ՌԴ Բուրյաթիայի Հանրապետության հայկական համայնքի ներկայացուցիչների հետ այսօր  ՀՀ սփյուռքի նախարարությունում տեղի ունեցած տեսաժողովին մասնակցում էին Սփյուռքի նախարար Հրանուշ Հակոբյանը, նախարարի տեղակալ Սերժ Սրապիոնյանը, նախարարության աշխատակազմի ղեկավար Ֆիրդուս Զաքարյանը, նախարարության աշխատակիցներ: 

Բուրյաթիայից տեսակապով միացել էին ՌՀՄ  Բուրյաթիայի տարածաշրջանային բաժանմունքի նախագահ  Վահե Տոնականյանը, նախագահի տեղակալ   Մարսել Հարությունյանը, պարախմբի ղեկավար Երվանդ Կալաչյանը, համայնքի ներկայացուցիչներ:

 

Ողջունելով տեսաժողովի մասնակիցներին՝ նախարար Հրանուշ Հակոբյանը կարևորեց համայնքի հետ կապերի ակտիվացումը, որը կնպաստի նախարարության ծրագրերին առավել գործուն մասնակցությանը: 

 

- Համայնքը հայ պահելու, ազգային ինքնությունը պահպանելու հզոր գործոն է հայոց լեզվի պահպանումը: Կոչ եմ անում բոլորիդ՝ տանը խոսել հայերեն. այդպես մեր երիտասարդներին հայ կպահենք:  Մյուս խնդրանքս է՝ բոլոր ուժերը միավորել դպրոցը վերաբացելու համար: Դպրոցն է պահպանում հայկականությունը, լեզուն, մշակույթը, ազգային ավանդույթները: Մենք կօգնենք դասագրքերով, ուսումնաօժանդակ նյութերով, անհրաժեշտ ամեն ինչով: Անգնահատելի է հայ ուսուցիչների դերը հայ երիտասարդներ կրթելու գործում: Եվ վերջապես հայապահպանության հզոր գործոն է նախարարության ծրագրերին նրանց ակտիվ մասնակցությունը, որը կնպաստի հայրենաճանաչությանը և Հայրենիքի հետ նրանց կապի ամրապնդմանը: Կարծում եմ՝ ամեն հայ պետք է տեսնի Հայաստանը, միայն այդպես հայ երեխան կմտածի հայ մնալու մասին: Պետք է մտածենք մեր հնարավորությունների, գիտելիքների, կապերի միջոցով հասնել Հայաստանի վարկանիշի բարձրացմանը: Սա պետք լինի յուրաքանչյուր հայկական համայնքի խնդիրը,- ընդգծեց Նախարարը:

 

Ներկայացնելով ՀՀ սփյուռքի նախարարության համահայկական «Արի տուն» և «Սփյուռք» ամառային դպրոց ծրագրերը, Նախարարության աշխատակազմի ղեկավար Ֆիրդուս Զաքարյանը հրավիրեց մասնակցելու դրանց: Ծրագրերի պայմաններին և նպատակներին ավելի հանգամանորեն ծանոթացրեց Համահայկական ծրագրերի վարչության գիտակրթական ծրագրերի բաժնի պետ Սիրվարդ Համբարյանը:

 

Իսկ Բուրյաթիայի տարածաշրջանային բաժանմունքի նախագահ  Վահե Տոնականյանն ու նախագահի տեղակալ   Մարսել Հարությունյանն անդրադարձան համայնքի հաջողություններին, նշեցին, որ  2015թ. ապրիլի 26-ին Բուրյաթիայի Հանրապետության Ուլան Ուդե քաղաքում հայկական համայնքի նախաձեռնությամբ տեղադրվել է Ցեղասպանության 100-րդ տարելիցին նվիրված խաչքար և կազմակերպվել ծառատունկ՝ տնկվել է 100 թխկի: Հպարտությամբ հավելեցին շախմատային, ֆուտբոլային ակումբները հաղթանակների, պարային համույթի հաջող ելույթների մասին: Նշեցին, որ ամեն ինչ կանեն կիրակնօրյա դպրոցը վերաբացելու համար: 

 

Հետաքրքիր առաջարկ ներկայացրեց համայնքի ղեկավարը՝ առաջիկա ծրագրերին, առկա խնդիրներին և դրանց լուծման ուղիներին անդրադառնալով. Հայաստանում տուրիզմի զարգացման համար լավ կլիներ Ուլան Ուդե-Երևան ուղիղ ավիաչվերթներ կազմակերպել և զբոսաշրջային հատուկ ծրագրեր ստեղծել:  Նա նաև հավաստիացրեց, որ այս տարի անպայման կմասնակցեն նախարարության ծրագրերին՝ լիահույս, որ համագործակցությունն այսուհետ ավելի ակտիվ ու արդյունավետ կլինի: