Փհենյանում տեղի ունեցած միջկորեական գագաթնաժողովի հայտարարությունն ազդարարում է, որ Կորեական թերակղզու զույգ պետությունների ղեկավարները որոշել են  հենց այս տարվանից սկսել երկու երկրների երկաթուղային և ավտոմոբիլային ճանապարհները իրենց անջատող արգելագոտու տարածքում միացնելու աշխատանքները:

 

Տվյալ նախագծի վերջնական նպատակն է Անդրկորեական մայրուղին դուրս բերել Անդրսիբիրյան մայրուղի և ծառայեցնել բեռները ԿԺԴՀ-ի և Ռուսաստանի տարածքով Եվրապա հասցնելուն (հաղորդում է «ՌԻԱ-նովոստի»-ն):

 

Հյուսիսային Կորեայի ղեկավարը նաև խոստացել է փակել Թոնչհանի հրթիռային զինանոցը և ամբողջովին կազմաքանդել Յոնբերի միջուկային ձեռնարկությունները: Ընդ որում, այդ աշխատանքները պետք է կատարվեն արտասահմանյան մասնագետների դիտարկման ներքո: Այնուհետև, առկա լարվածությունը թուլացնելու նպատակով պետք է ստեղծվի համատեղ ռազմական հանձնաժողով՝ կազմված երկու երկրների ռազմական հրամանատարությունից, որի գործը պետք է լինի  սահմանագծի ռազմազերծված գոտին վերածել «խաղաղության ու բարգավարման գոտու»:

 

Գագաթնաժողովի ժամանակ նաև պայմանավորվածություն է ձեռք բերվել, որ կորեական երկու պետությունների ղեկավարները շուտով հայտ կներկայացնեն 2032թ. Օլիմպիական ամառային խաղերը համատեղ անցկացնելու համար, իսկ առաջիկա՝ 2020թ. ամառային Օլիմպիադային միասնական անձնակազմ կուղարկեն: 

 

Եթե ամեն ինչ այս ոգով շարունակվի, երևի շուտով կսկսի ապաքինվել այն խոցը, որը նույն ազգի երկու հատվածներին հարկադրում էր տասնամյակներ շարունակ իրար հետ հարաբերվել պատերազմի ու թշնամանքի մթնոլորտում: Թեև երեք տասնամյակ է՝ աշխարհը կապիտալիստական ու սոցիալիստական «ճամբարների» բաժանելու խորհրդային գործալակերպը ավարտվել է, սակայն դրա հետևանքները դեռևս առկա են: Կորեական թերակղզու միավորումը, եթե աշխարհին նման բարեբախտություն բաժին հասնի, թերևս դառնա այդ անիմաստ բաժանման վերջին ակորդներից մեկը: