Կրեմլի նպատակն արևմտյան կառավարություններին վարկաբեկելն է և եվրոպական երկրներում կյանքը կազմալուծելը՝ ասված է Եվրամիության զեկույցում:

 

Ռուսաստանն ապատեղեկատվության համաշխարհային արշավ է իրականացնում կորոնավիրուսի պանդեմիայի առնչությամբ. այս մասին ասվում է Եվրամիության ներքին զեկույցում, որը հայտնվել է բրիտանական Financial Times պարբերականի ձեռքում:

 

Կրեմլի ազդեցության տակ գտնվող լրատվամիջոցներն ու ինտերնետ-թրոլները բազմաթիվ նյութեր են հրապարակում, որոնց նպատակը բնակչությանն ապատեղեկացնելն է, վախ և խուճապ սերմանելը, ասված է զեկույցում։

 

Արդեն տասնյակ նման ֆեյք հաղորդագրություններ են բացահայտվել։ Դրանցում հստակ երկու միտք է արտահայտվում․

 

• «Նոր վարակը մարդու կողմից է ստեղծվել և օգտագործվում է Արևմուտքի կողմից որպես զենք»։

 

• «Արևմտյան կառավարություններն ունակ չեն խնդիրը լուծել»։

 

• «Ռուսաստանում նախագահ Պուտինի ղեկավարության տակ ամեն ինչ լավ է, ոչ մի պանդեմիա չկա»։

 

Կեղծ հաղորդագրությունները տարածվում են միանգամից մի քանի լեզուներով։ Դա արվում է կեղծ օգտատերերի ցանցի միջոցով։

 

Ավելի վաղ դրա միջոցով սուտ տեղեկություններ էին տարածվում Սիրիայում տիրող իրավիճակի և Ֆրանսիայում «դեղին բաճկոնների» ցույցերի մասին։

 

• Ռուսաստանի մասին՝ միայն լավը։ Ինչպե՞ս են ֆինանսավորվում և կառավարվում ռուսամետ լրատվամիջոցներն արտասահմանում

 

• Թե ինչպես Կրեմլը պարալիզացրեց 2 հազար կայք Վրաստանում

 

• Կորոնավիրուս․ պանդեմիա է հայտարարվել։ Ի՞նչ է դա նշանակում, և ի՞նչ սպասել

 

Ինչպես հաղորդում է Reuters–ը, Եվրամիությունում հրաժարվել են մեկնաբանել զեկույցը, սակայն ԵՄ ներկայացուցիչը հաստատել է, որ կապի մեջ է Google-ի, Facebook-ի, Twitter-ի և Microsoft-ի հետ և նրանց հետ քննարկում է կորոնավիրուսի մասին ապատեղեկատվությունը։

 

Ավելի վաղ Facebook-ը հաղորդել էր, որ հեռացրել է հարյուրավոր կեղծ էջեր, որոնք կապված են Սանկտ Պետերբուրգում գտնվող այսպես կոչված «թրոլների ֆաբրիկայի հետ»։

 

Դրա սեփականատերը նախագահ Պուտինին մոտ գործարար Եվգենի Պրիգոժինն է։ ԱՄՆ-ում նա մեղադրվում է 2016թ-ի նախագահական ընտրություններին միջամտելու մեջ։