Հայաստանի խաղողագործության և գինեգործության հիմնադրամի գործադիր տնօրենի ժամանակավոր պաշտոնակատար Զարուհի Մուրադյանն այսօր լրագրողների հետ հանդիպմանը ներկայացրեց  գինեգործության ոլորտի խնդիրները, զարգացման հեռանկարները:  

Ոլորտի զարգացման համար պետք  է ունենալ գինու  արտադրության համար   պահանջվող խաղողի այգիներ: Մինչդեռ Հայաստանում, ըստ նրա,  տարիներ շարունակ մշակվել է կոնյակի  համար պիտանի խաղող: 

 

- Մեր հիմնադրամի նպատակն է բարձրացնել խաղողագործության որակը, որակյալ խաղող մշակել: Մյուս խնդիրը  քարտեզագրությունն է, որի շնորհիվ հնարավոր կլինի աշխարհագրական անուններով գինիներ արտադրել և արտահանել,-նշեց Զ. Մուրադյանը:

 

Ասուլիսի մյուս բանախոսի՝  «Արմենիա Վայն» ընկերության  վաճառքի գծով տնօրեն Նաիրա Չագլասյանը նկատեց, որ օրենքը հայ գինեգործներին թույլ չի տա միջազգային շուկաներում  աշխարհագրական  տեղանուններով գինի վաճառել: Թեև ՀՀ գյուղատնտեսության նախարարության Ագրովերամշակման զարգացման վարչության պետ Գևորգ Ղազարյանն էլ հակադարձեց, որ  օրենքով  կարգավորված է աշխարհագրական նշումներով  գինիների արտադրությունն ու արտահանումը, պարզապես Հայաստանի համապատասխան տարածքների անունները պետք է հաստատվեն:  

 

- Այդ դեպքում ինչո՞ւ  է հայ գործարարը խնդիր ունենում անգամ Ռուսաստանում: 

 

Հնչած այս հարցն այդպես էլ հստակ պատասխան չստացավ: Միգուցե  հայկական գինի ներկրող երկրները, նաև Ռուսաստանը,  չգիտե՞ն  Հայաստանում գործող օրենքի մասին: Չնայած՝ հազիվ թե ՀՀ օրենքը խոչընդոտ լինի այլ պետություններում: Ավելի հավանական է, որ պարզապես մենք  բավարար ջանքեր չենք գործադրել այդ ուղղությամբ: 

 

Թեև ոլորտում խնդիրներ կան, սակայն  ձեռքբերումներ էլ ունենք: Հայաստանի խաղողագործության և գինեգործության հիմնադրամի ներկայացուցիչը  հավաստիացրեց`  Հայաստանն արդեն  գինի է արտադրում արդեն ոչ միայն տեղական սպառեղի, այլև օտարների  քիմքին համապատասխան:  Պարզապես  մեր երկիրը միջազգային շուկայում  դեռ ընկալում են որպես կոնյակ արտադրող:

 

Ինչպես  հայկական մյուս արտադրանքների, այնպես էլ հայկական գինու սպառողն արտերկրում  հիմնականում Ռուաստանն է: Փոքր քանակով հայկական գինին հասնում է ԱՄՆ, Եվրոպա: Հիմա էլ Չինաստանի հետ են բանակցություններ վարում` հայոց գինու արտահանման համար: