«Կոալիցիան ընդունակ է լուծել երկրի առջև ծառացած խնդիրները»
Նախընտրական տարվան հատուկ` քաղաքական ուժերի ակտիվացման, նրանց տարբեր դրսևորումների, հասարակության և պետության վրա դրանց ազդեցության մասին է զրույցը Հայաստանի Հանրապետական կուսակցության փոխնախագահ, ԱԺ պատգամավոր Ռազմիկ ԶՈՀՐԱԲՅԱՆԻ հետ: - Նախընտրական տարի է, և ցանկացած քաղաքական ուժ, բնականաբար, պետք է դրսևորվի` ժողովրդի քվեն ստանալու համար: Բայց ամեն քաղաքական ուժ յուրովի մոտեցում է ցուցաբերում: ՀԱԿ-ը հանրաքվեի ճանապարհն է բռնել` իր բողոքներով ու պահանջներով. իշխանափոխություն, արտահերթ ընտրություն և այլն: Քաղաքական մեկ այլ ուժ` «Ժառանգությունը», սկսեց ոստիկանության հետ փոքր ընդհարումներով, մինի բունտերով, եկավ-հասավ Ազատության հրապարակում իր լիդերի հացադուլին: Փորձում էին այդպիսով խաղալ հասարակության զգացմունքների վրա, շարժել նրա գութը: Իրենք, իրենց իսկ ասելով, քաղաքացիական հասարակության կառուցման, զարգացման սկիզբ են դնում: Եվ ներկայացված բողոքներով ուզում են ցույց տալ, որ հասարակության ինչ-ինչ խնդիրներ լուծված չեն, և դրա մեղավորն առաջին հերթին իշխանությունն է: Ես նախ հարց եմ տալիս. ինչպես կարող է պետության մեջ միայն իշխանությունը պատասխան տալ բոլոր խնդիրների համար: Չէ՞ որ պետության մի մասը նաև ընդդիմությունն է, և ինչպես իրենք են ասում` հասարակության որոշակի շերտեր իրենց պաշտպանում են: Ճիշտ է, իշխանությունն ունի գործադիր լծակներ, բայց եթե խոսքը բարոյական պատասխանատվության մասին է, ապա ցանկացած քաղաքացի, եթե ուզում է կառուցել քաղաքացիական հասարակություն, իրավական պետություն, ապա պատասխանատվություն պետք է ստանձնի` սկսած օրենքների ամենափոքր խախտումներից: Պետք է լինի օրենքների գերակայություն, բոլորը պետք է ենթարկվեն օրենքներին` կլինի ընդդիմությունից, կլինի իշխանությունից, թե շարքային քաղաքացի: Օրինակ` ՀԱԿ-ը, օրենքներ չի՞ խախտում. վերցնենք վերջին իրադարձությունը, որ ավելի ակնառու լինի: Քաղաքապետարանն Ազատության հրապարակում հանրահավաք անցկացնելու թույլտվություն չէր տվել: Իրենք Մատենադարանի մոտ հանրահավաք արեցին, երթով եկան Ազատության հրապարակ: Եթե դու հարգում ես օրենքները, ապա ինչու ես բարոյական ճնշում գործադրում ոստիկանության վրա: Ոստիկանութ յունն էլ, որպեսզի ընդհարումների տեղիք չտար, զիջեց ու թույլ տվեց, որ Ազատության հրապարակում էլ մի քանի ժամ հանրահավաքը շարունակեն: - Բայց ինչո՞ւ թույլ չտալ, որ ժողովուրդը Ազատության հրապարակում հավաքվի: - Կարելի է և Ազատության հրապարակում հանրահավաք անել: Բայց անձամբ ես դեմ եմ, որ քաղաքի կենտրոնում հանրահավաքներ լինեն: Ի վերջո ի՞նչ է` հայ ժողովրդի ամենակարևոր միջոցառումները հենց այդ հանրահավաքնե՞րն են, որ պետք է կենտրոնում լինեն` խաթարելով այնտեղ հանգստացողների երեկոն. այդտեղ նաև մշակութային միջոցառումներ են լինում: Նույնիսկ Մատենադարանի հարակից տարածքը հանրահավաքին տրամադրելն է սխալ, դրա համար այլ վայր է պետք ընտրել: Հիշում եք, հատկացվեց ստադիոնին կից տարածքը: Բողոքեցին, չգնացին… Շատ երկրներում հանրահավաքները կազմակերպում են այնտեղ, որտեղ քաղաքապետարանը թույլ է տալիս: Բայց մեզանում, 88-ից Ազատության հրապարակն ընկալվում է որպես հաղթանակ բերող, իշխանափոխության ու չգիտեմ ինչերի վայր: Հիմա քաղաքապետարանը դարձյալ չի արտոնել այնտեղ հանրահավաք անել: Եվ եթե իրենք, ինչպես Լևոն Տեր-Պետրոսյանն է ասում` գնում են սահմանադրական ճանապարհով և օրենք չեն խախտում, ապա թող հանրահավաքն անցկացնեն այնտեղ, որտեղ քաղաքապետարանը թույլ կտա: Իսկ եթե ոչ, կնշանակի` առաջին հերթին իրենք են ոտնահարում քաղաքացիական հասարակության զարգացումը: Այդ օրենքների մի մասն էլ իրենց իշխանության օրոք է ընդունվել: Եթե իրենք իրենց ընդունած օրենքը չեն հարգում, ի՞նչ քաղաքացիական հասարակության կառուցման մասին խարող է խոսք լինել: Նրանց իշխանությունների օրոք սկսվեց և այսօր էլ շարունակվում է բարեփոխումների, փոփոխությունների գործընթացը: Դա առկա է բոլոր ոլորտներում: Նախագահի կողմից հստակ պահանջ է դրված, որ գնալու ենք բարեփոխումների ուղիով: Եվ կատարվող բարեփոխությունները բխում են մեր ծրագրից: Որևէ ընդդիմություն չի կարող մեզ ինչ-ինչ քայլեր պարտադրել, եթե այն չի համապատասխանում մեր ծրագրին: - Վերջերս ասուլիսներից մեկում «Նոր Ժամանակներ» կուսակցության նախագահ Արամ Կարապետյանն ասաց, թե բարեփոխումներով Հայաստանում հարց չի լուծվի: - Ասեմ, որ բարեփոխումները ոչ միայն Հայաստանում, այլ ամբողջ Եվրոպայում են հարց լուծել: Հայաստանը ժողովրդավարական պետություն է, որտեղ իշխանութ յունները հավասարակշռված են: Ի՞նչ համակարգային փոփոխության մասին է խոսքը: Եթե նա նկատի ունի Նախագահի փոփոխությունը, ապա դա իր երազանքն է, և չեմ կարծում, թե մոտ ապագայում դա կտեսնի, որովհետև «Հանրապետականը» և կոալիցիան հաստատակամ են գնում 2012 և 2013 թթ. ընտրություններին: - Վերջերս Հանրապետության նախագահը քննադատաբար խոսեց մեզանում առկա գնաճի մասին: Եվ այդ հանգամանքը հիմք ընդունելով, լուրեր են շրջանառվում, թե իբր առաջիկայում վարչապետի փոփոխություն է հնարավոր: - Քանի որ տնտեսության, գնաճի համար ի վերջո կառավարությունն է պատասխանատու, բնականաբար, կարող է և դժգոհություններ լինեն: Բայց չեմ լսել, որ դրա արդյունքում վարչապետի փոփոխության հարց առաջացած լինի: Իհարկե, հնարավոր է` նման լուրեր հերթական անգամ հորինի և տարածի ընդդիմությունը: Իսկ տնտեսության, մասնավորապես, գյուղատնտեսության մասին առաջարկները հենց այս կառավարությանն են արվել, ու հիմա այդ հարցերը ուսումնասիրվում են և շուտով համարժեք լուծումներ կառաջարկվեն: Կարծում եմ` արդեն մայիս- հունիս ամիսներին որոշակի, իսկ տարեվերջին արդեն լուրջ փոփոխությունների ականատես կլինենք` և´ գների, և´ ընդհանրապես սոցիալական հարցերի առումով: Իհարկե, չեմ ասում, որ ամեն ինչ 100 տոկոսով կլուծվի: Մեր երկիրը շրջափակման մեջ գտնվող պետություն է. մենք, ինչպես բոլորը, կրել ենք միջազգային տնտեսական ճգնաժամի հետևանքները: Բայց կարծում եմ` այս կոալիցիան ընդունակ է լուծել երկրի առջև ծառացած բոլոր խնդիրները: - Մեր զրույցն ըստ էության, ընթացավ երկխոսության անհրաժեշտության շուրջ: Ի՞նչ եք կարծում, հենց այդպիսի մի փո՞րձ չէր այն, որ ոստիկանությունը չխոչընդոտեց, որպեսզի Մատենադարանի մոտ սկսված հանրահավաքը շարունակվի Ազատության հրապարակում: - Դեռևս ամիսներ առաջ ես ասել եմ, որ երկխոսություն տեղի չի ունենա, քանի որ ընդդիմադիրները միանգամից պահանջում են Նախագահի հրաժարականը: Մինչդեռ երկխոսությունը կարող է կայանալ որոշակի ծրագրերի շուրջ: Իսկ երբ հարցն արմատապես է դրվում, թե պետք է արտահերթ ընտրություններ լինեն, երկխոսություն չի կարող լինել: Իհարկե, հիշատակված միջադեպը երկխոսության տարրեր պարունակում էր. ոստիկանությունը զիջեց` ընդհարումը կանխելու ու դրա հետևանքով տուժածներ չլինելու համար: Բայց դա չի նշանակում, թե ամեն անգամ, նույնիսկ քաղաքապետարանի թույլտվությունը չլինելու դեպքում էլ, ոստիկանները գրկաբաց կդիմավորեն հանրահավաքի մասնակիցներին: Ոչ, եկեք` բոլորս հարգենք օրենքները: Կրկնեմ` երկրում բարեփոխումներ են ընթանում, և միայն իշխանությունից չպետք է փոփոխություն պահանջվի: Ընդդիմությունն էլ պետք է փոփոխությունների գնա. ամեն ինչ երկկողմանի է լինում: Էլ ինչո՞ւ ենք ասում` երկխոսություն:
