Երևանի պետական կամերային երգչախումբը՝ «Հայնովկա»-ի առաջին մրցանակակիր

Լեհաստանում անցկացվել է «Հայնովկա» ուղղափառ եկեղեցական երաժշտության 43-րդ մրցույթ-փառատոնը:
 
ՀՀ կրթության, գիտության, մշակույթի և սպորտի նախարարության աջակցությամբ մրցույթ-փառատոնին Հայաստանից մասնակցել է Կամերային երաժշտության ազգային կենտրոնի կազմում գործող Երևանի պետական կամերային երգչախումբը` գեղարվեստական ղեկավար և խմբավար Քրիստինա Ոսկանյանի ղեկավարությամբ:
 
Երևանի պետական կամերային երգչախումբն արժանացել է առաջին մրցանակի՝ «Պրոֆեսիոնալ երգչախմբեր» անվանակարգում։ 
 
Նշենք, որ մրցույթ-փառատոնին մասնակցում էին բացառապես նախորդ տարիների առաջին մրցանակակիրները: ԵՊԿԵ-ն հրավեր էր ստացել մասնակցելու այս տարվա փառատոնին՝ որպես պատվավոր երգչախումբ, որը 2022 թվականին արժանացել էր առաջին մրցանակի:
 
Փառատոնի շրջանակում երգչախումբը ելույթներով հանդես է եկել Վարշավայում և Բելիստոկում՝ լավագույնս ներկայացնելով հայ կատարողական արվեստը։