Ս. Թանկյանի ու Ա. Խանջյանի նմանները միշտ սպասված են
ԿՈՏՐՈՒՄ ԵՆ ԿԱՐԾՐԱՏԻՊԸ
Նախորդ հրապարակներում անդրադարձել ենք արտերկրներում բնավորված ու կայացած մեր հայրենակիցների դերակատարությանը Հայաստանի զարգացման գործում: Գրել էինք, որ Սփյուռքը միայն կթու կով չէ, և պետք չէ այն դիտարկել որպես փողի տոպրակ: Իսկ այսօր ուրախությամբ փաստում ենք, որ Սփյուռքի մեր առանձին հայրենակիցներ, մայր հայրենիքին իրենց նվիրումով, աստիճանաբար կոտրում են որոշ կարծրատիպեր:
Այսօր պարզ դարձավ, որ Հայաստանում դիտորդական առաքելություն իրականացնելու համար արտերկրից հայրենիք են ժամանել աշխարհում մեծ ճանաչում վայելող Արսինե Խանջյանը, Սերժ Թանկյանը: Իհարկե, որոշ հասարակական-քաղաքական շրջանակներ ընդվզեցին դրա դեմ` Սփյուռքի ներկայացուցիչների այդ քայլը Հայաստանի ներքին գործերին միջամտություն որակելով: Սխալվում են բոլոր նրանք, ովքեր սփյուռքահայերի գործնական մտահոգությունից խլշում են և անհեթեթորեն ասում, թե Հայաստանից հեռու լինելով՝ դասեր են տալիս մեր հանրությանը: Արսինե Խանջյանի, Սերժ Թանկյանի նմանները միշտ պատրաստակամ են՝ օգտակար լինել համայն հայության հայրենիք Հայաստանին: Իսկ մտահոգ աջակիցը, այո՛, նաև տեսակետ հայտնելու բարոյական իրավունք ունի:
Քննադատողները մոռանում են, որ մի շարք ծրագրերի, արտաքին քաղաքական ճակատում կարևոր հարցերի բարձրացման ժամանակ անգնահատելի է Սփյուռքի նշանակությունը: Բացի դրանից` մեր երկրում դեռ չկան այն անհրաժեշտ նախապայմանները, որպեսզի արսինեխանջյանները ու սերժթանկյանները չարտագաղթեն ու հաջողությունների հասնեն հայրենիքում: Այնպես որ, ողջունելի է մեր հայրենակիցների ակտիվ հետաքրքրությունը՝ նաև ներքաղաքական գործընթացների նկատմամբ, ողջունելի է նրանց սրտացավությունը՝ Հայաստանի խնդիրների հանդեպ:
Հիշենք Քիմ Քարդաշյանի վերջին քայլը, երբ անգամ տարածությունը նրան չխանգարեց՝ հաց բերող Արթուր Սարգսյանի մահից հետո նրա նկարը կրող շապիկով հաց բաժանել Լոս-Անջելեսի փողոցներում ու պատմել Արթուրի մասին: Իրականում նա պատմում էր հայ մարդու մասին, ով չի կարող հաց ուտել, երբ իր կողքին քաղցածներ կան...
Հ. Գ. Ճանաչված մեր հայերին պետք է հորդորել ոչ թե դեպքից դեպք, այլ հաճախ ակտիվություն ցուցաբերել Հայաստանի գործընթացներում: Նախ սրանով, կարծում ենք, վերջ կտրվի անհարկի շահարկումներին: Ապա կոգևորի նաև Ռուսաստանում ապրող մեր հայրենակիցներին՝ անտարբեր չլինել Հայաստանի խնդիրների հանդեպ:
Ի վերջո, քաղաքացիական հասարակություն ձևավորելուն, օրինական պետություն կերտելուն մեծապես նպաստում են արտերկրի մեր հայրենակիցների այսօրինակ ակտիվությունը: