցնում է գիտակցությունը։ Մենք բոլորս լավ ենք հիշում բազմաթիվ դեպքեր, երբ նա ուշագնաց է եղել բուռն գրգռվածության և շոկի հետևանքով, որն առաջացել է նրա սենյակ մարդկանց հանկարծակի այցելությունների պատճառով։

 

Նշենք, որ ամերիկացի փորձագետ, Նոբելյան մրցանակակիր դոկտոր Ջեյմս Քոբը չի կարողացել մտնել Սաակաշվիլիի մոտ՝ իբր անհրաժեշտ փաստաթղթերի բացակայության պատճառով։ Այնուամենայնիվ, Սաակաշվիլիի մեկ այլ փաստաբան Շալվա Խաչապուրիձեի խոսքով՝ ամերիկացի բժշկին կթույլատրեն տեսակցել Միխեիլ Սաակաշվիլիին:

 

Նոբելյան մրցանակի դափնեկիր, դատական փորձագետ Ջեյմս Քոբը հոկտեմբերի 3-ին ժամանել է Վրաստան՝ մասնակցելու Վրաստանի երրորդ նախագահ Միխեիլ Սաակաշվիլիի վիճակի գնահատմանը։ Վրաստանի առողջապահության նախարարությունը պնդում էր, որ Ջեյմս Քոբի գործունեությունը հաստատող փաստաթղթեր չեն ներկայացվել։ Դրա պատճառով Մասնագիտական զարգացման խորհուրդը չի բավարարել բժշկի խնդրանքը՝ աշխատանքներում ընդգրկվելու վերաբերյալ։ Սակայն դրանից հետո անհրաժեշտ փաստաթղթերը տրամադրվել են Empathy կենտրոնի կողմից։ «Ազգային շարժման» անդամները պահանջել են Ջեյմս Քոբին ընդգրկել աշխատանքներում և հանրահավաք են անցկացրել առողջապահության նախարարության մոտ։

 

- Պարոն Քոբն արդեն մի քանի օր է, ինչ համբերատար փորձում է թույլտվություն ստանալ: Այս հարգված մարդը՝ աշխարհում շատ հայտնի բժիշկը, նստած սպասում է թույլտվության։ Գործընթացն արագացնելու համար մենք որոշել ենք տրամադրել անհրաժեշտ փաստաթղթերը։ Ուստի պարոն Քոբը հետաձգեց իր թռիչքը և կմնա Վրաստանում մինչև նախկին նախագահի հետ հանդիպումը,- ասել է Մասիմո Դանջելոն։

 

Վրաստանի հանրային պաշտպանի մասնակցությամբ այս տարվա ապրիլին կայացած խորհրդակցության համաձայն՝ Վրաստանի բանտարկված նախկին նախագահ Միխեիլ Սաակաշվիլիի առողջական վիճակը զգալիորեն վատացել էր։ Ընտանիքը խնդրում էր նրան տեղափոխել արտերկիր՝ բուժման նպատակով։

 

Վրաստանում ԱՄՆ դեսպան Քելի Դեգնանը Վրաստանի կառավարությանը կոչ էր արել լրջորեն վերաբերվել Օմբուդսմենի առաջարկություններին:

 

Միխեիլ Սաակաշվիլին արդեն մեկ տարի է, ինչ բանտում է։ Նախկին նախագահը ձերբակալվել է այն բանից հետո, երբ նա գաղտնի վերադարձավ Վրաստան 2021 թվականի հոկտեմբերի 1-ին։

 

Վրաստանի նախկին նախագահը գտնվել է Ռուսթավի քաղաքի 12-րդ ուղղիչ գաղութում։ Միխեիլ Սաակաշվիլին իրեն քաղբանտարկյալ է համարում, ինչի պատճառով էլ ի նշան բողոքի երկու անգամ հացադուլ է հայտարարել։ Առաջին հացադուլը տևել է 51 օր։

 

Հետո Միխեիլ Սաակաշվիլիի առողջական վիճակը այնքան է վատացել, որ նա լուրջ բուժման կարիք է ունեցել։ Սկզբում նրան տեղափոխել են Գորիի զինվորական հոսպիտալ, այնուհետև՝ «Վիվամեդ» կլինիկա, որտեղ էլ գտնվում է մինչ օրս։

 

Մինչդեռ Ստրասբուրգի Մարդու իրավունքների դատարանը նոյեմբերի 10-ի որոշմամբ Միխեիլ Սաակաշվիլիին կոչ է արել դադարեցնել հացադուլը՝ Վրաստանի իշխանություններից պահանջելով ապահովել բանտարկյալի անվտանգությունն ու նրա նկատմամբ պատշաճ վերաբերմունքը։