ԱԺ պետական-իրավական և մարդու իրավունքների պաշտպանության հարցերի մշտական հանձնաժողովում այսօր քննարկված մի շարք օրինագծերից մեկը վերաբերում էր անհատական և հանրային հանրագրերին. մյուսը՝ ԴԱՀԿ-ին:

 

ՀՀ կառավարությունն առաջարկում է սահմանել անհատական հանրագիր, կոլեկտիվ հանրագիր հասկացությունները, հանրագիր ներկայացնելու կարգը, հանրագիր ներկայացնող անձի իրավունքները, պարտականությունները, պետական տեղական ինքնակառավարման մարմինների պարտականությունները, հանրագրի գրանցման կարգը, այն  ներկայացնող անձի իրավունքներն ու պարտականությունները:

 

Նախագիծը հանձնաժողովում ներկայացնում էր արդարադատության փոխնախարար Արթուր Հովհաննիսյանը, որի խոսքով՝ նախագծի ընդունման անհրաժեշտությունը պայմանավորված է եղել 2005թ. Սահմանադրության փոփոխություններով: Մասնավորապես՝ 53-րդ հոդվածով, որտեղ առաջին անգամ մանրամասնորեն կարգավորվել է յուրաքանչյուր անձի անհատական կամ այլոց հետ հանրագիր ներկայացնելու իրավունքը և պետական ու տեղական ինքնակառավարման մարմիններից պատշաճ պատասխան ստանալու՝ անձի իրավունքը:

 

2005-ի Սահմանադրության մեջ հպանցիկ անդրադարձ եղել է հանրագիր ներկայացնելու իրավունքին. սակայն խոսքը պետական և տեղական ինքնակառավարման մարմիններին առաջարկություններ ներկայացնելու իրավունքի մասին էր և ոչինչ չէր ասվում այլ օրենսդրական կարգավորումների մասին: 

 

Մյուս նախագիծը ԴԱՀԿ-ի մասին օրենքում փոփոխության մասին է: Կառավարությունն առաջարկում է ճկուն համակարգ. պարտապանը, ում գույքի (այդ թվում և՝ դրամական միջոցների) վրա արգելանք է դրվել, կարող է միջնորդություն ներկայացնել հարկադիր կատարողին՝ արգելանքն այլ գույքի վրա դնելու: Բացի այդ՝ 10-րդ աճուրդից հետո  աճուրդի հանված գույքը հանվում է աճուրդից, և աճուրդի է դրվում պարտապանի այլ գույք: Իսկ եթե քաղաքացին այլ գույք չունի՝ աճուրդը շարունակվում է, բայց  20-րդ աճուրդից հետո գույքը հանվում է աճուրդից: 

 

«Ելք» խմբակցության պատգամավոր Արտակ Զեյնալյանը փոփոխություններից գոհ էր, սակայն՝

 

- Ուզում եմ հասկանալ՝ որտեղ եք «քցում»:

 

Հանձնաժողովի նախագահ Հրայր Թովմասյանը պատասխանեց, թե «Ելք» խմբակցությունը հաճախ է այդ նախադասությունն ասում. 

 

- Սովորեք, որ ոչ մի տեղ էլ չենք «քցում»,– ասաց նա:

 

Նախագծերն ընդունվեցին ձայների մեծամասնությամբ և մտան ԱԺ օրակարգ: