Շուրջ 80 հայեր ենթարկվել են բռնի անհայտացման․ Սիրանուշ ՍԱՀԱԿՅԱՆ
Բաքվում պահվող հայ գերիները մշտապես գտնվել և գտնվում են կյանքի իրական սպառնալիքների ներքո։ Այս թվերի մասին բացահայտ չի խոսվում, բայց ունենք արձանագրված մի քանի տասնյակ դեպքեր, երբ անձինք սպանվել են հենց գերեվարման ընթացքում։ Այս մասին Երևանում ընթացող պանելային քննարկման ժամանակ ասաց ՄԻԵԴ-ում հայ գերիների շահերը ներկայացնող իրավապաշտպան Սիրանուշ Սահակյանը։
- Գերիների հիմնախնդիրն էապես կապված է նաև բռնի անհայտացման հետ, երբ թեև գերիների սպանված լինելու վերաբերյալ մենք ապացույցներ չունենք, բայց ունենք դեպքեր, երբ տասնյակ հայեր, շուրջ 80 հայեր ենթարկվել են բռնի անհայտացման,- նշեց Սահակյանը՝ ընդգծելով, որ այստեղ ունենք մարդկային ճակատագրեր, որոնք շարունակում են մնալ անհայտացման մեջ, կան հոգեբանական այլ տառապանքներ, ինչը ևս դիտարկվում է պետության ատելության քաղաքականության ներքո։
- Գերիների մասով դրականն այն է, որ այս պահին մենք ունենք շուրջ 210 հայեր, որոնք հայրենադարձվել են, ընդ որում հայերանադարձման մաս են դարձել մինչեւ 2020-ի 44-օրյա պատերազմը սահմանային միջադեպերի հետևանքով Ադրբեջանի իշխանությունների ներքո հայտնված հայերը: Շուրջ 23 հայեր շարունակաբար պահվում են Բաքվում: ինչպես հայտնի է՝ 23-ից 5-ը գերեվարվել է 2020-ի ընթացքում, իսկ մնացած միջադեպերն արձանագրվել են 2023-ին: 23-ից 7-ը ավարտված դատավարությունների մաս են կազմել, նրանց առնչությամբ կան մեղադրական դատավճիռներ, և ըստ Ադրբեջանի նրանք պատիժ կրող հայեր են, որոնք ծանր հանցագործություններ են կատարել: Այդ դատապարտումների հիմքում դրվել են այնպիսի կեղծ մեղադրանքներ, ինչպիսիք ցեղասպանությունն է կամ առաջին պատերազմի ընթացքում պատերազմական հանցագործություններ կատարելը,- համոզմունք հայտնեց Սահակյանը։
Աղբյուր՝ Փաստինֆո