Ոսկե միջինը…

Հանրապետությունում առկա տնտեսական բնույթի գործընթացների, սոցիալական վիճակի ու քաղաքական զարգացումների վրա դրանց հնարավոր ազդեցության մասին է զրույցը ԱԺ ՀՀԿ խմբակցության քարտուղար Գագիկ ՄԵԼԻՔՅԱՆԻ հետ:

- Դեկտեմբերի 5-ին «Ժառանգություն» կուսակցության ղեկավարը եռյակից առանձին հանրահավաք է հրավիրել: Ի՞նչ եք կարծում, ի՞նչ նպատակ է հետապնդում առանձին հանրահավաք անցկացնելը:

- Րաֆֆի Հովհաննիսյանն ինքը հայտարարեց, որ ցանկանում է առանձին հանդես գալ հանրահավաքներով` ասելով, թե ոչ իշխանական եռյակում միասնական օրակարգ չի ձևավորվել, և ինքը կասկածում է, որ այն ընդհանրապես կձևավորվի: Դա քաղաքական ուժի կարծիքն է, որն ինքը կարող է իրացնել:

- Իսկ Ձեր տեսակետից, սա արդյո՞ք չի վկայում եռյակի քայքայման սկզբի մասին:

- «Ժառանգության» ղեկավարն իր շուրթերով հայտնեց, որ եռյակում միասնական օրակարգ ու նպատակ չի ձևավորվում:

- Տարին մոտենում է ավարտին, և ազգային վիճակագրական ծառայության` նոյեմբեր ամսվա տվյալներով ունենք պարենային ապրանքների գների աճ: Ընդորում, հավի ձվի տեղական արտադրողները մեկ ամիս առաջ հավատացնում էին, թե այս Ամանորից առաջ հավկիթի գնի թանկացում չի լինի:

Բայց պարենային ապրանքները արդեն թանկացել են 2,5, մասնավորապես հավկիթը` 1,8 տոկոսով:

ՀՀԿ-ին չի անհանգստացնում այն, որ տարվա վերջին պարենային ապրանքների գների այսպիսի աճ ենք ունենում: Ասում են` հարուստ է այն պետությունը, որտեղ և´ գներն են բարձր, և´ բնակչության եկամուտները, սակայն մեզանում առաջինները միշտ ավելի բարձր են:

- Գլոբալ աշխարհում տեղի ունեցող իրողությունները կարծում եմ` պետք է հանգեցնեին այդ իրավիճակին: Դա ամերիկյան տնտեսության աճի, ինչպես նաև Ռուսաստանի նկատմամբ ամերիկյան և եվրոպական երկրների պատժամիջոցների հետևանք է: Ամերիկյան տնտեսության աճով արժևորվեց ամերիկյան տարադրամը: Դա ցանկացած երկրում միանշանակ պետք է հանգեցներ ապրանքների գնաճի: Կարծում եմ` մեր հանրապետությունում գների աճը նաև դրա հետևանքն էր: Իսկ ընդհանուր առմամբ` գնաճը մեր հանրապետությունում կլինի բյուջեով հաստատված` սահմանված նորմաների շրջանակներում: Բայց ցանկացած պարագայում ես կիսում եմ այն կարծիքը, որ դա մեր ժողովրդի համար ավելի լուրջ դժվարություններ կստեղծի, քանի որ գնողունակության աճ, կարծես թե, աշխարհում տեղի ունեցող փոփոխություններով մեր հանրապետությունում չի սպասվում: Նկատի ունենալով նաև, որ բնակչության շուրջ 32 տոկոսը աղքատ է, ցանկացած գնաճ մեր հանրապետությունում սոցիալական վիճակի վրա իր բացասական հետևանքներն անպայման կունենա:

- Իսկ Ձեր նշած բացասական հետևանքներն իրենց հերթին արդյո՞ք բացասական ազդեցություն չեն ունենա քաղաքական կացության վրա. սոցիալականից դժգոհությունը կարող է քաղաքական լարվածության պատճառ դառնալ:

- Ես համոզված եմ, որ խնդիրներ, իրոք, հանրապետությունում գոյություն ունեն, բայց չեմ կարծում, թե դրանք կարող են հանգեցնել քաղաքական լարվածության շատ խիստ աճի: Ամեն դեպքում դա իր բացասական հետևանքներն անպայման կունենա, բայց ոչ շատ լուրջ: Ուզում եմ ավելացնել, որ այս պարագայում կառավարության կողմից համապատասխան որոշումներ կընդունվեն` ինչ-որ չափով բնակչության սոցիալական վիճակի լարվածությունը մեղմելու նպատակով: Իհարկե, եկող տարվա բյուջեն արդեն հաստատված է, բայց կարծում եմ` նաև նպաստների, կենսաթոշակների լրացուցիչ ավելացման ուղղությամբ որոշումներ, քննարկումներ կլինեն:

- Հայաստանը գնում է դեպի Եվրասիական տնտեսական միության անդամակցության, այսինքն, սերտացնում է տնտեսական կապերը Ռուսաստանի հետ: Բայց Դուք ևս նշեցիք ՌԴ նկատմամբ պատժամիջոցների մասին: Չէ՞ որ դա կարող է խորացնել տնտեսական առումով բացասական հետևանքները: Մարդկանց որոշակի խմբեր վերջերս ցույց էին անում ԱԺ մոտ` ընդդեմ Հայաստանի ԵՏՄ-ին անդամակցության :

- Ես չեմ ցանկանում այդ ամենը կապել ռուբլու արժեզրկման հետ: Ես ասում եմ` ռուբլու արժեզրկման հետ արժեզրկվեցին նաև լարին, եվրոն, դրամը, մանաթը… Այսինքն, սա միայն ռուբլու արժեզրկման խնդիրը չի: Խնդիրն այն է, որ դոլարը արժևորվեց բոլոր արժույթների նկատմամբ: Իսկ այն, որ կան խմբեր, որոնք դեմ են ԵԱՏՄ-ին Հայաստանի անդամակցությանը, ասեմ, որ դա այդ մարդկանց մասնավոր կարծիքն է: Միգուցե նաև որոշ երկրների քաղաքականության հետևանք է, որն իր լայն արձագանքը չի գտնում մեզանում: Այո, կարող են լինել նաև ԵԱՏՄ-ին մեր անդամակցությանը դեմ արտահայտվողներ, որոնք մեր երկրում մեծ տեսակարար կշիռ չեն կազմում:

- Վերջին հարցը. խնդրում եմ Ձեր կարծիքը` ընդդիմության առաջադրած տասներկու կետերից մեկի` ընտրական համակարգի փոփոխության մասին: Մասնավորապես, առաջարկվում է անցնել հարյուր տոկոսանոց համամասնական ընտրակարգի:

- Կարծում եմ` այս քննարկումը նաև վկայությունն է այն իրողության, որ մեր կողմից բազմիցս հայտարարվել է, որ իշխանությունները պատրաստ են ցանկացած քաղաքական ուժի հետ քննարկել ցանկացած մտահոգիչ հարց: Քննարկումների ընթացքում հնչում են նաև նախագծի հեղինակների մտադրություններին դեմ տեսակետներ: Ամեն դեպքում, ցանկացած քննարկման արդյունքում մենք հանգում ենք այն եզրակացության, որ իրոք, մեր բնակչությանը մտահոգող ցանկացած խնդիր պետք է լուրջ քննարկումների փուլ անցնի, ինչի ընթացքում որոշում կկայացվի, թե ինչ ճանապարհով պետք է ընթանալ, ինչ ժամանակահատվածում պետք է դրանց լուծումները տեսնել: Կարծում եմ` քննարկումների արդյունքը կլինի այն, որ այս ԱԺ-ում ներկայացված հարցն իր լուծումը չի ստանա, սակայն արդեն համապետական ընտրություններից շուրջ մեկ տարի առաջ, արդեն սահմանադրական փոփոխություններից հետո նորից քննարկման կդրվի: Համոզված եմ, որ քննարկումների ընթացքում կգտնենք ոսկե միջինը: