Ֆրանկ-Վալտեր Շտայնմայերը՝ անցած դարավերջին միավորված Գերմանիայի նախագահը, այսօր Սեուլում անդրադարձել է կորեական երկու պետությունների միավորման հեռանկարին: Փհյոնչհանի օլիմպիական խաղերի բացման առիթով Հարավային Կորեա ժամանած Շտայնմայերն այդ մասին խոսել է Սեուլի միջազգային համաժողովում ելույթ ունենալիս:

 

- Երկխոսությունը միակ միջոցն է՝ մեղմելու լարվածությունը, ապահովելու խաղաղությունը և վերջիվերջո հասնելու Կորաեյի միավորմանը,- նշել է ԳՖՀ նախագահը:

 

Այդուհանդերձ՝ նա կարծիք է հայտնել, որ միջազգային հանրությունը պետք է շարունակի ԿԺԴՀ-ի վրա ճնշումներ գործադրելու ու պատժամիջոցներ կիրառելու քաղաքականությունը, այլապես Փհենյանն անկեղծ չի լինի  հրթիռամիջուկային ծրագրերից հրաժարվելու վերբերյալ բանակցությունների ընթացքում: 

 

- Նման եզրակացության մենք հանգել ենք՝ ելնելով Իրանի հետ երկխոսության փորձից (նկատի ունի Իրանի միջուկային ծրագիրը-խմբ.),- հավելել է նա: 

 

Շտայնմայերը առաջարկել է չանտեսել նաև Հյուսիսային Կորեային բարգավաճելու հնարավորություն տալու կարևորությունը, քանի որ հարկավոր է մարդկանց հույսեր ներշնչել: 

 

Շտայնմայերի ակնկալիքները, անկասկած, հիմնված են այս տարեսկզբից կորեական երկու պետությունների հարաբերություններում նկատված ջերմության վրա, որն արդյունք էր  սահմանային Փհանմունջ անցակետում խորհրդակցությունների մի քանի փուլից հետո ձեռք բերված պայմանավորվածության: Դրա շնորհիվ հյուսիսկորեացի մարզիկներից, պաշտոնյաներից և արվեստագետներից բաղկաղած պատվիրակությունն այսօր՝ փետրվարի 9-ին, հարավկորեական Փհյոնչհանում մասնակցում է օլիմպիական խաղերի բացմանը: 

 

Ի դեպ, Ձմեռային օլիմպիադային ԿԺԴՀ պատվիրակության մասնակցությանը հավանություն է տվել նաև ՄԱԿ-ի Անվտանգության խորհրդի՝ Հյուսիսային Կորեայի նկատմամբ պատժամիջոցների կոմիտեն: Մնում է հուսալ, որ այս խաղերը կհանգեցնեն միջազգային հարաբերություններում ակնկալված բարեփոխումին: Բայց համաշխարհային խաղացողները կամք ու բարոյականություն կունենա՞ն արդյոք՝ հրաժարվելու իրենց անզիջում դիրքորոշումից: