ՀՈՏԱԾ «ՆԱՍԿԻԱԲՈՒՅՐՈՎ»՝ ԸՆԴԴԵՄ ՀԱՐՄԱՐԱՎԵՏՈՒԹՅԱՆ
Ստամբուլաբնակ հրեան չի «մուծվում»
Արդեն 2 տարի է` չեն դադարում տաքսիստների բողոքի ակցիաները, ակցիաներից դուրս էլ հնչող դժգոհությունները : Պատճառը, նրանց հավաստմամբ, ոլորտի բարձիթողի վիճակն է: Կրքերը սրվեցին Հայաստանի շուկա մի քանի օնլայն տաքսի ծառայությունների մուտքից հետո: Սկզբում GG էր, հետո «Յանդեքս»-ը, որը կրակի վրա յուղ լցրեց: Գործող տաքսի ծառայություններին ոչ միայն դուր չի գալիս, այլև խանգարում է այն, որ ընկերությունը քաղաքացիներին տեղափոխում է 200-300 դրամով: Հատկապես կարճ ճանապարհի համար մատչելի գին, ինչը մագնիսի նման անհատ տաքսիստներից «պասաժիրների» փախուստ ստեղծեց:
Օրեր առաջ անհատ տաքսիստները դարձյալ կառավարության շենքի առջև էին: Բողոքի ակցիայից հետո տրանսպորտի և կապի նախարար Վահան Մարտիրոսյանն ընդունեց նրանց, լսեց բողոքները: Դրանք հիմնականում հետևյալն են՝ ինչո՞ւ պետք է անհատ տաքսիստները լիցենզիայի համար վճարեն, հարկային բոլոր պարտավորություններն կատարեն, իսկ «Յանդեքսը»՝ ոչ: Այս տեղեկությունը հաստատեց նաև Հայաստանի տաքսի ծառայությունների գործատուների միության նախագահ Վահագն Սահակյանը:
-Ոլորտի բարձիթողի վիճակից օգտվում են ոչ միայն անպատասխանատու վարորդները, այլև «Յանդեքս»-ը, որը հերքում է, թե տաքսի ծառայություն է: Բայց Յանդեքսը ռեալ իրականացնում է տաքսի ծառայություն: Արդար չէ, երբ «Յանդեքս»-ի տերը` ստամբուլաբնակ հրեան, հարկեր չի վճարում մեր պետությանը: 4-5 հազար մեքենա ունի, որոնք լիցենզավորված չեն, չունեն հաշվիչներ: Տրամադրում են տեղեկանքներ, որ այդ մեքենաներն ունեն հաշվիչներ: Չափագիտության ազգային ինստիտուտն օրենք խախտելով՝ հեռախոսների վրա հաշվիչների առկայության մասին տեղեկանք է տալիս,-ասաց ոլորտի պատասխանատուն:
«Յանդեքս»տաքսի ծառայությունն այդպես էլ այս պահի դրությամբ դեռ չի արձագանքել այդ հայտարարությանը: Բայց ուշագրավ մի հանգամանք շրջանցել չի կարելի: 2016 թ. ՏՄՊՊՀ-ը պարզել էր, որ էլեկտրոնային հարթակներով տաքսի ծառայություն մատուցող վարորդները լիցենզավորված չեն, հարկային դաշտում չեն գործում: ՏՄՊՊՀ-ը որոշել էր մեղմ դիրքորոշում որդեգրել: Հակամենաշնորհային մարմինը, սակայն, որոշեց ոչ թե տուգանել, այլ՝ նախազգուշացնել ընկերությանը՝ հաշվի առնելով մի շարք հանգամանքներ։
- Ընկերությունը նոր է, ծավալները շուկայում մեծ չեն. կարևորը՝ որ ընկերությունը պատրաստակամություն է հայտնել վերացնել այս խնդիրները,-ասել էր կառույցի ղեկավար Արտակ Շաբոյանը:
Փաստորեն, կարող ենք ենթադրել, որ տաքսի ծառայությունը կարծես թե անտեսել է ՏՄՊՊՀ-ի նախազգուշացումը: Թե ինչ քայլեր կանեն պատկան մարմինները՝ Տրանսպորտի և կապի նախարարությունը, ՏՄՊՊՀ-ը, ցույց կտա ժամանակը: Բայց հանուն արդարության պետք է ասենք՝ «Յանդեքսի»և օնլայն տաքսիների մուտքը մրցակցություն ստեղծեց դաշտում: Ավելին՝ անհատ տաքսիստները պետք է «աչք պոչով» հետևեն նրանց ծառայության որակին, վերանայեն իրենց ծառայությունների որակը: Հակառակ դեպքում՝ 21-րդ դարում հոտած «նասկիների բույրով» ներծծված մեքենաներով,ռաբիս երաժշտությամբ, սիգարետից քուլաներ արձակելով՝ հաստա՛տ երկար չես ձգի: