«ՎԱՂՎԱ ՕՐՎԱՆ ՊԵՏՔ Է ԼՈՒՍԱՎՈՐ ՀԱՎԱՏՈՎ ՆԱՅԵԼ»

Այցեքարտ. ՀՀ Ազգային ժողովի պատգամավոր Աշոտ Տոնոյանը ծնվել է 1958թ., Երևանում: 1985-1991թթ. եղել է իր իսկ հիմնադրած «Երամ» կոոպերատիվի նախագահը: 1991-1996թթ. աշխատել է «Տիգրիս» շինարարական կոոպերատիվում` որպես գլխավոր ինժեներ: 1996-2002թթ. ղեկավարել է իր ստեղծած «Ռոբերտ» շինարարա կան ՍՊԸ-ն, 2002-ից գլխավորում է իր հիմնադրած «Տոնուս» ՍՊԸ-ն: Համայնքին մատուցած ծառայությունների համար 2006թ. նրան շնորհվել է Քանաքեռ-Զեյթուն համայնքի պատվավոր քաղաքացու կոչում: 2006թ. պարգևատրվել է Ազգային օլիմպիական կոմիտեի «Ոսկե շղթայով»: Ամուսնացած է, ունի երկու երեխա և մեկ թոռնուհի: -Ձեր մուտքը ԱԺ նշանավորվում է քաղաքական դաշտին նոր շունչ հաղորդելու պատրաստակամությամբ: Ձեր ձեռնարկումները որքանո՞վ կնպաստեն նախկին խորհրդարանի անավարտ գործերի և նոր ծրագրերի իրագործմանը: -Կարծում եմ, համամիտ կլինեք այն մտքի հետ, որ մեր երկրի քաղաքական դաշտին թարմություն, նոր մտածողություն է պետք, որովհետև կյանքը քարացածություն, տեղապտույտ չի հանդուրժում: Այսօր երկրի առջև բավական լուրջ խնդիրներ են ծառացել, որոնց օր առաջ լուծման անհրաժեշտությունն այլընտրանք չունի, մինչդեռ հին ու կաղապարված մտածողությամբ դրանք լուծել չենք կարող: Նախորդ խորհրդարանն իր պատմական առաքելությունը կատարեց, բայց պիտի ընդունենք նաև, որ այնտեղ երբեմն ավելի շատ անձնավորված, ժողովրդի մոտ էժանագին հեղինակություն ձեռք բերելու քողարկված մրցավազք, քան քաղաքական լուրջ պայքար էր ընթանում: Քաղաքական պայքարն ինքնանպատակ չպետք է լինի, այն նպատակաուղղված պետք է լինի նախ և առաջ երկրի տնտեսական աճի խթանմանը: Մենք կյանքի ռիթմից ետ ընկնելու իրավունք չունենք: -Այսօր շատերն են պնդում, թե չկա օրենքի գերակայություն. Դուք համամի՞տ եք: -Մենք ոչ թե փաստը պետք է արձանագրենք, այլ դրա պատճառն ուսումնասիրենք: Սովորաբար ասում են, թե մենք օրինապաշտ չենք: Համամիտ չեմ այդ կարծիքի հետ: Ինչո՞ւ օտար երկրում հայտնվելուն պես հայերը զգաստանում են, իսկ սեփական երկրում օրենքները ոտնահարում, կարգ ու կանոնին մատների արանքով են նայում: Օրենքի գերակայությունը պարզապես կաղում է, որովհետև չափից ավելի քաղաքականացված մեր ժողովուրդը սխալմամբ կարծում է, թե իր իրավունքների պաշտպանությունն իշխանավորների խնդիրն է: Մենք միայն տեսականորեն ենք ընդունում այն ճշմարտությունը, որ օրենքի առաջ բոլորն էլ հավասար են, բայց` ոչ ավելին: -Զարգացած երկրներում ճիշտ հաշվարկված քաղաքականությամբ կարողացան մեծ փողերը ծառայեցնել երկրի և ժողովրդի կենսակերպը բարելավելուն: Ինչպիսի՞ հեռանկարներ են սպասվում մեզ: -Եկեք նայենք մեր շուրջբոլորը, վատը չանտեսելու հետ մեկտեղ, անկեղծորեն խոստովանենք, որ ժողովրդի կենսամակարդակն իրոք բարձրացել է, դրական փոփոխություններ կան: Ինչո՞ւ ենք մոռանում, որ կայսրության փլուզման գործընթացի արդյունքում միանգամայն նոր իրադրությունում հայտնվեցինք. մեզ պատուհասած երկրաշարժն ու պարտադրված պատերազմն անհետևանք չէին կարող անցնել, առավել ևս, երբ ինչ-որ պահ թացն ու չորն իրարից զատելը չափազանց դժվար էր: Զարգացած երկրների հետ համեմատվելը ճիշտ չեմ համարում, որովհետև այն էտապը, որը հիմա մենք ենք անցնում, նրանք վաղուց են անցել: Ժամանակից առաջ ընկնել չեմ սիրում, սակայն վստահ եմ, որ մեր երկրի 2008 թվականի պետբյուջեում ժողովրդի կենսամակարդակի բարձրացմանն ուղղված նոր և իրատեսական քայլերն ակնհայտորեն կերևան: Մեր սերնդին ծանր փորձություններ էին վիճակված. դժվարությամբ, բայց հաղթահարում ենք դրանք` ընթացքում սեփական սխալների վրա շատ բան սովորելով: -1990-ականների սկզբներին Դուք եղել եք կոոպերատիվ շարժման ակտիվիստներից: Թեև այն չարդարացրեց իրեն, սակայն Ձեզ հաջողվեց գտնել «ոսկեբեր երակը» և նավարկել ճիշտ ուղղությամբ: Եվ, ուրեմն, ո՞րն է Ձեր հաջողության գաղտնիքը մեծ բիզնեսում: Բիզնեսմեն ծնվո՞ւմ են, թե՞ դառնում: -Խորհրդային վերջին տարիների հայտնի նորամուծությունը, որն ինչ-որ տեղ լավ մոռացված հինն էր, կաղապարված մտածողության տեր մարդկանց ջանքերի շնորհիվ տապալվեց, որովհետև համակարգը լճացած էր, նոր մտածողությունը սրերով էր ընդունվում: Իմ հաջողության գաղտնիքը աշխատասիրության, անվերջ որոնում ների, նորն ու արդյունավետը գործնականում ճիշտ կիրառելու մեջ է: Բիզնեսմեն կարող ես դառնալ, եթե վստահ ես, որ ճիշտ ուղի ես ընտրել: -Բիզնեսը նույնպես գիտությո՞ւն է: -Ես կասեի` վտանգավոր գիտություն, որովհետև բարձունք նվաճելն ինչ-որ տեղ ավելի հեշտ է, քան այնտեղ մնալը: Չպետք է մոռանալ, որ անսպասելի հաջողությանը հետևող գայթակղիչ գլխապտույտին քչերն են դիմանում: Բիզնեսում ամենափոքրիկ սխալն անգամ ճակատագրական կարող է դառնալ, եթե ճիշտ հաշվարկ չի կատարվում: -Բիզնեսում Ձեր ոլորտը շինարարությունն է: Եկեք նախ պարզենք` շինարարությունը գնորդ ունի՞ հասարակության միջին` առավել լայն շերտում: -Մեզ մոտ սովորաբար առաջին հերթին մտածում են կարճ ժամանակահատվածում խոշոր գումարներ վաստակելու մասին, ինչի պատճառով էլ շատերը կոտրած տաշտակի առաջ են կանգնում: Միայն բարձրակարգ բնակելի շենքեր կառուցելու մրցավազքը վերջնագծին է մոտեցել, ներկայումս առաջարկն ավելի շատ է, քան` պահանջարկը, ինչը միանգամայն բնական է: Մայրաքաղաքի կենտրոնը շնչահեղձ է լինում, մարդիկ արդեն իրենց հայացքները հառել են արվարձաններին, որտեղ կարելի է հասարակության միջին խավի համար բնակարաններ, ինչու չէ, նաև ամբողջական թաղամաս կառուցել: Մեր կազմակերպությունում այդ հարցն ինչպես հարկն է ուսումնասիրվել է: Հեռու չէ այն օրը, երբ բնակչությանը նաև այդպիսի բնակարաններ կառաջարկենք: -Այս ոլորտի շարունակական զարգացման համար անհրաժեշտ է գործել նախորդներից ավելի լավ: Սակայն Դուք նոր իրավիճակում աշխատում եք հին ավանդույթ ներով, այսինքն` նախընտրել եք խորհրդային տարիների` ծածկերի բարձրացման մեթոդը: Որքանո՞վ է այն ձեռնտու: -Անցյալի լավագույն ավանդույթները չպետք է մոռանալ: Մենք նախապատվությունը տվել ենք Սահակյան եղբայրների կողմից մշակված` ծածկերի բարձրացման բացառիկ մեթոդով բնակելի տների կառուցմանը, որովհետև այն տնտեսապես արդյունավետ է, շահում ենք թե մենք, թե գումար ներդրած քաղաքացին: -Որպես գործարար պատգամավոր, պատրա՞ստ եք դիմակայել ազատ տնտեսական մրցակցության դեմ ուղղված ոտնձգություններին: -Չգիտեմ, թե ի՞նչ նկատի ունեք ոտնձգություն ասելով, սակայն ազատ տնտեսական մրցակցությունն օրինախախտումներով չպետք է ծավալվի: -Դուք կոռուպցիան համարո՞ւմ եք երկրի տնտեսական աճի ծանրակշիռ խոչընդոտ: Ինչպե՞ս եք պատրաստվում պայքարել դրա դեմ: -Նախընտրական հանդիպումների ժամանակ քանիցս մատնացույց եմ արել մեր կազմակերպության օրինակը, ուր ինքնատիպ համակարգ է մշակված, որի շնորհիվ յուրաքանչյուր աշխատակից հստակ գիտի իրեն ներկայացվող ամենօրյա պահանջները, իր անելիքը, քաջատեղյակ է ձեռնարկության գործունեությանը: Միգուցե բարձրագոչ հնչի, բայց մեզ մոտ կոռուպցիա չկա, դա կարող է փաստել մեր ցանկացած աշխատակից: Երկրի մասշտաբով կոռուպցիայի դեմ համաժողովրդական ամենօրյա պայքար պետք է ծավալել` հստակ մեխանիզմներ մշակելով և օրենքի գերակայությանը մեծ տեղ հատկացնելով: -Դուք ծանրակշիռ բիզնեսմեններից եք, սակայն նախընտրել եք ԱԺ-ում դառնալ Պաշտպանության, ազգային անվտանգության և ներքին գործերի մշտական հանձնաժողովի անդամ: Ինչո՞ւ ընտրեցիք հատկապես այդ հանձնաժողովը: -Կարծում եմ, ամենաշատն այդ հանձնաժողովում օգտակար կլինեմ: -Ինչպե՞ս եք գնահատում երիտասարդության մտավոր և ֆիզիկական ներուժը: Կարո՞ղ եք նրան վստահել Ձեր կողմից կառուցվելիք բարգավաճ Հայաստանը: -Մենք հիանալի երիտասարդություն ունենք, որն իրեն մեր երկրի իսկական տերն է համարում և լիարժեք իրավունք ունի բարգավաճ երկրում ապրելու: Նա այդ երկիրը կառուցողների շարքերում է, նրան թերահավատորեն չպետք է նայենք, ինչպես ժամանակին մեզ չեն նայել: Մեր ժողովրդի հերոսական անցյալից ճիշտ դասեր պիտի քաղենք, ապրենք ոչ միայն այսօրվա համար, այլ վաղվա օրվա հանդեպ ունեցած լուսավոր հավատով: Վաղվան թերահավատորեն նայելով առաջ գնալ չենք կարող: