Ինչպես արդեն հայտնի է քննարկումներից՝ Երևանի քաղաքապետարանի հերթական անակնկալը, մեղմ ասած՝ նորից հիասթափեցրել է մայրաքաղաքի բնակիչներին: Մինչ հնչող կարծիքներին ծանոթանալը, ակամա հարց է ծագում՝ ինչո՞ւ հատկապես  շիշկինյան արջերը պիտի «շրջեին» Երևանի Ազատության հրապարակում, և ոչ թե, ասենք, հենց ազատատենչ մեր Սասնա Դավիթը, կամ՝ թեկուզ հայկական հեքիաթների հերոսները: Եվ կամ՝ հարևանությամբ գտնվող Կարապի լիճը չի՞ հուշել, որ եռաչափ՝ 3D սթրիթ արթ ոճով կարող էին նաև «կարապներ սահել»: 

 

Երկրորդ հարցը, որ հաջորդում է առաջինին՝ երևի մի քիչ հեգնախառն է. տեսնես սրանք Իվան Շիշկինի «Առավոտը սոճիների անտառում» կտավի՞, թե՞ «Ծուռթաթ արջը» կոնֆետի արջերն են... 

 

Այս թեմայով հետաքրքիր կարծիքներ է հրապարակել  JAMnews-ը, որոնք, կարծում ենք, մեր ընթերցողին նույնպես կհետաքրքրեն:

 

- Ոմանք արդեն հասցրել են նկարվել արջերի հետ, ոմանք էլ հասցրել են հրապարակավ արտահայտել իրենց զայրույթը: Բնակիչներին դուր չի եկել, որ նկարում պատկերված արջերը ռուսական շոկոլադի հայտնի արջերին են հիշեցնում ու Երևանի արտաքին տեսքի հետ ներդաշակ չեն,- գրում է կայքը:

 

- Պետք է Սահմանադրության մեջ գրանցել, որ Երևանի քաղաքապետարանը այսուհետ իրավունք չունի որևէ բան նախաձեռնել: Քաղաքապետ Տարոն Մարգարյանը թող իր տան բակը զարդարի իր ճաշակով, քաղաք ինչի՞ է իջել,- հայտարարել է ճարտարապետ Արսեն Կարապետյանը:

 

Երևանի գեղարվեստի պետական ակադեմիայի ռեկտոր Արամ Իսաբեկյանն էլ ասել է, թե չի հասկանում՝ ի՞նչ կապ ունեն արջերը օպերայի, բալետի և թատրոնի շենքի հետ.

 

- Կարող էր լինել որևէ այլ նկար, Մոնա Լիզան օրինակ, բայց ա՞րջ… Ես այս նկարից Ռուսաստանի հետ կապված ասոցիացիա եմ ստանում:

 

Այն, որ պատկերը նմանեցնում են ռուսական շոկոլադի նկարի հետ, ասել է նաև կինոսցենարիստ, գրող, հրապարակախոս, Վահրամ Մարտիրոսյանը. 

 

- Այս նկարը շատ հստակ ասոցացվում է սովետական երեք արջուկներ շոկոլադի հետ, որը Մոսկվայից էին բերում, քանի որ դեֆիցիտ էր: Ինչի՞ համար է սա: Որ ասոցիացիան  առաջացնի՞, որ սովետական երանելի ժամանակնե՞րը հիշեցնի, բայց ո՞րն է այդ երանելի ժամանակաշրջանը՝ դեֆիցի՞տը:

 

Ներկայացնում ենք նաև ֆեյսբուքյան օգտատերերի գրառումներից մի քանիսը.

 

- Օպերայի հրապարակում ձորում զբոսնող արջը ո՞րն է։ Ռուսական միշուտկա շոկոլադի զավոդի բա՞կն ա, ինչ ա… 

 

- Է՞լ ում ա թվում, որ շատ անդուր է օպերայի շենքի բակում էս ախմախությու՞նը….

 

- Էդ ձեզ է թվում, որ էս իշխանության անճաշակությունը, չտեսությունը, էշությունը, հիմարությունը, ախմախությունը, ամեն ինչ այլանդակելու մոլուցքը սահման ունի:

 

- Կներեք, պետք է ասեմ գեղցիներ, գյուղացի չհասկանալ, ռաբիզներ, արջը ի՞նչ կապ ունի ազատության կամ դասական արվեստի հետ։ Ես չեմ հասկանում, եթե դուք էսթետիկայից չեք հասկանում, չե՞ք կարողանում մի ճաշակով մեկից խորհուրդ հարցնել։ Թե՞ ուզում եք ասել ռուսական արջն է այսուհետ իշխելու մեր ազատության վրա:

 

- Չգիտեմ ինչի, ինձ թվում ա, որ շուտով Թումանյանի ու Սպենդիարյանի արձանները շունչ են առնելու, վեր կենան գնան Ազատության հրապարակից։ Տպավորություն ա, որ 3-րդ մասի մետրոյի անցումի նկարիչներից մեկի նկարն են բերել տեղադրել:

 

Հնչած ու դեռ հնչելիք մեկնաբանությունների եզրահանգումները թողնենք այս անճաշակության հեղինակ արջասերներին: Երևի արժե նաև հիշեցնել, որ մեր սուղ բյուջեի պարագայում նման շռայլությունները գոնե ինչ-որ բան պետք է ասեն մարդկանց. նրանց, ում համար իբր արվում է այդ ամենը: