Քար գլորողին չի հուզում, թե քանիսին ու ինչ չափով դա կվնասի: Իրեն օգտակար կամ պարզապես հաճելի է ուժ ու հնարամտություն ցուցադրել՝ գլորում է:

 

Այդ «քարն» այս անգամ Երուսաղեմի կարգավիճակի փոփոխության վերաբերյալ Միացյալ Նահանգների ղեկավար Դոնալդ Թրամփի որոշումն է, որից մեն միակ գոհացողը Իսրայել պետությունն է: Մինչդեռ լրջորեն անհանգստացրել է միջազգային ու հատկապես կրոնական հանրությանը: Դե, իսկ հետագա առավել սրացումներով հղի պաղեստինյան հուզումներին լարված հետևում է ամբողջ աշխարհը:

 

Թրամփյան այս քարգլորն անտարբեր թողնել չէր կարող նաև Մայր Աթոռ Սուրբ Էջմիածնին, որը եկեղեցապատկան կալվածքներ ունի Երուսաղեմում: Մայր Աթոռի անհանգստության պատճառներն այսօր մանրամասնել է Սուրբ Էջմիածնի տեղեկատվական համակարգի տնօրեն Տեր Վահրամ քահանա Մելիքյանը՝ ընդգծելով, որ հիմնական անհանգստությունն այնտեղ հաստատված փխրուն կայունության խաթարումն է՝

 

- Երուսաղեմը շատ բարդ քաղաք է, և գիտեք, որ բազմաթիվ վիճարկումներ են եղել քաղաքի պատկանելության հետ կապված, ընդհուպ մինչև ժամանակին ՄԱԿ-ի որոշում կայացնելը, որով Երուսաղեմը չեզոք գոտի սահմանվեց,- նշել է բանախոսը՝ հավելելով.

 

- Կարգավիճակի փոփոխությունը կարող է ենթադրել խառնաշփոթ այդ դաշտում, քանի դեռ որոշումներ կայացված չեն կողմերի միջև, նման քայլի դիմելը մեծ վտանգ է պարունակում, հղի է անկանխատեսելի հետևանքներով ոչ միայն իսրայելցիների և պաղեստինցիների համար, այլև այնտեղ ապրող, մշտապես իրենց իրավունքների համար մարտնչող եկեղեցիների համար: Գիտեք, դարերով ձևավորվել են այդ կալվածքների գործածության իրավունքները, կանոնակարգերը: Երուսաղեմի կարգավիճակի փոփոխությունը կարող է մեզ կանգնեցնել նոր իրողությունների առջև:

 

Իսկ այդ կալվածքները փոքրաթիվ չեն, որոնք պաշտպանելը հենց Մայր Աթոռի պարտականությունն է:

 

Ինչ վերաբերում է Թրամփի «խենթությանը», ապա շատերի կարծիքով դրա նպատակը ոչ այնքան Իսրայելին հաճոյանալն է, այլ արաբական աշխարհում քաոսը խորացնելը: Մինչդեռ քրիստոնեության կենտրոն դարձած սուրբ քաղաք Երուսաղեմը քաղաքական անմաքուր խաղերից զերծ պահելը պիտի որ ամեն քրիստոնյայի սրբազան պարտքը լիներ, որպեսզի նորից չխաչեին մարդկության մեղքերի համար խաչված Աստծո Որդուն: