ՄԱԿ-ում Հյուսիսային Կորեայի մշտական ներկայացուցիչ Կիմ Ին Ռյոնը գլխավոր քարտուղար Գուտերեշին  ուղղված նամակում հայտարարել է, որ Միացյալ Նահանգների պահվածքի պատճառով անհնար է կանխագուշակել  միջուկային պատերազմի սկիզբը: Սրանից էլ կարելի է եզրակացնել, որ այն կարող է սկսվել ցանկացած պահի:

 

ԿԺԴՀ ներկայացուցիչը մատնանշել է Կորեական թերակղզում ԱՄՆ ավիակիրների խմբերի աննախադեպ ընդլայնման փաստը:

 

Խոսքը այս օրերին Հարավային Կորեայի հետ համատեղ ամերիկյան երեք ատոմային ավիակիրների մասնակցությամբ սկսած լայնածավալ մանևրների մասին է: Առաջին անգամն է, որ Հարավային Կորեայի հետ զորավարժություններում միանգամից երեք ատոմային ավիակիրների հարվածային խմբեր են մասնակցում: Իսկ մեկնաբանությունը մեկն է՝ նպատակ է հետապնդվում ուժի ցուցադրությամբ զսպել Հյուսիսային Կորեային:

 

ԿԺԴՀ ներկայացուցիչն իր նամակում նշել է, թե այդ զորավարժությունները վատթարացնում են Կորեական թերկաղզու շուրջը տիրող իրավիճակը, դրան էլ գումարվում են B-52 ամերիկյան ռմբակոծիչների շուրջօրյա թռիչքները:

 

- Մեկ տարի շարունակ ԱՄՆ-ի իրականացրած անընդմեջ լայնածավալ զորավարժություններն ու շանտաժը հաստատում են, որ մեր ընտրած ուղին ճիշտ էր,- նամակից մեջբերում է հրապարակել «Ասեշիեյթեդ փրեսը»:

 

Քանի որ ԱՄՆ նախագահ Դոնալդ Թրամփն այս օրերին Կորեական թերակղզուն հարող տարածաշրջանում է և հերթով այցելում է այնտեղ գտնվող երկրները, կարելի է եզրակացնել, որ ավիակիրների ու ռմբակոծիչների գործաղությունների նպատակն է Հյուսիսային Կորեայի հարձակումներից պաշտպանել նրա անձն ու առաքելությունը:  

 

Միայն թե՝ որքանո՞վ է երաշխավորված, որ հենց այդ առաքելությունն էլ Կիմ Չեն Ընի վարչակազմին չի դրդի առաջինը հարվածել: Չէ՞ որ պարզից էլ պարզ է, որ Թրամփի առաքելության գլխավոր նպատակակետը Կորեական թերակղզու հյուսիսային հատվածի պետությունը ոչնչացնելն է: