Համբուրգն արդեն իսկ պատրաստվում է
ԺԱՄԱՆԵԼՈՒ Է ԷՐԴՈՂԱՆԸ՝ ԻՐ ՎԱՅՐԱԳ ԹԻԿՆԱՊԱՀՆԵՐՈՎ
Հուլիսի 11-ին գերմանական Համբուրգում Մեծ քսանյակի երկրների գագաթնաժողովն է գումարվելու, իսկ տեղի ոստիկանությունն արդեն սկսել է նախապատրաստվել Թուրքիայի նախագահի թիկնազորի վայրագություններին:
Համբուրգի ոստիկանության պետը հայտարարել է՝ թույլ չեն տալու, որ օտարերկրյա ղեկավարների թիկնազորներն իրենց երկրում անկարգություններ անեն:
- Չենք թողնի, որ Համբուրգում էլ կրկնվեն այնպիսի դեպքեր, ինչպիսիք Թուրքիայի նախագահ Էրդողանի թիկնազորի կողմից Վաշինգտոնում ցուցարարների վրա իրականացված հարձակումն էր,- ասել է ոստիկանապետ Մեյերը:
Թիկնապահները միայն մեկ պարագայում միջամտության իրավունք ունեն՝ եթե իրենց ղեկավարը հարձակման թիրախում է հայտնվել:
Աշխարհի 20 հզորագույն երկրների ղեկավարներին հյուրընկալող քաղաքի անվտանգության համար պատասխանատուն հայտարարել է, որ անվտանգության աշխատակիցները կարող են զենք կրել միայն հատուկ թույլտվությամբ:
Վաշինգտոնում խաղաղ ցուցարարների նկատմամբ Էրդողանի թիկնապահների հաշվեհարդարը, փաստորեն, այնքան էլ էժան չնստեց: Ամերիկյան իշխանությունները, ճիշտ է՝ որոշ հապաղումով, սակայն արձագանքեցին կատարվածին: Ծեծուջարդին մասնակցած այն թուրքերը, ովքեր ԱՄՆ-ում են գտնվել, զրկվել են ազատությունից, իսկ մնացածների նկատմամբ մեղադրանք է հարուցվել:
Հիմա արդեն աշխարհի մյուս երկրներում նույնպես գիտեն, թե ի՞նչ է նշանակում գործ ունենալ չափն անցած Էրդողանի ու նրա անվտանգությունն ապահովողների հետ:
Գիտեն, այո, սակայն պատվավոր աթոռներ են հատկացնում աշխարհի հզորագույն երկրների շարքում ու նրա հետ քննարկում մարդկության անվտանգության հարցերը: