«Ակտիվության սանդղակը միայն հանրահավաքներով չի որոշվում»

Խորհրդարանում ՕԵԿ պատգամավորական խմբակցության օրենսդրական նախաձեռնությունների, հանրապետությունում ներքաղաքական զարգացումների, դրանցում կուսակցության մասնակցության մասին է հարցազրույցը ՕԵԿ փոխնախագահ, ԱԺ պատգամավորական խմբակցության ղեկավար Հեղինե ԲԻՇԱՐՅԱՆԻ հետ: - Մոտենում է տարեվերջը, և բոլոր խմբակցություններն աշխատում են թեկուզ իրենց համար ճշտել, թե օրենսդրական կարևոր ի՞նչ նախաձեռնություն են հանդես բերել անցնող տարվա ընթացքում, ի՞նչ են հասցրել անել և ի՞նչ է մնացել անավարտ: ՕԵԿ-ի օրենսդրական նախաձեռնություններից ո՞րն առավել կկարևորեիք, ո՞րը կուզենայիք հատկապես նշել: - Պետք է նշեմ հատկապես այն ոլորտներին վերաբերող օրենսդրական նախաձեռնությունները, որոնք ՕԵԿ-ը այսօր առաջնահերթ է համարում: Երկուշաբթի օրը քննարկվեց և առաջին ընթերցմամբ ընդունվեց Գրադարանների մասին օրենքի նախագիծը, որը մենք կարևորում ենք այն առումով, որ անկախ Հայաստանի 20 տարիների կենսագրության մեջ այդ ոլորտն օրենքով չէր կարգավորվում: «Գրադարանների և գրադարանային գործի մասին» ՀՀ օրենքի ընդունման անհրաժեշտությունը պայմանավորված է այն հանգամանքով, որ օրենսդրությամբ կարգավորված չեն մշակութային ժառանգության անքակտելի մասը կազմող ՀՀ գրադարանային հավաքածուների օգտագործման, տնօրինման և օտարման հարցերը - Գրադարանների ոչ բարվոք վիճակի մասին մեզանում շատ է խոսվել: Ձեր օրենսդրական նախաձեռնության մեջ կոնկրետ ի՞նչ է առաջարկվում, որից կարող ենք ասել, որ կշահի այս ոլորտը: - Օրինագիծը նպատակ ունի կարգավորել տեղեկատվական, մշակութային և կրթական գործունեության բնագավառներում գրադարանային համակարգի ստեղծումն ու զարգացումը, ինչպես նաև, կարգավորել գրադարանային տեղեկատվական սպասարկման ծառայությունների իրականացման ոլորտում ծագող իրավահարաբերություն ները, տնտեսական հիմքերը, սահմանել գրադարանային հավաքածուների զարգացման, համալրման, պահպանման, մատչելիության սկզբունքները և Հայաստանի ազգային գրադարանային համակարգի հիմնական գործառույթները: Նախագծում գրադարանի պարտադիր գործառույթ է համարվում նոր տեղեկատվական տեխնոլոգիաների ներդրումը: Սա կարևոր է այնքանով, որ Հայաստանում ներկայումս կան գրադարաններ, որոնք համակարգիչ, ավելին` ինտերնետ չունեն: Մյուս կարևոր հարցը վերաբերում է գրադարանների շենքերի օտարմանը: Նախագծով ամրագրվում է, որ պետական և համայնքային սեփականություն հանդիսացող գրադարանների շենքերը կարող են օտարվել բացառիկ դեպքերում, ՀՀ Կառավարության թույլատվությամբ: Արգելվում է Հայաստանի ազգային գրադարանի սեփականության ձևի և բնույթի փոփոխումը, ինչպես նաև նրա հավաքածուների շենքերի ու զբաղեցրած տարածքների օտարումը: Մենք նման պրակտիկա ունեցել ենք` կապված մանկապարտեզների շենքերի օտարման արգելման հետ: Այժմ էլ պետք է կիրառել գրադարանների դեպքում: Մյուս խնդիրը վերաբերում է գրադարանների հավաքածուի համալրմանը, որի կարևորագույն սկզբունքն է համարվում անընդհատությունը: Հաջորդ երկու կարևոր խնդիրները վերաբերում են ֆիզիկական սահմանափակում ունեցող անձանց, գրադարանային-տեղեկատվական սպասարկմանը, որը պետք է իրականացվի նպատակային ֆինանսավորման պետական ծրագրերով: Սա կարևոր է այնքանով, որ ֆիզիկական սահմանափակում ունեցող անձանց համար պետք է ստեղծվեն բոլոր պայմանները` գրադարաններից օգտվելու համար: Կան սոցիալական բնույթի օրենսդրական նախաձեռնություններ, որոնք խիստ կարևոր են «Օրինաց երկիր» խմբակցության համար: Վերջին շրջանում մարզերում մեր ունեցած բազմաթիվ հանդիպումները ցույց են տվել, որ երիտասարդներն ընտանիքներ կազմելու, բնակարաններ ձեռք բերելու, այլ ծախսերի համար հնարավորություններ չունենալու պատճառով մեկնում են արտերկիր աշխատելու: Հետևաբար ՕԵ խմբակցությունն առաջարկում է նորաստեղծ ընտանիքներին պետության կողմից միանվագ դրամական աջակցություն հատկացնել: Նման նախաձեռնություն դեռևս 2008 թ. գործում է ԼՂՀ-ում: Սա երիտասարդներին մեր հող ու ջրին կապելու հնարավորություն է: Կարևոր նախագծերից մեկն էլ այս պահին արդեն ԱԺ քառօրյայում է: Օրենքի այդ նախագիծը աջակցելու է մինչև 2 տարեկան երեխա ունեցող երիտասարդ մայրերին: Մեզանում կա տարանջատում. եթե մայրը աշխատել է մինչև ֆիզարձակուրդը, մինչև 2 տարեկան երեխայի համար ստանում է 18 հազար դրամ նպաստ: Մենք առաջարկում ենք, որ այդ 18 հազար դրամը ստանան ոչ միայն աշխատող, այլև չաշխատող մայրերը: Կարևորում ենք և այն, որ մեր հետևողականության արդյունքում 2012 թ. բյուջեում ավանդների վերադարձման գործընթացի հերթական գումարն է ներդրվել` 1.7 միլիարդ դրամ: Ընդհանրապես մեր օրենսդրական կարևոր նախաձեռնությունների շարքը փոքր չէ, և մեկ հարցազրույցի ընթացքում բոլորին անդրադառնալ հնարավոր չի լինի: - Իսկ ինչպե՞ս կգնահատեք, կմեկնաբանեք այսօրվա ներքաղաքական զարգացումները, և այդ ամենում ի՞նչ տեղ ու դեր ունի ՕԵԿ-ը: - Ներքաղաքական իրավիճակը համահունչ է նախընտրական այս փուլին: Այս շրջանում բոլոր քաղաքական ուժերն ակտիվանում են, և լինում են տարբեր զարգացումներ, գաղափարներ, դասավորումներ: Տարատեսակ քաղաքական այդ գործընթացները նորմալ ու օրինաչափ եմ համարում: Մեզ համար հերթական նախընտրական շրջան է, և մենք նորից պատրաստվում ենք ընտրություններին, ինչպես միշտ ենք պատրաստվել. հանրությանը ներկայացնելու ենք մեր կատարած և առաջիկայում կատարելիք աշխատանքները: «Օրինաց երկիրն» իր 15 տարիների կենսագրությունով ամրապնդել է իր սկզբունքները: Մեր նպատակն է` օրենքի երկիր ստեղծել և հետևողականություն ցուցաբերել այդ օրենքների կիրառման գործում: Կարծում եմ` այն ընտրազանգվածը, որ մշտապես ՕԵԿ-ի հետ է, շատանալու է. վերջին շրջանում մեր ակտիվ հանդիպումները դա են ցույց տալիս, և առաջիկա ընտրություններում մենք դարձյալ կունենանք մեր ծանրակշիռ տեղն ու դերը Հայաստանի ներքաղաքական կյանքում: - Իսկ ընտրություններին ՕԵԿ-ը միայնա՞կ կգնա, թե՞ այլ կուսակցությունների հետ նախընտրական դաշինքով: - Մինչև այսօր ընտրություններին միասնական ցուցակով մասնակցելու քննարկումներ քաղաքական թիմերի մեջ չի եղել: Մենք միշտ մենակ ենք գնացել ու հաղթել ենք ընտրություններում: Եթե երկրում կառաջանան այնպիսի մարտահրավերներ (թե´ արտաքին, թե´ ներքին), որոնք հիմք կհանդիսանան նախընտրական դաշինք ձևավորելու, մենք կքննարկենք այդ հարցը ու համապատասխան որոշում կկայացնենք: Բայց մինչև այսօր նման բան չկա, և «Օրինաց երկիրը» առանձին կմասնակցի ընտրութ յուններին: - Իմ հաջորդ հարցը վերաբերում է ՕԵԿ-ՀԱԿ հարաբերություններին: ՀԱԿ-ը այսօր ընդդիմադիր դաշտում կարծես առանձնանում է իր ակտիվությամբ: Ուրբաթ օրը ՀԱԿ-ի հերթական հանրահավաքն է: - Ես ակտիվության սանդղակը միայն հանրահավաքներով չէ, որ ուզում եմ որոշել: ՕԵԿ-ն այսօր չափից ավելի ակտիվ է, որովհետև չկա մեկ օր, չկա մեկ շաբաթ և կիրակի, որ մենք մարզերում չլինենք, չհանդիպենք մեր հայրենակիցների հետ: Յուրաքանչյուր քաղաքական ուժ ինքն է ընտրում իր ընտրազանգվածի հետ ակտիվ աշխատելու ձևաչափը: ՀԱԿ-ն ընտրել է հանրահավաքային ձևը, իսկ մենք աշխատում ենք այլ սկզբունքով: Ես կարծում եմ` ամեն քաղաքական ուժ աշխատում է ակտիվության տեսանկյունից որևէ մեկին չզիջել: ՀԱԿ-ն արտախորհրդարանական քաղաքական ուժ է, պայքարում է, ուզում է գալ խորհրդարան: Եթե որպես քաղաքական ուժ կհայտնվի խորհրդարանում, այնպես, ինչպես բոլոր խմբակցությունների հետ, մենք նույնպես մեր աշխատանքները կարող ենք միասին կատարել` եթե կլինեն հարցեր, որոնց շուրջ կունենանք միասնական մոտեցումներ: - Իսկ նոր խորհրդարանում պատկերացնո՞ւմ եք արդյոք ներկայիս կոալիցիայի շարունակականությունը, կամ` կարո՞ղ է լինել նոր կոալիցիա: - Ընտրություններից հետո բոլոր քաղաքական ուժերն ընտրում են իրենց ճանապարհը: Լինում է, որ ընդդիմությունն ու իշխանությունը փոխվում են տեղերով: Սա քաղաքական մշակույթ է: Եվ ինձ համար հաճախ զարմանալի է, որ շատ կարճամիտներ մեղադրում են քաղաքական ուժերին, որ ընտրություններից հետո նրանք ընտրություն են կատարում, թե ինչպես աշխատեն հետագայում: Ես չեմ բացառում, որ կլինեն քաղաքական ուժեր, որոնք կտեղափոխվեն ընդդիմությունից իշխանություն կամ հակառակը: Հնարավոր է, որ ընտրություններից հետո նորից կոալիցիա ձևավորվի, և այլ քաղաքական ուժեր լինեն այդ կոալիցիայի անդամ: Ես դա չեմ բացառում: -Շնորհակալություն հարցազրույցի համար և հաջողություն Ձեզ: