Վստահության պակասը
- Սա բոլորիս երկիրն է,- ասում է ԱԺ ՀԱԿ խմբակցության քարտուղար Արամ ՄԱՆՈՒԿՅԱՆԸ
- Վերջերս Ձեր հարցազրույցներից մեկում, խոսելով իշխանություններին ընդդիմության ներկայացրած պահանջների մասին, ասել եք, որ ժողովուրդը ակտիվ չէ. մասնավորապես էլեկտրաէներգիայի թանկացմանը դեմ լինելու հարցում չկա նրանից ակնկալվող օժանդակությունը:
- Ժողովուրդը դժգոհում է, բայց անհրաժեշտ ակտիվությունը չկա: Ժողովրդի մի մասը վախեցած է, մի մասը տանն է դժգոհում, մի մասը` փողոցում…
- Իսկ ինչո՞վ եք բացատրում Ձեր նշած պասիվությունը. կուսակցություններին չի՞ վստահում:
- Արտագաղթն այնպիսի չափերի է հասել, որ երկրում ժողովուրդ չի մնում. ապուշը կարող է ուրախ լինել իր հոսանքի, գազի թանկացումից, ոստիկանական տեռորից: Եթե մարդուն մորթում են, ու ինքը ձայն չի հանում, ուրեմն վիճակը վատ է, ուրեմն ավելի վատից է վախենում… Եթե ձեզ էլ 15 տարի վախի մեջ պահեն, վախեցնեն աշխատանքից զրկելով, հետապնդումների ենթարկելով, բանտեր նետելով` դուք էլ այդպիսին կլինեք: Շանտաժներն ու ճնշումն ազդում են մարդկանց վրա: Յուրաքանչյուրին վախեցնելու մի ձև են գտնում… Ռեժիմ կոչվածը հենց սա է. ռեժիմ, որտեղ չկան ո´չ քաղաքական ուժեր, ո´չ բացախոսություն ու ժողովրդավարություն:
- Բայց կան քաղաքացիական նախաձեռնություններ, որոնցում հիմնականում երիտասարդությունն է հանդես գալիս, և նրանց ոչնչով չես վախեցնի:
- Էս պահին մոտ 50 երիտասարդների ոստիկանությունը բերման է ենթարկում… (մեր զրույցը ՀԾԿՀ շենքի մոտ ոստիկանության և ակտիվիստների միջև բախումների պահին էր-Ա. Դ.) Դուք լրագրող եք, ժողովրդին կոչ արեք ակտիվանալ, իշխանություններին կոչ արեք օրենքի շրջանակներում գործել… Դուք էլ պասիվ մի մնացեք` ձեր ընթերցողներով, ձեզ լսողներով գործուն մասնակցություն ունեցեք: Վերջապես միայն լրագրող չեք, ձեր ընթերցողներն էլ միայն ընթերցող չեն… չէ՞ որ սա բոլորիս երկիրն է վերջին հաշվով:
- Լևոն Զուրաբյանը վերջին նստաշրջանին հաջորդող ասուլիսում ասաց, որ սեպտեմբերին ընդդիմադիր քառյակի դիքորոշումը շատ ավելի կոշտ է լինելու: Ի՞նչ է նշանակում ավելի կոշտ լինել:
- Մենք 12 կետից բաղկացած կոնկրետ պահանջներ ենք ներկայացրել իշխանությանը: Դրանց դրական արձագանք չստանալու դեպքում մենք մեր առաջին քայլը ասել ենք` հանրապետական հանրահավաք: Հանրահավաքին կտեսնենք` ինչ զանգված կհավաքվի, ինչ ուժեր կմիանան, ըմբոստության ինչ աստիճան կլինի, քաղաքական ուժերն ինչ տրամադրվածություն կունենան... Ցանկացած տարբերակ ես չեմ բացառում: Ժողովուրդն իրավունք ունի սահմանադրորեն արտահայտելու իր կամքը և որոշելու իր ապրելու ու պայքարելու ցանկացած ձևը: Եթե երկիր է կործանվում, եթե մի ողջ ժողովրդի ոչխարի տեղ են դնում, ապա ժողովուրդն իրավունք ունի ցանկացած պատասխանի:
- Դուք հույս ունե՞ք, որ նշած ժամանակամիջոցում անհրաժեշտ կրիտիկական զանգվածը կհավաքվի:
- Ես ոչ թե հույս ունեմ, որ կրիտիկական զանգված կհավաքվի, այլ ուզում եմ, որ իշխանությունը խելքի գա և կատարի այն պահանջները, որ ներկայացրել ենք: Այդ պահանջներն իշխանության կամ ընդդիմության համար չեն. դրանք ժողովրդի համար են: Եթե այդ պահանջները կատարվում են, հայը չի արտագաղթում Հայաստանից, իսկ մեր խնդիրը մեկն է: Մեր նպատակը բարի է, կառուցողական: Եթե իրենք դրականորեն չեն արձագանքում կառուցողականին, ուրեմն պետք է աշխատենք կրիտիկական զանգված հավաքել: Իսկ թե որն է այդ կրիտիկականը` չգիտեմ… Հավաքում ենք այնքան, ինչքան կարողանում ենք, հավաքում ենք այնքան, ինչքան ժողովուրդը կամենում է: Ստանդարտներից դուրս վիճակ է, աննորմալ իրավիճակ է, որը կարող է նույնքան աննորմալ դրսևորումներ ունենալ: Այնպես որ, ձեր հարցերի պատասխանը ես բազմապատկման աղյուսակի գծած պատրաստի կանոններով չունեմ:
- Գառնիկ Իսագուլյանը վերջերս հեռուստատեսությամբ ընդդիմությանը խորհուրդ էր տալիս ամռանն այցելել մարզեր և 12 պահանջները բացատրել ժողովրդին, որպեսզի վերջինս էլ միանա դրանց: Ըստ Գ. Իսագուլյանի` այդ դեպքում 12 պահանջները կդառնան ժողովրդի առաջադրած պահանջներ:
- Գառնիկը չի, որ պիտի խորհուրդ տա: Մենք լուրջ քաղաքական ուժ ենք և մշտապես առնչվում ենք մեր տարածքային կառույցների հետ: Բնականաբար, հարկ եղած դեպքում կպատրաստվենք նաև սեպտեմբերին: Եթե իշխանությունները կոպիտ քայլերը շարունակեն, ես չեմ բացառում, որ սեպտեմբերը կարող է նաև ավելի շուտ գալ:
- Կան կարծիքներ, որ Հայաստանին հատկապես հիմա խիստ անհրաժեշտ է ներքին կայունությունը: Գիտեք, որ միշտ խաղաղ համարվող Նախիջևանի սահմանում վերջերս բախումներ են տեղի ունեցել: Ներքին ապակայունացումն արդյո՞ք վտանգավոր չի լինի մեր Հանրապետության համար:
- Իշխանությունն այսօր հետևողականորեն գնում է ամենակայուն վիճակ ստեղծելու` Հայաստանից մարդկանց տարհանելու ճանապարհով: Եթե Հայաստանում մարդ չի լինի, բնականաբար ոչ մի բողոքող էլ չի լինի, ոչ մի դժգոհող էլ չի լինի: Իրենք են տարածում, թե ներքին կայունություն պետք է լինի, որ դրսում խնդիրներ չունենանք: Ես էլ ասում եմ` ներսում վստահություն պետք է լինի, որ դրսում խնդիրներ չունենանք: Մենք չունենք այդ վստահությունը: Մենք ուզում ենք լինի իշխանություն, որին ժողովուրդը վստահում է. մենք դրա պակասը ունենք:
