«Ծառուկյան» դաշինքի խժդժությունները կարծես հանգուցալուծվում են: Արդեն հայտնի է  այն երեք պատգամավորների անունները, ովքեր փոխարինելու են մանդատը վայր դրած պատգամավորներին: Սոցապ նախկին նախարար Գևորգ  Պետրոսյան, Նորա Առուստամյան, Հակոբ Նազարյան: 

Հիշեցնենք, որ մանդատը վայր դրեցին գործարարներ Խաչիկ Մանուկյանը, Հարություն Ղարագյոզյանը, Արտյոմ Ծառուկյանը:

 

Հետաքրքիրն այն է, որ   գործարարներն իրենց ընտրատարածքներում  ամենաշատ ձայն հավաքած պատգամավորի թեկնածուներն էին: Ու եթե հիմք ընդունենք մեկ այլ ԲՀԿ-ականի՝ Լյովա Խաչատրյանի «ջենտլմենական պայմանավորվածություն» արտահայտությունը, անհասկանալի է, թե ինչու մանդատից հրաժարվելու դիմում գրել տվեցին հենց նրանց:

 

Իսկ զավեշտալին էլ այն է, որ մանդատների վայր հարցում չգիտես ինչու՝ Գագիկ Ծառուկյանից ավելի շահագրգռված էր Հակոբ Հակոբյանը` «Ճոյտը»: Վերջինս դեռ երեկ իր գործընկերներին հորդորում էր վայր դնել մանդատը, հավատարիմ մնալ քաղաքական պայմանավորվածությանը: Բանը հասավ այնտեղ, որ Նապոլեոն Ազիզյանը, որի մանդատ չվերցնել-չվերցնելու հարցն անորոշ էր,  կոպտել է իր գործընկերոջը՝ «գլուխը պատին է տվել» արտահայտությամբ: 

 

Մանդատակռվի ժամանակ «Ծառուկյան» դաշինքի Գյումրիի քաղաքապետի  նախկին թեկնածու Վարդևան Գրիգորյանը հայտարարել էր, թե համոզել է Ծառուկյանին՝ ներողամիտ լինել և «պատժել» միայն երեքին: Չի բացառվում, որ մյուս հինգը շարունակեն իրենց պատգամավորական գործունեությունը: Կլսի՞ Գագիկ Ծառուկյանը ներողամտության հորդորները՝ կտեսնենք առաջիկայում: Բայց, կարծում ենք, հաջորդ ընտրություններում պատգամավորի մանդատի ախորժակ ունեցողները լավ կմտածեն՝ խաղի մեջ մտնելուց առաջ: