Ազգապահպանության գրավականն, ինչ խոսք, նախևառաջ սերնդակրթությունն է: Առավել ևս, հայրենիքից հեռու՝ օտար ափերում, ակամա օտար բարքերի կրող են դառնում հայ մանուկներն ու պատանիները՝ հաճախ չկարողանալով զերծ մնալ ուծացման վտանգից: Ահա թե ինչու Սփյուռքի կրթական խնդիրների լուծումն այսքան առաջնահերթում է ՀՀ սփյուռքի նախարարությունը:

 

Հենց այդ նպատակին էր ուղղված Սփյուռքի նախարարությունում այսօր ՀՀ սփյուռքի նախարար Հրանուշ Հակոբյանի նախաձեռնությամբ և մասնակցությամբ ՀՀ կրթության և գիտության նախարար Լևոն Մկրտչյանի հետ ստորագրած համատեղ հրամանը՝ Սփյուռքի կրթական խնդիրների լուծմանն աջակցելու վերաբերյալ:

 

Ծրագրով նախատեսված միջոցառումների կատարում համակարգելու նպատակով գործելու է համակարգող հանձնաժողով:

 

Ինչպես նշեց Հրանուշ Հակոբյանը՝

 

- Ի կատարումն ՀՀ Վարչապետ Կարեն Կարապետյանի հանձնարարականի՝ մենք կազմեցինք և ստորագրեցինք Սփյուռքի կրթական խնդիրների լուծմանն աջակցության համատեղ միջոցառումների ծրագիրը հաստատելու և համակարգող հանձնաժողով ստեղծելու մասին այս համատեղ  հրամանը, որը մեզ հնարավորություն կտա առավել արդյունավետ համատեղ  ծրագրեր իրականացնել:

 

Իսկ Լևոն Մկրտչյանը, կարևորելով նախարար Հրանուշ Հակոբյանի նախաձեռնությունը՝ նկատեց.

 

- Այս հրամանը ենթադրում է հստակ գործողությունների ծրագիր, և այսպիսի ձևաչափով ավելի լավ կհամակարգվեն աշխատանքները:

 

Սփյուռքի նախարարը շնորհակալություն հայտնեց Կրթության և գիտության իր պաշտոնակցին՝ համագործակցելու  պատրաստակամության համար և հավելեց, որ 2017թ. սեպտեմբերին տեղի կունենա Հայաստան-Սփյուռք 6-րդ համաժողովը, որտեղ կքննարկվեն նաև Սփյուռքում մայրենիի պահպանությանը վերաբերող խնդիրներ:

 

- Այստեղ ևս Սփյուռքի և Կրթության և գիտության նախարարությունները կարող են աջակցել միմյանց՝ լավագույն մասնագետներին հրավիրելու, թեմաները ճշգրիտ ընտրելու և բազմաթիվ այլ հարցերում, - նշեց Սփյուռքի նախարարը: