Թե ո՞ր ժամանակներում են մարդիկ սկսել ուշադրություն դարձնել նախանշաններին և զգուշանալ կամ ուրախանալ դրանցից՝ հիմա ասել դժվար է: Սակայն դրանք տարածվել ու նախապաշարումներ են դարձել՝ կենսունակ լինելով նաև մեր ժամանակներում: Իսկ նախապաշարումն ինչ-որ իմաստով ինքնապահովագրմա բնազդ է՝ զգուշավորություն պահպանել կամ հաջողություն ապահովել: Ասել է թե՝ մարդ արարածն այսօր էլ այնքան ինքնավստահ չէ, որ կարող է ինքնուրույն ապահովագրվել չարիքներից ու ընդառաջ գնալ հաջողությանը: Խոստովանենք, սակայն, որ այդ նախանշաներից որոշները նաև ուսուցանող են:

 

Նախապաշարվածությունը թուլություն համարելով և չարդարացնելով ու չդատապարտելով նախանշաններով առաջնորդվողներին, որպես ժամանց՝ ներկայացնենք դրանցից մի քանիսըՙ որոն տարածված են տարբեր ժողովուրդների շրջանում:

 

 Ճաքած կամ վնասված ամանեղենից (բաժակ, ափսե) ուտելն ու խմելը դժբախտություն կբերի. դրանցից օգտվողի կյանքում նույնպես ճաքեր կառաջանան:

 

 Դրամապանակ նվիրելիս՝ դրա մեջ գումար դրեք, որպեսզի այն երբեք դատարկ չմնա: 

 

 Միաժամանակ երկուսով հայելուն նայելը վտանգավոր է. երկուսից մեկին տառապանքներ են սպասվում:

 

 Արևամուտից հետո փող կամ ցանկացած իր պարտքով մի տվեք. այդ պարտքն այլևս չի վերադարձվի:

 

 Դատարկ շիշը սեղանին թողնելիս՝ փող չեք ունենա:

 

 Եթե ուրիշից վերցրած ափսեն, բաժակը, թավան, կաթսան, պայուսակը դատարկ վերադարձնեք՝ ձեր ամանեղենն ու պայուսակը միշտ դատարկ կմնան:

 

 Սեղանին նստելը մահվան վտանգ է:

 

 Մթության մեջ կամ գաղտնի ուտողների երեխաները գող են դառնում:

 

 Հացն աղբը գցելը մեծ մեղք է: Հացի կտորտանքը թռչուններին տալու փոխարեն դեն նետողներն աղքատանում են:

 

 Թղթով սեղան սրբելը վեճի նախանշան է:

 

 Սեղանից ուտելիքի մնացորդները ձեռքի ափով մի մաքրեք, այլապես կարող է՝ նույն ափով ողորմություն խնդրեք:

 

 Ճաշելուց առաջ և հետո մի պատառ աղ ու հաց ուտելը երջանկաբեր է:

 

 Սեղանից խնձորի ընկնելը սիրելիի հետ հանդիպում է խոստանում:

 

 Եթե սեղանի շուրջ խնդրում են աղ փոխանցել՝ անպայման ժպտալով փոխանցեք: Հակառակ դեպքում վեճի մեջ կընկնեք:

 

 Ըմպելիքով լցված ամանը (շիշը, բաժակը) պետք է ծածկած պահել, որ դրա մեջ չար ուժեր չներթափանցեն:

 

 Եթե ուտելու ժամանակ խեղդվում եք, ուրեմն հարազատ մեկը քաղցած է, կամ ինչ-որ մեկը շտապում է հյուր գալ:

 

 Ցանկալի չէ փող նվիրաբերել երկուշաբթի և ուրբաթ օրերին. կորուստ կունենաք: Դրա համար ավելի հարմար օրեր են երեքշաբթին, շաբաթը, կիրակին. այդժամ ավելի կբարվոքվի ձեր նյութականը: Բայց երկուշաբթի և երեքշաբթի օրը պարտքով փող տալու դեպքում ինքներդ կարող եք պարտքի մեջ հայտնվել:

 

 Փողը միշտ վերցրեք ձախ ձեռքով, բայց տվեք աջով:

 

 Սեղանին գլխարկ և բանալի դնելը աղքատություն կբերի: