Հարսնացուն օժիտը վաճառում է փեսացուին
ԲԱՆԱԼԻՆ՝ ՌՈՒՍԱՍՏԱՆԻ ՁԵՌՔՈՒՄ
Պատկերացնո՞ւմ եք՝ եթե հարսնացուն իր օժիտը վաճառի փեսացուին՝ լավ իմանալով, որ կարճ ժամանակ անց մի ամբողջ կյանք նրա հետ է անցկացնելու ու հենց ինքն էլ օգտագործելու է այն: Պարզվում է՝ քաղաքական դաշտում նման իրավիճակ կարելի է տեսնել՝ երկրների միջև հարաբերություններում:
Ռուսաստանը մտադիր է ՀԱՊԿ անդամ երկրներին նոր սպառազինություն մատակարարել, այդ թվում՝ ուղղաթիռներ, հակաօդային պաշտպանության համակարգեր և զրահատեխնիկա: Զենքի մատակարարումը կլինի Հայաստանի, Բելառուսի և Ղազախստանի հետ պաշտպանության ոլորտում համագործակցության վերաբերյալ պայմանագրերի համաձայն:
ՀԱՊԿ գործող գլխավոր քարտուղար Վալերի Սեմերիկովն էլ ասել է, որ ՀԱՊԿ-ը կարող է առաջիկա տարիներին իրականացնել իր արագ արձագանքման ուժերին անվճար զենքի մատակարարման ծրագիր: Այն կյանքի կկոչվի 2018-2019 թթ-ին:
Ռուսաստանի այս նախաձեռնությունը ՌԴ ԱԳ նախարար Սերգեյ Լավրովի հայտարարության «շարունակությունն» է: «Ավանգարդը» գրել էր, որ Հայաստանի դաշնակից Մոսկվան պատրաստվում է դիմագրավել իսլամիստ ահաբեկիչների գրոհները: Սպառնալիքն այնքան է մտահոգել Ռուսաստանին, որ Լավրովը չէր բացառել ՀԱՊԿ երկրներում տեղակայված իր բազաների մասնակցությունը ԴԱԻՇ-ի անդամների դեմ պայքարում:
Բացի իսլամիստների դեմ պայքարից՝ Ռուսաստանի այս քայլը նաև սպառազինության մրցավազքի ակտիվացումն է ու իր բիզնես պլանների իրագործումը: Մյուս կողմից, սակայն, չմոռանանք, որ Ադրբեջանը, որպես Հայաստանի թշնամի, զենք է գնում նաև Ռուսաստանից, ինչը հակասում է ՀԱՊԿ-ի պարտավորվածությանը: Ռուսամետ հայ գործիչները հավաստիացնում են, թե ՌԴ-ից զենք գնելը դեռ լիարժեք ինքնուրույն կիրառման իրավունք չի նշանակում:
Բանն այն է, որ ըստ ռուսամետների՝ Մոսկվան զենքեր վաճառելով Բաքվին՝ օգտագործման կոդերը չի տալիս: Ասել է՝ առանց Ռուսաստանի այդ զենքերը հնարավոր չէ օգտագործել: Եթե Մոսկվան Բաքվի հանդեպ կարող է այսպես վարվել, ո՞րն է երաշխիքը, որ ՀԱՊԿ-ի անդամ մյուս երկրների, նաև Հայաստանի հետ այդպես չի վարվի: Արդյո՞ք զենքերի մատակարարմամբ ՀԱՊԿ-ի երկրները կարող են ազատ և ինքնուրույն ռազմական քայլեր ձեռնարկել թե՛ իրենց անվտանգության պահպանման, թե՛ իսլամիստների դեմ պայքարում: