Իրաքի իշխանությունների հաղորդումը, թե մտադիր են արտաքսել «Իսլամական պետություն» ահաբեկչական խմբավորման անդամների 509 կանաց և 813 երեխաներին՝ Թուրքիայում որոշակի միջադեպերի տեղիք է տվել:

 

Այդ կանանցից 300-ը Թուրքիայի քաղաքացիներ են, իսկ նրանց հարազատները Անկարա գալով՝ խնդրանքով դիմել են Թուրքիայի արտգործնախարարությանը, որպեսզի աջակցեն նրանց՝ Թուրքիա տեղափոխվել: Նրանք ցավով հայտնել են, թե ԻՊ-ի կազմում հայտնված իրենց դուստրերից ու քույրերից երկար ժամանակ լուր չունեն:

 

Թուրք լրագրող Էրթուղրուլ Օզքյոյքը «Հուրիեթի» էջերում սրա դեմ իր վրդովմունքն է արտահայտե՝ նշելով, որ Թուրքիայի համար ԻՊ-ականների վերադարձը շատ վտանգավոր է: 

 

- Գնացին ոտքով, հետ են գալիս բեռնատարներով: Երբ գնում էին, վտանգավոր էին Սիրիայի համար, իսկ հետ գալուց հետո մեզ համար են վտանգավոր դառնում,-գրել է Հուրիեթե սյունակագիրը:

 

ԻՊ-ականների հարազատները, ինչպես երևում է հոդվածից, Անկարա են եկել «սև շորերով», ցանկացել են Մեջլիս մտնել, սակայն երբ դա նրանց թույլ չեն տվել, հավաքվել են ԱԳՆ-ի դիմաց:    

 

- Ասում են՝ իրենց որդիներոից ու դուստրերից լուր չունեն: Բայց ներեցեք, երբ ձեր ամուսինները, որդիներն ու եղբայրները մարդկանց գլուխներ էին կտրում, եզդի կանանց սեքս ստրուկներ էին դարձնում, դուք որտե՞ղ էիք,-շարունակում է Օզքյոյքը:

 

Այս օրերին, երբ Թուրքիայում ամեն օր նորանոր խմբերի ձերբակալման հրամաններ են տրվում և գործողություններ իրականացվում (հենց երեկ, ԶԼՄ-ների հաղորդմամբ, 100 հոգու ձերբակալության նոր կարգադրագրեր են ստորագրվել), մարդասպանի ու ավազակի բարքերով հարյուրավոր իսլամիստների ու նրանց ուղեկիցների վերադարձը դժվար թե մարդկանց ուրախացնի:   

 

Թուրքիայի կյանքում մեկ այլ բարդություն էլ քրդական շարժումներն են առաջացնում: Քրդամետ Ժողովրդադեմոկրատական կուսակցության խոսնակ Այհան Բիլգենը, demokrathaber.org-ի փոխանցմամբ, հայտարարել է, որ Թուրքիան հարկադրված կլինի հաշվի նստել Սիրիայի քրդերի հետ և բարիդրացիական հարաբերություններ կառուցել՝ եթե չի ցանկանում խնդիրներ ունենալ Ռուսաստանի հետ:

 

Խոսելով Թուրքիայի նախագահ Էրդողանի հաճախակի դարձած ռուսաստանյան այցերի մասին՝ քրդամետ գործիչն ասել է. 

 

- Եթե չես ցանկանում ամիսը երեք անգամ Ռուսաստան մեկնել, պետք է լավ հարաբերություններ պահպանես Սիրիայի քրդերի հետ:

 

Հիշենք, որ Սիրիայի հարցով հանդիպելով ռուսական Սոչիում՝ ՌԴ-ի, Իրանի և Թուրքիայի նախագահները  ընդհանուր առմամբ համակարծիք են եղել, բացառություն է կազմել քրդերի հարցը: Թուրքիան դեմ է Սիրիայում քրդական ինքնավարության առկայությանը, քանի որ վախենում է, թե նման երևույթները կտարածվեն նաև իր սահմաններից ներս: