- Ինչո՞ւ   անվարձահատույց աշխատել պատգամավորների համար: Եթե պետք է, թող իրենք գան ու դիմեն մեզ… 

 

Այսպիսի դժգոհություններ կային այսօր  խորհրդարանում՝ այսպես կոչված ուղեղային կենտրոնի  առնչությամբ: «Ավանգարդ»-ը գրել էր, որ արտաքին հարաբերությունների հարցերի մշտական հանձնաժողովը ցանկանում է խորհրդին կից հասարակական՝ անվճար հիմունքով գործող անալիտիկ խորհուրդ ձևավորել՝ ներգրավելով լավագույն մասնագետների: Դրական կարծիքներն էլ հնչեցին: Օրինակ,  ԱԱԾ պետի նախկին պաշտոնակատար Դավիթ Շահնազարյանը խորհրդարանական դիվանագիտության ներուժն օգտագործելու անհրաժեշտություն է տեսնում:  

 

Ձևավորվող խորհրդի  վերլուծաբանների դժգոհությունները, հարկավ, արդարացի են՝ տարիների  փորձը  հիմք ընդունելով: Դիցուք, Երևանի ավագանին  հասարակական հիմունքով է աշխատում, և տեսնում ենք պտուղները՝ կամ  միայն հլու-հնազանդ ձեռք են բարձրացնում, կամ էլ չհիմնավորված, երբեմն էլ քաղաքական ինչ-ինչ նկատառումներով դեմ քվեարկում ու աղմկում: Այդ պատճառով էլ «Ելք» դաշինքն ավագանու անդամների վարձատրության հարցն է առաջ քաշելու:

 

Հասարակական հիմունքով մյուս կառույցը Հանրային խորհուրդն է:  Տարվա  մեջ մի քանի անգամ հայտարարություն, 1-2 նիստ և վերջ: Աշխատանքն ավարտված է, արդյունքը՝ ակնառու (եթե այդ ակնառուն աշխատանքի արդյունք կարելի է համարել): 

 

Վերլուծաբանների  դժգոհության փաստարկն այն է, թե ինչո՞ւ պետք է օրենսդիր մարմնում միայն կոճակ սեղմելու համար ավելի քան 600 հազար դրամ աշխատավարձ ստանան, տարիներով բացակայեն խորհրդարանից՝ զբաղեցնելով արժանավորի տեղը, իսկ  իրենք իրենց ներուժն ու միտքն անվճար նվիրաբերեն: Ասել, թե պետբյուջեն իսպառ անվճարունակ է՝ այնքան էլ ճիշտ չէ, քանի որ Կառավարության վերջին օպտիմալացումներից գոյացած խնայողությամբ կարելի էր խորհրդի անդամների վճարումն ապահովել: 

 

Եթե դատախազներին ու քննիչներին միաժամանակ և՛ բարձր թոշակ, և՛ աշխատավարձ վճարելու համար գումար կա, ուրեմն այս խորհրդի  համար ևս ֆինանսական միջոցներ կգտնվեն: Տարբերակներից  մեկն էլ «ուղեղային կենտրոնի» վերլուծաբաններին ԱԳՆ-ում աշխատանքի տեղավորելն է: Բայց, ինչպես ժողովուրդն է ասում՝ մեդրալը հակառակ կողմ էլ ունի: Նախ՝ ԱԺ-ի այս հարթակը կարող  է արտահայտվելու լավագույն ամբիոն դառնալ ու, ինչու չէ, հետագայում պետական ապարատում տեղ ունենալու համար: Առավելևս, որ  երիտասարդ վերլուծաբանների ներգրավումը ևս հնարավոր է: 

 

Մյուս կողմից՝ այս օղակում աշխատելու դեպքում հնարավոր է խորհրդարանից ազդել գործադիրի վրա:  

 

Եվ, վերջապես, ո՛չ Արմեն Աշոտյանը, ո՛չ էլ հանձնաժողովի մյուս անդամները հազիվ թե իրենց հայրենակիցների մտավոր ներուժը շահագործելու նպատակ ունենային: Գուցե առաջին նիստից, քննարկումներից, կամ առաջին արդյունքներից հետո, երբ ակնհայտ կդառնան կենտրոնի  առավելությունները՝ ֆինանսական միջոցների հայթայթման հարցը ևս օրակարգային կդառնա:

 

Մեզ հասած տեղեկություններիով՝ հնարավոր է, որ հանձնաժողովի նախագահը դիմի ՀՀ-ում գործող տարբեր հիմնադրամների՝ դրամական օժանդակության ակնկալիքով: Միգուցե սա էր պատճառը, որ, այնուամենայնիվ, խորհուրդը եկել է ընդհանուր հայտարարի՝ գաղափարը դրական  է, առաջիկայում նիստ կգումարեն: 

 

Եվս մեկ անգամ՝ բարի մեկնարկ: