«Արաբական գարունների» շնչով թուլացնելով ու պառակտելով Քադաֆիի երբեմնի ծաղկուն երկիր Լիբիան, տասնամյակներ տևող պատերազմի բովում տապակելով Աֆղանստանը՝ գերտերությունները փաստորեն միայն մեկ բանի հասան՝ այս երկու երկրները դարձրին իսլամիստ ահաբեկիչների որջեր: Իսկ հիմա կոալիցիաներ կազմած՝ փորձում են նրանց ոչնչացնել: Ու դարձյալ հին սխալն են գործում. պատճառները վերացնելու փոխարեն սկսում են հետևանքները վերացնել՝ անկարող լինելով հասկանալ, որ հետևանքներ անընդհատ են լինելու, քանի դեռ պատճառները աճում ու բարգավաճում են: 

 

«Իսլամական պետություն» ահաբեկչական խմբավորման դեմ նոր հաղթանակի մասին է ավետել ՍԱՆԱ գործակալությունը: Սիրիայի կառավարության բանակը ճեղքել է Դեր Զոր քաղաքի՝ երեք տարուց ավելի տևած շրջափակումը, որտեղ 100 000-ի չափ բնակիչ անտանելի պայմաններում էր գոյատևում: Բնակիչներն արդեն տոնում են հաղթանակը՝ չնայած նահանգի մեծ մասը դեռևս ահաբեկիչների հսկողության տակ է:

 

Հարց է ծագում՝ դիրք դիրքի հետևից հանձնելով՝ որտե՞ղ են ահաբեկիչները ապաստան գտնում: «Ռիա նովոստիի» մեկնաբանությամբ՝ Սիրիայում և Իրաքում պարտվելով՝ իսլամիստ ծայրահեղականները տեղափոխվում են Լիբիա և Աֆղանստան: Երկու պետությունների իրավապահ մարմինների համար դա տհաճ անակնկալ է:

 

Պարբերականը նշել է, որ արմատական իսլամիստների ձեռքում է հայտնվել Սիրտ նավահանգստային քաղաքը, որի պաշտպանության համար մինչև 2011թ. աշուն պատասխանատու է եղել Մուամար Քադաֆին: Քաղաքագետ Գրիգորի Լուկյանովը կարծիք է հայտնել, թե իսլամիստներին հաջողվել է քաղաքը գրավել, երբ բնակիչներն այն լքել են: Սիրտում հաստատված ահաբեկիչները վերահսկողության տակ են վերցրել Լիբիայի ծովափնյա տարածքների մի մասը՝ օգտվելով իշխանության կենտրոնների անհամաձայնություններից: 

 

Լրատվամիջոցների հաղորդմամբ՝ «Իսլամական պետության» կողմնակիցները նահանջել են դեպի հարավ՝ անապատ, և թաքնվել այնպիսի տարածքներում, որտեղ պետական իշխանություն չի եղել: Իսկ ահա այս օրերին պարզ է դարձել, որ ԻՊ դեմ իրական հաղթանակ տանել չի հաջողվել, և իսլամիստները վերադառնում են նախկին վայրերը: