«Պերմանենտ» արտակարգ դրության օրենք՝ Ադրբեջանի համար
ԻՍԿ ԵՎՐՈՊԱ՞Ն ԻՆՉ Է ԱՍԵԼՈՒ
Հիմա արդեն Ադրբեջանը հանգիստ կարող է թե՛ խոսքի ազատությունը սահմանափակել, թե՛ ցույցերն ու հանրահավաքներն արգելել, իսկ միջազգային կառույցներին այս օրենքը դեմ տալ: Չէ՞ որ ըստ իրենց՝ Ադրբեջանի մի հատվածն օկուպացված է, այնտեղ առանց իրենց թողտվության այցելող արտասահմանցիներն էլ սահմանախախտներ են: Ըստ էության՝ հող են նախապատրաստում այդ երկրում «պերմանենտ» արտակարգ դրություն մտցնելու համար, որպեսզի ոչ ոք չկարողանա թպրտալ: Հետաքրքիր է, թե այս խորամանկության դիմաց ժողովրդավարության ու մարդու իրավունքների ջատագով Եվրոպան ի՞նչ հակամիջոցներ կգտնի: Եթե իհարկե՝ դրանով իսկապես հետաքրքրված է:
Մարդու իրավունքների եվրոպական դատարանը Ադրբեջանի դեմ հարուցած 11 գործով երեք վճիռ է կայացրել: ՄԻԵԴ-ի տարածած հաղորդագրությունից պարզ է դառնում, որ խոսքը 2013թ. հունվարին, մարտին և դեկտեմբերին, նաև 2014թ. մայիսին Բաքվում տեղի ունեցած զանգվածային ցույցերի ժամանակ առանց հիմնավորման ձերբակալված կամ տուգանված անձանց բողոքների հիման վրա հարուցված դատական գործերի մասին է: Եվրադատարանը հաստատաված է համարել, որ Ադրբեջանի իշխանությունները խախտել են հավաքների ազատության և արդար դատավարության իրավունքները, նաև չեն հիմնավորել բողոքի գործողությունների ցրման և մասնակիցներին պատժելու համար ունեցած հիմքերը: Դատարանը որոշել է, որ Ադրբեջանի իշխանությունները պարտավոր են տուժածներին բարոյական փոխհատուցում վճարել 4000-8000 եվրոյի չափով, իսկ դրամական տուգանքի ենթարկվածներին փոխհատուցել համապատասխանաբար 480 և 850 եվրոյի չափով: