«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի աշխատակիցները ծալաթերթեր են բաժանել «Զվարթնոց» միջազգային օդանավակայանում Թեհրանից, Ռուսաստանից և Հնդկաստանից Հայաստան ժամանած զբոսաշրջիկներին:

 

Հայաստանն օտարերկրացիներին ճանաչելի դարձնելու ուղղությամբ տարվող աշխատանքի վկայություններից մեկն է քիչ առաջ ՊՈԱԿ-ի տարածած հաղորդագրությունը:  

 

Բարի գալուստ մաղթելով եկվորներին՝ նրանց հանգամանալի ներկայացվում էր ծալաթերթերի (ֆլայերներ ) բովանդակությունը ու դրանցում ներառված հուշարձանների գրավչությունը: 

 

«Գառնի», «Զվարթնոց», «Մեծամոր», «Լոռի բերդ» քաղաքատեղի», «Արփի» բնապատմական, «Գոշավանք», «Զորաց քարեր» բնակատեղի», «Գլաձորի համալսարան» արգելոցների և արգելոց-թանգարանների մասին պատմող տեղեկատվական քառալեզու (անգլերեն, ռուսերեն, ֆրանսերեն, պարսկերեն) ծալաթերթերն առաջիկայում ևս կբաժանվեն Հայաստան այցելող օտարերկրացիներին:

 

Այդ կերպ ավելի առարկայական կդառնան հինավուրց մեր երկիրը ճանաչել ցանկացողների պատկերացումները, և ավելի դյուրին՝ զբոսաշրջային երթուղիներ ընտրելը: