ԲԱՆԱԿՆ ԱՅՍՕՐ ՄԱՐՏՈՒՆԱԿ Է
Ադրբեջանի ՊՆ Ս. Աբիևը օրերս կրկին հանդես է եկել զավեշտալի հայտարարություններով: Այս առնչությամբ մեկնաբանություններ ստանալու խնդրանքով ՀՀ պաշտպանության նախարար Սեյրան ՕՀԱՆՅԱՆԻՆ իր հարցերն է ուղղել ԱրմԱր լրատվական գործակալության թղթակիցը: - Պարոն նախարար, մեկնաբանելով ՀՀ նախագահի այցելությունը սահմանամերձ շրջաններ և Լեռնային Ղարաբաղի Հանրապետություն, Ադրբեջանի պաշտպանության նախարար Ս. Աբիևը հայտարարել է, թե Սերժ Սարգսյանն իրավունք չունի այցելելու Լեռնային Ղարաբաղ և հնարավոր է, որ այդ այցը լինի վերջինը: - Աբիևի` ցանկալին որպես իրականություն տեսնելու ձգտումը հասկանում ենք: Խորհուրդ եմ տալիս նրան մեկնաբանել իր երկրի նախագահի շրջայցերը: Իսկ ինչ վերաբերում է ՀՀ նախագահի այցելությանը Լեռնային Ղարաբաղի Հանրապետություն, ապա նա կարող է այցելել ցանկացած ժամանակ: Այդպես եղել է, այդպես էլ կլինի: - Անդրադառնալով ԼՂՀ պաշտպանության բանակի անցկացրած վերջին զորավարժություններին, Աբիևն ասել է, որ իրենց «ամեն ինչ հայտնի է և թշնամին չի կարող ակտիվանալ»: Միաժամանակ հավելել է, որ Ադրբեջանի զինված ուժերն ի վիճակի են ազատագրելու այսպես կոչված գրավյալ «տարածքները»: - Առաջին անգամ չէ, որ Ադրբեջանի ռազմական և քաղաքական ղեկավարներն այդպիսի անլուրջ հայտարարություններ են անում: ԼՂՀ-ում անցկացվող զորավարժություն ները մշտապես ցավագին են ընդունվել նրանց կողմից: Պաշտպանության բանակն այսօր մարտունակ է և ունի բարձր փորձառություն, ժամանակակից սպառազինություն ու պատրաստ է դիմագրավելու ցանկացած ոտնձգության: Ինչ վերաբերում է ադրբեջանական բանակի մարտական պատրաստվածության բարձր մակարդակի մասին արվող հայտարարություններին, ապա ես չեմ ցանկանում մեկնաբանել դրանք: Կարող եմ ասել միայն, որ բանակների մարտունակությունը չի չափվում մերկապարանոց հայտարարություններով: Վստահ եմ, որ Ադրբեջանի պաշտպանության նախարարը այդ մասին լավ գիտի:
