Խորհրդարանում այսօր ընդունված օրինագիծը տխուր մի հումոր ծնեց: Ղարաբաղյան պատերազմում կրած պարտությունից հետո հեղինակազուրկ եղած Էլչիբեյն, ասում են, պոռոտախոսել էր, թե նաև Հայաստանն է գրավելու ու լող է տալու Սևանի ջրերում: Հիմա մտածում եմ՝ մեր պատգամավորները գուցե մտավախությո՞ւն ունեն և Գեղամա ծովակը որոշել են ընդամենը ոռոգման ջուր դարձնել, որ թշնամու աչքը կտրե՞ն մեր երկրից...

 

ԱԺ-ի արտահերթ նիստում  այսօր քննարկվում էր «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին հարցը:

Նախագծով նախատեսվում է 2017թ. Սևանա լճից օրենքով սահմանված 170 մլն մ³ առավելագույն ջրառից բացի, 100 միլիոն մ³ լրացուցիչ ջուր բաց թողնել:

 

Մինչ խորհրդարանում կմեկնարկեր քննարկումները, բնապահպանները խորհրդարանի շենքի դիմաց բողոքի ակցիա էին կազմակերպել: 

«Հայաստանի անտառներ» հ/կ նախագահ Նազելի Վարդանյանը լրագրողների հետ զրույցում ասաց, որ Սևանա լիճն ընդամենը մի քանի օրվա ընթացքում իջել է 4 սմ-ով՝ 1900.91 սմ-ից 1900.87 սմ` օրենքով նախատեսված ջրառի շրջանակներում: Սևանա լճից արդեն բաց է թողնվել 100 միլիոն խմ-ից ավելի ջուր: 

 

- Եթե այս սակավաջուր շրջանում Սևանա լճից հավելյալ 100 միլիոն խմ ջուր վերցվի՝ լիճն անխուսափելիորեն բացասական հաշվեկշիռ կունենա: Դեմ ենք Սևանը իջեցնելուն, դեմ ենք Սևանը ճահճացնելուն: Կոչ ենք անում բոլորին՝ միանալ բողոքի ակցիաներին,-ասաց  Նազելի Վարդանյանը:

 

Տեղեկացնենք, որ Բնախահպանության նախարարությունը ևս համակարծիք է բնապահպաննների հետ: 

 

Իսկ ահա ԱԺ-ում ընդդիմադիրներն առաջնորդվում էին «դեմ լինելով  կողմ կլինենք» անհասկանալի մոտեցմամբ: Պատգամավորների խոսքով՝ իրենք չեն կարող դեմ քվեարկել, քանի որ 130.000 գյուղացիական տնտեսություններ կմնան անջրդի: 

 

Հետաքրքիր է, իսկ լճի գոյությունը վտանգելով՝ քանի՞ հարյուր հազարով կմեծանա այդ թիվը: 

 

Սա գիտակցում են պատգամավորները՝ ասելով, թե կողմ քվեարկելով, իրենք հասկանում են, որ այս ամենը կազդի Սևանի լճի  ու էկոհամակարգի վրա: «Ծառուկյան» դաշինքի խմբակցության  քարտուղար Նաիրա Զոհրաբյանը կառավարության անդամին` Ջրային տնտեսության  պետական կոմիտեի ղեկավար Արսեն Հարությունյանին հորդորեց ազնիվ լինել.

 

- Մենք ընտրություն ենք կատարում վատի և վատագույնի միջև:

 

«Ելք» դաշինքի պատգամավորներն էլ արդյունավետ կառավարման հարց բարձրացրին՝ ո՞վ է պատասխանատու, որ մինչև 55% ջրային ոլորտում կորուստ ունենք. առկա է ոռոգման համակարգի խնդիր, որն անգամ խոստովանեց Ջրային տնտեսության պետական կոմիտեի ղեկավարը:

 

100 միլիոն մ³ լրացուցիչ ջուր բաց թողնելուն կողմնակից էր ՀՀԿ-ական պատգամավոր, Բնապահպանության նախկին նախարար Արամ Հարությունյանը:

 

Ըստ «Ելք» դաշինքի պատգամավոր Լենա Նազարյանի՝ պատճառն այն է, որ Արամ Հարությունյանը Շորժայում առանձատուն ունի, հետևաբար շահագրգռված է, որ Սևանի ջրի մակարդակը չբարձրանա: Ի պատասխան՝ Արամ Հարությունյանն հակադարձեց, թե Շորժայում իր ունեցածը մետաղական, տեղափոխվող կոնստրուկցիա է, հետևաբար Սևանի ջրի մակարդակը չի կարող ազդել իր շինության վրա: Սակայն չասաց, որ բազմաթիվ պաշտոնյաներ Գեղամա մեր ծովակի ափերին շքեղաշուք բիզնես-շինություններ ու առանձնատներ ունեն, որոնք տեղափոխելն անհնարինության չափ դժվար է: Ի դեպ, հուշենք նմաններին, որ լիճը վտանգելով՝ ավելորդ է դառնում նաև իրենց մերձափնյա ունեցվածքը:

 

Քվեարկությունից առաջ «Ելք» դաշինքի պատգամավոր Արտակ Զեյնալյանը հայտարարեց, որ դեմ են քվեարկելու, քանի որ հազարավոր գյուղացիական տնտեսությունների ոռոգման հարցը կարելի է այլ եղանակով լուծել: Արտակ Զեյնալյանը նաև հայտարարեց, որ դիմելու են ՍԴ՝ վիճարկելու օրենքի սահմանադրականությունը: 

 

77 կողմ, 3 դեմ ձայների հարաբերակցությամբ օրինագիծն ընդունվեց: