Հոկտեմբերի 9-ին Վրաստանի ԱԳՆ-ն միանշանակ հրաժարվեց 3+3 տարածաշրջանային քաղաքական ձևաչափին երկրի մասնակցության հնարավորությունից, որն առաջարկել էր Թուրքիայի նախագահ Ռեջեփ Թայիփ Էրդողանը՝ որպես Արցախյան երկրորդ պատերազմից հետո Կովկասում կայունության ամրապնդման միջոց:

 

Թբիլիսին չի դիտարկի Ռուսաստանին ներառող որևէ ձևաչափի մասնակցության հնարավորությունը, քանի դեռ նա չի դադարեցնի Աբխազիայի և Հարավային Օսիայի շրջանների օկուպացիան և չի վերադառնա Վրաստանի տարածքային ամբողջականության ճանաչմանը, հայտարարել է (ոչ առաջին անգամ) երկրի ԱԳՆ-ն:

 

Նախագահ Էրդողանի առաջարկած ձևաչափը նախատեսում է վեց երկրների` Թուրքիայի, Ադրբեջանի, Հայաստանի, Վրաստանի, Ռուսաստանի և Իրանի մասնակցությամբ հարթակի ստեղծում: Հավասար հիմունքներով մասնակցելով՝ վեց կառավարությունների ներկայացուցիչները կարող էին արագ և արդյունավետ լուծել տարածաշրջանի բոլոր կարևոր խնդիրները՝ խաղաղությունից մինչև առևտրի և տարանցման հնարավորությունների զարգացում:

 

Հոկտեմբերի 8-ի նախօրեին Վրաստանի ԱԳ նախարար Դավիթ Զալկալիանին Հանրային հեռուստաալիքին տված հարցազրույցի ժամանակ առաջարկեց հարցի մի փոքր այլ մեկնաբանություն:

 

 «Վրաստանը պետք է գոնե ինչ-որ ձևով մասնակցի 3+3 հարթակին, որպեսզի չկորցնի իր դիրքերը տարածաշրջանում, չնայած այն բանին, որ Ռուսաստանի հետ համագործակցությունը շատ դժվար կլինի: Չնայած, իհարկե, մեր երկրի ինքնիշխանությունն ու տարածքային ամբողջականությունը կարմիր գիծ է»,- ասել է նախարարը:

 

Վրաստանում ԱՄՆ նախկին դեսպան Յան Քելլին անմիջապես քննադատությամբ արձագանքեց այս խոսքերին և իր Twitter-ում գրեց. «Շատ դժվա՞ր»: Ռուսաստանը ներխուժել է [Վրաստան] և գրավել այն: Ձեր ընկերները կնախընտրեին լսել, որ դուք այդ անվանում եք «անհնար»:

 

 

Վրաստանի ԱԳՆ-ն այսօր հայտարարել է, որ նախարարի մեկնաբանությունը սխալ է մեկնաբանվել, և, ըստ էության, Զալկալիանին չի ասել, որ Վրաստանը կմասնակցի նման ձևաչափին:

 

Առաջին անգամ Թբիլիսին հրաժարվեց մասնակցել 3+3 նախաձեռնությանը, երբ Թուրքիայի նախագահն առաջին անգամ այդ գաղափարով հանդես եկավ 2020 թվականի դեկտեմբերին՝ Արցախյան երկրորդ պատերազմի ավարտից կարճ ժամանակ անց:

 

Այնուհետև, Ռեջեփ Թայիփ Էրդողանը կրկին հայտարարեց այս նախաձեռնության մասին 2021 թվականի հունիսին Ադրբեջան կատարած այցի ժամանակ: «Տարածաշրջանի բոլոր երկրները, ներառյալ Հայաստանը, ինչպես նաև ամբողջ աշխարհը կշահի, եթե Կովկասում խաղաղություն և հանդարտություն հաստատվի»,- ասել է Էրդողանը:

 

Պլատֆորմին մասնակցելուց հրաժարվելով՝ Վրաստանի ԱԳՆ-ն հայտարարել է, որ երկիրը, այնուամենայնիվ, կարևոր դեր է խաղում տարածաշրջանում, և դա ներառում է մասնակցություն Ասիայի և Եվրոպայի միջև կապեր ստեղծելու ռազմավարական նշանակություն ունեցող նախագծերին:

 

Վրաստանի համար կարևոր են այն նախագծերը, որոնք նպաստում են նրա տնտեսական և քաղաքական անկախությանը, նշել են ԱԳՆ-ում:

 

Հաղորդվում է նաև, որ Վրաստանի վարչապետը ՄԱԿ-ի Գլխավոր ասամբլեային է ներկայացրել խաղաղ հարևանության նոր նախաձեռնություն՝ հիմնված փոխադարձ հարգանքի և հավասարության սկզբունքների վրա:

 

JAMnews, Թբիլիսի