Գարնանամուտը Հայաստանում նշանավորվում է «Կանանց մեկամսյակ» անվամբ հայտնի տոնով, որը, պարզվում է՝ վալենսաբնակ հայերը ևս նշում են: Այս տարի մեկամսյակի վերջին ակորդը հանդիսացավ Միսլատայի կիրակնօրյա դպրոցի սաների շնորհավորանքն՝ ուղղված Սարատովի հայուհիներին:

 

 

Սերտ համագործակցություն է հաստատվել Վալենսիայի և Սարատովի հայ համայնքների և, հատկապես, հայկական կրթօջախների միջև, ինչի վառ ապացույցներից էր նաև ապրիլյոթյա հանդիսությունը՝ ռուսական քաղաքի հայկական դպրոցի ուսուցչուհի Նունե Բաղդասարյանի նախաձեռնությամբ։ 

 

Իսպանաբնակ հայերի և, հատկապես «Արարատ» Հայկական միության անունից շնորհավորական մաղթանքները հղեց Հայարփի Իսպիրյանը՝ իր խոսքը եզրափակելով գեղեցիկ ասմունքով։ Այնուհետև շնորհավորական խոսքով հանդես եկան աշակերտները, ովքեր մայրիկներին նվիրված բանաստեղծություններ ձոնեցին հայուհիներին։ Սարատովի հայուհիներին շնորհավորական ուղերձներ էին հղել նաև այլ երկրների հայկական համայնքներից, ինչպես նաև Հայաստանից։

 

Հիշեցնենք, որ կանանց մեկամսյակը «Արարատ» Հայկական միությունում սկսվել էր մարտին՝ «Գարուն» խորագիրը կրող նկարչական մրցույթով։