Այն, որ Հյուսիսային Կորեային սպառնում է միջազգային լիակատար մեկուսացում՝ որոշ երկրներ չեն էլ թաքցնում, որ հենց դրան են ձգտում: Իսկ ահա այդ պետությունն ինքը աշխարհից մեկուսանալ է ձգտում մեկ այլ հարցում. այնտեղ  մերժում են Սուրբ Ծնունդը:

 

Եթե նկատի ունենանք, որ սա քրիստոնեական տոն է, իսկ Կորեական թերակղզում այդ կրոնը կշիռ չունի, սա զարմանալի չի թվա: Բացի այդ, պետք է ենթադրել, որ նախկին սոցիալիստական ճամբարի այս անդավաճան երկիրը աթեիզմի ջատագովն է: Ամեն դեպքում՝ Նոր տարին խորհրդանշական տոն է բոլորի համար, իսկ շքեղորեն  զարդարված տոնածառն աշխարհում միլիարդավոր մարդկանց  ուրախություն է պարգևում:

 

Միայն՝ ոչ ԿԺԴՀ նախագահ Կիմ Չեն Ընի: Լրատվամիջոցները տեղեկացնում են, որ Կիմ Չեն Ընը պատերազմ է հայտարարել Սուրբ Ծնունդին և արգելել է ալկոհոլով ու երգերով ուղեկցվող ցանկացած հավաքույթ: Իսկ դա, փորձագետների պնդմամբ, առաջիկայում ծանր կնստի նաև երկրի տնտեսության վրա: 

 

Պաշտոնական Սեուլը տարիներ շարունակ ապառազմականացված գոտում եռահարկ շենքի բարձրությամբ տոնածառ է տեղադրել, որի լույսերը տեսանելի են եղել նաև Հյուսիսային Կորեայից: Անցած տարի, սակայն, Կիմ Չեն Ընի վարչակարգը զգուշացրել է՝ եթե տոնածառի լույսերը վառվեն, դա կարող է անսպասելի հետևանքներ ունենալ: Այս տարի ևս երևի հյուսիսի կորեացիները կարոտով կնայեն դեպի հարավ, որպեսզի նշմարեն տոնական մթնոլորտի կայծկլտոցները և այդքանով բավարարվեն: Ու եթե չտեսնեն էլ, գոնե կմխիթարվեն նրանով, որ հարավում իրենց եղբայրները տոն են նշում:

 

Իսկ պատերազմասեր Կիմ Չեն Ընը գուցե բավարարվի միայն Սուրբ Ծննդի դեմ իր պայքարով և նոր տարում մոռանա միջուկային պատերազմի մասին: