ԴԱՐՁՅԱ՞Լ ՀԱՅԱՍՏԱՆՈՎ՝ ԸՆԴԴԵՄ «ԲԱՐԵԿԱՄՆԵՐԻ»
Գենացվալե, քեզ հետ հաշվի ենք նստում
Վրաստանի ԱԳ նախարար Միխեիլ Ջանելիձեն այսօր Հայաստանում հանդիպել է ՀՀ ԱԳ նախարարի, վարչապետի, ՀՀ նախագահի հետ: Նման հանդիպում վրաց և հայ պաշտոնյաներն ունեցել են նախորդ տարի: Հանդիպումների ընթացքում կարևորվել է հայ-վրացական հարաբերությունների զարգացումը՝ տարբեր ոլորտներում:
Այս հանդիպումները հետաքրքրական են այնքանով, որ վերջին շրջանում Վրաստանի տարբեր գործիչներ տարբեր ատյանններում տեղի-անտեղի են հիշեցնում Հայաստանի մասին: Սա պատահական չէ և ամենայն հավանականությամբ պայմանավորված է թուրք-ադրբեջանական տնտեսական էքսպանսիայի աճով:
Բանը հասել է նրան, որ Ադրբեջանն անգամ Թբիլիսին է համարում Ադրբեջանից խլված քաղաք: Եթե տարիներ առաջ Վրաստանն անտեսում էր Հայաստանի դերն ու նշանակությունը, հույսեր կապում Թուրքիայի ու Ադրբեջանի հետ, այսօր իրավիճակը փոքր-ինչ փոխվել է:
Հասկանալով, թե ինչ ապագա է սպասվում Վրաստանին՝ թուրք-ազերի «եղբայրներին» գլխին նստեցնելու դեպքում, հիշել են Հայաստանի՝ Սոմխեթիի մասին: Գենացվալե, քեզ հետ պետք է հաշվի նստենք՝ ահա այսպիսի, թեկուզ աննշան, փոփոխություն ենք տեսնում: Նույնիսկ զավեշտալի հայտարարություն լսեցինք:
-Աբխազիայի հարցում պետք է Հայաստանի հետ բանակցել, քանի որ բնակչության մեծ մասը հայեր են,- հայտարարել է վրաց պատգամավորներից մեկն ԱԺ-ում:
Հայկական գործոնի ակնարկը, իհարկե, Ադրբեջանին և Թուրքիային էր ուղղված. թե տեսեք՝ խելոք չմնալու դեպքում՝ կթեքվենք դեպի Հայաստանը: Մեզ մնում է միայն ճկուն դիվանագիտությամբ օգուտ քաղել այս ամենից, Հայաստանին հուզող հարցերը լուծել՝ չթողնելով դրանց խորացումն այն աստիճանի, որ ստիպված չլինենք կոշտ միջոցների դիմել: