Ադրբեջանական խնձորների թեման դեռ շատ ջուր կքաշի: Հանրային աղմուկն ու դժգոհությունը տվեցին իրենց արդյունքը:  2 օր առաջ «Բավրայի» մաքսակետի պետի ձերբակալությունը ևս, ըստ տեղեկությունների,  ադրբեջանական խնձորների շարունակությունն է: 

Թեև ՊԵԿ նախագահ Վարդան Հարությունյանը  նախորդ ասուլիսում  նեղսրտել էր լրագրողների  հարցերից, թե ինչու են միայն այդ թեմայի վրա կենտրոնացել, բայց նեղսրտումն ու լրագրողական ճնշումն արդյունավետ եղան: 

 

Կառույցի ղեկավարը   մաքսակետի պետի ձերբակալության մասին խոսելիս ևս մեկ անգամ ասել է.

 

-Պետք է ամեն մարդ հասկանա, որ այսօր անհրաժեշտ է աշխատել պահանջներին համապատասխան: Որոշակի պահանջներ խախտվում են, մարդիկ չեն ընկալում, որ չի կարելի նման ձևով վարվել. այդ դեպքում, իհարկե, կլինեն և՛ ձերբակալություններ, և՛ այլ երևույթներ:

 

Վարդան Հարությունյանի այս խոսքը վերստին հաստատում է, որ կառավարությունը, հանձին Կարեն Կարապետյանի, տրամադրված է արդարացնելու մարդկանց հույսերը, բարոյահոգեբանական մթնոլորտ փոխելու և հավաստելու՝ օրենքի առաջ բոլորն են հավասար: 

 

Մյուս կողմից՝ այս ձերբակալությունը, ցավոք սրտի, հերթական անգամ ապացուցում է, որ ինչպես այլ երկրներում, այնպես էլ  Հայաստանում, կաշառակերությունը համակարգված շղթա է: Չար լեզուներն ասում են, որ ձերբակալված պետը իշխանական որոշ շրջանակներում հզոր հովանավորներ է ունեցել, բայց անգամ դա նրան  չի փրկել: 

 

Այն, որ մաքսային համակարգն ամենակոռունպացվածներից է՝ հայտնի էր բոլորին: Բայց հետաքրքիրն այն է, որ Բավրայի մաքսայինի պետին նշանակել է ՊԵԿ-ի գործող նախագահը՝  նախորդ տարվա վերջում: Գուցե նշանակման համար եղել են քաղաքական որոշ հանգամանքներ, բայց,  փաստորեն, Հարությունյանի կադրն իրեն չի արդարացրել: Դրա համար էլ պաշտոնյան խոսել է համակարգում նոր կրճատումների մասին: Այլ խոսքով՝ ՊԵԿ նախագահն իր սխալված լինելը ոչ թե հերքում կամ արդարացումներ է հորինում, այլ ուղղում է այդ սխալը՝ զգաստության կոչելով մյուսներին:

 

Այս միջադեպով նորից ու կրկին համոզվում ենք, որ իշխանավորներն ամեն ինչ լավ լսում են, լավ տեսնում են ու լավ գիտեն, թե որտեղ գտնեն չարիքի արմատը: Ու եթե խիղճն արթուն է, պետական մտածողության կա՝ հանցագործի ձեռքը բռնելն, ինչպես ասում են՝ տեխնիկայի գործ է: Հուսանք՝ այսօրինակ «վիրահատությունները»  շարունակական կլինեն: