Վաղը՝ սեպտեմբերի 18-ին մեկնարկում է Հայաստան-Սփյուռք համաժողովը

 

«Փոխադարձ վստահություն, միասնականություն և պատասխանատվություն». ահա վաղվանից մեկնարկող Հայաստան-Սփյուռք Համահայկական 6-րդ համաժողովի բնաբան-նշանաբանը:

 

Եվ իրավամբ, հայության կողմից այնքան փայփայվող ու չարչրկված միասնականությունը շարունակելու է մնալ տևական բաղձալի, եթե, տվյալ դեպքում Հայաստան-Սփյուռքի միջև չգոյանա ու չկայանա փոխադարձ վստահությունը: Միասնականությունը, սակայն, ինքնանպատակ  արժեք չէ և դա էլ պետք է ձևավորվի, իրականանա՝ հանուն մեկ այլ գերնպատակի՝ հայոց անկախ պետականության կայացման ու հզորացման:

 

Եվ ինչ խոսք՝ կայացած-հզորացած պետությունն է երաշխիքը՝ բոլոր կարգի հիմնախնդիրների լուծման, որոնք նորովի դիմագրավում է 21-րդ դար թևակոխած ու ցայժմ 26-ամյա անկախ պետականության փորձ ունեցող հայությունը և Հայաստանը:

 

Մեկ խօսքով՝ հայապահպանում, սոցիալական արդարություն, ազգային թե՛ պետական անվտանգություն, Արցախյան հիմնահարցի հայանպաստ հանգուցալուծում, հայոց պահանջատիրությոիւն ու այս ամենն ընդգրկող՝ Հայ Դատի  ու հայոց ազգային գաղափարախոսության հաղթական ավարտը անմիջականորեն պայմանավորված է Հայաշխարհի միջնաբերդ հզոր Հայաստանով ու լիարժեքորեն կայացած նրա պետականութեամբ...:

 

Ահավասիկ 6-րդ համաժողովում առանցքային  օրակարգեր հանդիսացող՝

- Հայաստանի զարգացման հիմնախնդիրները,

- ՀՀ պաշտպանական քաղաքականության առանձնահատկությունները ժամանակակից մարտահրավերների պայմաններում,

- Արտաքին քաղաքականության օրակարգ,

- Հայապահպանութեան հիմնախնդիրներ

ուղղություններն ու առնչակից բոլոր ենթաօրակարգերը լայն քննարկումների արդյունքում պատշաճորեն ուրվագծելու են վերոգրյալ գաղափարների արդիական բանաձևումները, որոնք էլ պետք է կյանքի կոչվեն համապատասխան մեխանիզմների որդեգրմամբ:

 

Իսկ այդ փուլը թևակոխելու և, այսպես ասած՝ գաղափարներն ու խոսքերը կենսագործելու նպատակով 6-րդ համաժողովում կիրառվելու է՝ «Համազգային խորհուրդ» մարմնի ձևավորման նախնական քայլը, որն ոչ այլ ինչ է, եթե ոչ նույն միասնականությանը բովանդակություն հաղորդելու հուսադրիչ և  մոտակա ձեռքբերում՝ հանուն միևնոյն Հայաստանի ու հայության իրատեսական ու համապարփակ հզորացման: